Anak nga mga Babaye sa Pakigsaad sa Dios

Ni Jean A. Stevens

Unang Magtatambag sa Kinatibuk-ang Kapangulohan sa Primary

Kon ang anak nga mga babaye sa Dios motutok sa templo ug sa sagradong mga pakigsaad, ang Dios makapapanalangin sa personal ug gamhanang paagi.

Minahal nga mga sister, moabi-abi ko ninyo uban sa gugma. Karon, bisan asa pa mo sa kalibutan, ako manghinaut nga nabati ninyo ang gugma sa Ginoo ninyo ug ang Espiritu nga nagsaksi sa inyong kasingkasing sa mensahe nga gikanta sa choir. Idugang ko ang akong pagpamatuod sa ilaha: Nasayud ako nga ang Manluluwas buhi ug naghigugma sa matag usa kanato.

Nagpundok kita karon isip anak nga mga babaye sa pakigsaad sa Dios. Ang atong pangidaron, kahimtang, ug personalidad dili makabulag kanato, kay labaw sa tanan kita Iyaha. Nakigsaad kita nga hinumduman ang Iyang Anak sa kanunay.

Ang gahum sa tagsa-tagsa ka pakigsaad nakapatandog sa akong kasingkasing tulo ka semana ang milabay samtang mitambong ko og bunyag. Sa akong atubangan ang walo ka bata hilum nga naglingkod uban sa kahinam nga sa katapusan ang ilang espesyal nga adlaw miabut na. Apan samtang nagtan-aw ko sa ilang malipayong nawong, wala nako makita nga basta lang grupo sa mga bata. Kondili akong nakita sila sama sa unsay makita sa Ginoo—tinagsa-tagsa. Nakita nako si Emma ug si Sophia ug si Ian ug si Logan ug si Aden ug si William ug si Sophie ug si Micah. Matag pakigsaad sa bunyag gihimo sa tagsa-tagsa. Matag usa nagputi, anaa sila—andam uban sa ilang tibuok otso anyos nga kasingkasing sa paghimo sa unang pakigsaad sa Dios.

Handuma ug handurawa ang inyong kaugalingong adlaw sa bunyag. Madaghan o gamay ra ang inyong mahinumduman, batia karon ang kaimportante sa pakigsaad nga tagsa-tagsa ninyong gihimo. Human malitok ang inyong kaugalingong ngalan, kamo gituslob sa tubig ug mikawas isip Iyang anak nga babaye—usa ka anak nga babaye sa pakigsaad, andam nga tawagon pinaagi sa ngalan sa Iyang Anak ug nagsaad sa pagsunod Niya ug pagtuman sa Iyang mga sugo.

Ang mga pakigsaad sa Dios makatabang nato nga masayud kon kinsa gayud kita. Kini ang mosumpay nato ngadto Niya diin atong mabati ang atong bili diha sa Iyang panan-aw ug ang atong luna diha sa Iyang gingharian. Sa paagi nga dili nato hingpit nga masabtan, kita nailhan ug gihigugma Niya tagsa-tagsa. Hunahunaa kini—matag usa nato dunay luna sa Iyang kasingkasing. Iyang tinguha nga kita mopili sa dalan nga modala nato pauli ngadto Kaniya.

Mahinungdanon man ang pakigsaad sa bunyag, kini mao lang ang sinugdanan—ang ganghaan paingon sa kinabuhing dayon. Sa unahan sa atong panaw mao ang mga pakigsaad sa templo nga himoon ug mga ordinansa sa priesthood nga dawaton. Sama sa gipahinumdom ni Elder David A. Bednar nato,“Sa atong pagbarug diha sa tubig sa bunyag, kita nagpaabut sa panalangin sa templo.”¹

Dili lang sa paghimo og mga pakigsaad apan sa matinud-anong pagtuman usab sa mga pakigsaad nga kita andam sa pagdawat sa kinabuhing dayon. Kana ang atong paglaum, tumong, ug kalipay.

Ako mismo saksi sa gahum sa mga pakigsaad samtang nagtan-aw sa akong matarung nga ginikanan, kinsa nahigugma ug nagsunod sa ebanghelyo. Sa akong mapinanggaon nga inahan pribilehiyo nako nga klarong makita ang inadlaw-adlaw nga desisyon sa anak nga babaye sa pakigsaad sa Dios. Bisan sa bata pa siya, ang iyang pagpili makita sa iyang prayoridad ug nagpaila niya isip disipulo ni Jesukristo. Nakita nako ang kalinaw, gahum, ug proteksyon nga miabut sa iyang kinabuhi samtang iyang gihimo ug gituman ang sagradong pakigsaad sa iyang panaw. Ang iyang kinabuhi dinhi sa yuta mipakita sa iyang gugma sa Manluluwas ug sa iyang tinguha sa pagsunod Niya. Gusto ako nga mosunod sa iyang panig-ingnan.

