“Duha ka Adlaw sa Dinasig nga mga Mensahe”

“Nakasinati kita og duha ka adlaw sa dinasig nga mga mensahe,” miingon si Presidente Thomas S. Monson sa pagtapos sa ika-184 nga Tunga sa Tuig nga Kinatibuk-ang Komperensya niadtong Dominggo, Oktubre 5, 2014.

Kadto nga mga mensahe naglakip sa kaimportante sa pagpalambo og pagpamatuod nga makapalahutay ninyo sa tanang sirkumstansya; pagsubay sa dalan sa Manluluwas ug sa pagkahimong matinud-anon nga disipulo; pagsunod ug sa pagpaluyo sa mga propeta; maalamong paggamit sa kabubut-on; ug paghimo sa panimalay nga usa ka dapit sa gugma, kasiguroan, ehemplo, ug pagkat-on sa ebanghelyo.

Sa iyang pangbukas nga pakigpulong sa Sabado, si Presidente Monson mihatag og gibug-aton nga ang Simbahan nagpadayon sa pagtubo. “Kita karon sobra na sa 15 ka milyon ka lig-on ug nagtubo nga gidaghanon,” miingon si Presidente Monson. “Ang atong misyonaryo nga paningkamot nagpadayon nga wala mapugngi. Kita adunay 88,000 sobra ka mga misyonaryo nga nagserbisyo, nagsangyaw sa mensahe sa ebanghelyo sa kalibutan.”

Sa sesyon sa Sabado sa hapon, si Elder Carlos H. Amado ug Elder William R. Walker sa Unang Korum sa Seventy gi-release ug gihatagan og emeritus status. Si Elder Arayik V. Minasyan ug Elder Gvido Senkans gipang-release isip mga Area Seventy.

Sa unang higayon sa kinatibuk-ang komperensya, pipila sa mga mamumulong kansang nag-unang mga pinulongan dili Iningles namulong sa ilang lumad nga pinulongan. Si Elder Chi Hong (Sam) Wong namulong gamit ang Cantonese, Elder Eduardo Gavarret ug Elder Hugo E. Martinez gamit ang Spanish, ug Elder Carlos A. Godoy gamit ang Portuguese.

Ang pundok sa katawhan mipuno sa 21,000 ka mga lingkuranan sa Conference Center ug sa ekstrang mga dapit sa Temple Square sa Siyudad sa Salt Lake, Utah, USA, sa kada sesyon sa komperensya, nga gihubad ngadto sa sobra sa 90 ka pinulongan ug gisibya ngadto sa sobra sa 170 ka mga nasud ug mga teritoryo. Agi og dugang, ang mga panghitabo anaa sa telebisyon, radyo, satellite transmission, ug sa Internet, lakip sa mobile device. Kini nga komperensya mitimaan sa 90 ka tuig nga anibersaryo sa sibya diha sa radyo ug 65 ka tuig nga anibersaryo sa sibya diha sa telebisyon sa komperensya.

Si Presidente Thomas S. Monson namulong sa sesyon sa Dominggo sa hapon sa kinatibuk-ang komperensya.