Ang kinabuhi sa panag-uban sa akong ginikanan nagsugod sa talagsaong paagi. 1936 kadto. Sila tinud-anay nga nag-date ug nagplanong magminyo dihang ang akong papa nakadawat og sulat nga nagdapit niya sa pagserbisyo isip full-time nga misyonaryo sa South Africa. Ang sulat nag-ingon nga kon takus siya ug andam moserbisyo, kontakon niya ang iyang bishop. Makita ninyo nga ang proseso sa pagtawag og misyonaryo kaniadto lahi kaayo! Gipakita ni papa ang sulat sa iyang minahal, si Helen, ug determinado sila sa walay pagpangutana nga moserbisyo siya.

Sulod sa duha ka semana sa wala pa siya molarga, magkita sila matag adlaw aron maniudto sa Memory Grove duol sa Salt Lake City. Atol sa usa sa ilang paniudto, human mangayo og giya pinaagi sa pagpuasa ug pag-ampo, si Mama miingon sa iyang minahal nga si Claron nga kon gusto pa siya, nga magminyo sila sa dili pa siya molarga. Kaniadto sa Simbahan, ang kalalakin-an usahay tawagon aron magmisyon ug ibilin ang mga asawa ug ang pamilya sa balay. Busa ingon usab niana sa akong mama ug papa. Uban sa pagtugot sa iyang mga lider sa priesthood, nagdesisyon sila nga magminyo sa dili pa siya magmisyon.

Sa Salt Lake Temple, si Mama nakadawat sa iyang endowment, ug dayon gikasal sila sa karon ug sa kahangturan ni David O. McKay. Ang ilang pagsugod yano lang. Walay mga litrato, walay nindot nga sinina sa kasal, walay bulak, ug walay reception aron isaulog ang okasyon. Ang ilang gitutukan mao ang templo ug ang ilang mga pakigsaad. Alang nila ang mga pakigsaad mao ang labing mahinungdanon. Human sa unom ka adlaw sa kaminyoon ug puno sa luha nga panamilit, ang akong papa milarga sa South Africa.

Apan ang ilang kaminyoon labaw pa sa ilang lawom nga gugma sa usag usa. Sila usab dunay gugma sa Ginoo ug tinguha sa pagserbisyo Niya. Ang sagradong mga pakigsaad sa templo nga ilang gihimo nakahatag nila og kalig-on ug gahum nga makalahutay sa duha ka tuig nga panaglagyo. Sila dunay mahangturong panglantaw sa katuyoan sa kinabuhi ug sa gisaad nga mga panalangin sa nagmatinud-anon sa ilang mga pakigsaad. Kining tanang panalangin mas dako kay sa ilang kadiyot nga sakripisyo ug panaglagyo.

Bisan kon sa pagkatinuod dili sayon nga magsugod og kinabuhi nga minyo, gipamatud-an niini nga mao ang mas maayong paagi sa pagtukod og pundasyon alang sa mahangturong pamilya. Samtang nagkadako ang pamilya, nasayran namo unsay labing importante sa among ginikanan. Nga mao ang ilang gugma sa Ginoo ug ang walay paglubad nga pasalig sa pagtuman sa mga pakigsaad nga ilang gihimo. Bisan kon patay na ang akong ginikanan, ang sumbanan sa pagkamatarung gihapon ang nakapanalangin sa among pamilya.

Ang ehemplo sa ilang kinabuhi gipahayag sa mga pulong ni Sister Linda K. Burton: “Ang labing maayong paagi sa paglig-on sa panimalay, karon o sa umaabut, mao ang pagtuman sa mga pakigsaad.”²

Ang panahon sa ilang kalisud ug pagsulay wala pa mahuman. Tulo ka tuig human sa pagpauli ni Papa gikan sa misyon, ang Ikaduhang Gubat sa Kalibutan nagkagrabe, ug sama sa kadaghanan, miapil siya sa militar. Nalayo siya sa balay sulod sa upat ka tuig samtang nagserbisyo siya sa navy, sakay sa barko sa panggubatan didto sa Pasipiko.

Lisud kadto nga panahon sa akong ginikanan nga magkalagyo na usab. Apan alang sa akong inahan, kadtong panahon sa pag-inusara, kabalaka, ug walay kasiguroan gilakipan usab sa paghunghong sa Espiritu sa mahangturong mga saad, kahupayan ug kalinaw taliwala sa kalisdanan.

Bisan pa sa iyang mga hagit, ang akong inahan nagpuyo sa abundang kinabuhi nga puno sa kamaya, kalipay, gugma, ug pagserbisyo. Ang iyang gugma sa Manluluwas makita sa paagi sa iyang pagpakabuhi. Siya dunay talagsaong koneksyon sa langit ug dunay gasa ug kapasidad sa paghigugma ug pagpanalangin sa tanan nga naglibut niya. Iyang hugot nga pagtuo sa Dios ug paglaum diha sa Iyang saad nga makita diha sa mga pulong ni Presidente Thomas S. Monson kabahin sa templo sa dihang siya miingon, “Walay sakripisyo nga dako kaayo, walay kantidad nga bug-at kaayo, walay paningkamot nga lisud kaayo aron makadawat niana nga mga panalangin.”³

Sa tanang panahon sa iyang kinabuhi, si Mama nalig-on ug napanalanginan sa iyang gugma sa Ginoo ug sa mga pakigsaad nga matinud-anon niyang gihimo ug gituman.

Walay duha-duha nga ang mga detalye sa istorya sa inyong kinabuhi lahi kay sa iyaha. Apan ang mga baruganan sa iyang kinabuhi magamit natong tanan. Kon ang anak nga mga babaye sa Dios motutok sa templo ug sa sagradong mga pakigsaad, ang Dios makapanalangin sa personal ug gamhanang paagi. Sama sa ehemplo sa akong inahan, ang inyong pagpili nga motuo ug motuman sa mga pakigsaad magbilin og nindot nga panulundon niadtong mosunod ninyo. Busa, minahal nga mga sister, unsaon aron makadawat kita sa gahum ug mga panalangin sa mga pakigsaad sa templo? Unsay atong buhaton karon aron maandam alang niana nga mga panalangin?

Samtang mibiyahe ko, akong nasayran nga dunay mga sister sa lain-laing edad, lain-laing kahimtang, kansang kinabuhi naghatag og mga tubag niini nga mga pangutana.

Nakaila nako si Mary pagkahuman gayud sa iyang ikawalong adlaw nga natawhan. Sama sa kadaghanan, malipayon siya nga mohimo sa family history ug nakatampo og sobra sa 1,000 ka pangalan alang sa buhat sa templo. Si Mary nag-andam na karon sa panalangin sa pagsulod sa templo kon mo-12 na siya.

Si Brianna 13 ug ganahan nga mohimo og buhat sa family history ug templo. Gidawat niya ang hagit ni Elder Neil L. Andersen sa templo.⁴ Nag-andam siya og gatusan ka pangalan alang sa buhat sa templo ug, kauban niya, miapil ang iyang pamilya ug mga higala sa pagpahigayon sa bunyag. Niining sagradong buhat, ang kasingkasing ni Brianna mipabalik dili lang ngadto sa iyang yutan-ong amahan apan ngadto usab sa iyang Langitnong Amahan.

Bisan kon si Anfissa busy nga young adult nga nagtrabaho ug nag-eskwela sa graduate school, duna gihapon siyay panahon nga makatambong sa templo matag semana. Siya nakadawat og pagpadayag ug nakakaplag og kalinaw samtang nagserbisyo sa balay sa Ginoo.

Si Katya, ang minahal nga sister sa Ukraine, dunay dakong gugma sa templo. Sa wala pa matukod ang templo sa Kyiv, siya ug ang uban sa iyang branch misakripisyo pagbiyahe og 36 ka oras sakay sa bus aron makatambong sa templo kausa sa usa ka tuig didto sa Germany. Kining matinuoron nga mga Santos nagtuon sa kasulatan, nanganta sa himno, ug naghisgut sa ebanghelyo samtang nagbiyahe. Si Katya miingon nako, “Dihang miabut na mi sa templo, andam na kami nga modawat unsay ihatag sa Ginoo namo.”

Kon gusto nato nga madawat ang tanang panalangin sa Dios nga abundang gitanyag, ang atong dalan kinahanglan paingon ngadto sa templo. Ang mga templo usa ka pagpahayag sa gugma sa Dios. Siya midapit natong tanan nga moadto, magkat-on bahin Niya, mobati sa Iyang gugma, ug modawat sa mga ordinansa sa priesthood nga gikinahanglan sa kinabuhing dayon uban Niya. Matag pakigsaad gihimo sa tinagsa-tagsa. Matag dakong kausaban sa kasingkasing mahinungdanon sa Ginoo. Ug ang inyoha makahimo og dakong kalainan alang kaninyo. Kay kon kita moadto sa Iyang balaan nga balay, kita “sinangkapan sa [Iyang] gahum, … [Iyang] ngalan … diha [kanato], … [Iyang] himaya … maglibut [kanato], ug ang [Iyang] mga anghel mobantay [kanato].”⁵

Akong ipakigbahin ninyo ang akong sigurado nga pagsaksi nga ang atong mahigugmaong Amahan sa Langit buhi. Pinaagi kini sa Iyang Pinalanggang Anak, si Jesukristo, nga matag paglaum, matag saad, ug matag panalangin sa templo matuman. Hinaut nga kita dunay hugot nga pagtuo sa pagsalig Kaniya ug sa Iyang mga pakigsaad, ako nag-ampo sa pangalan ni Jesukristo, amen.