“Ongo ʻAho Nāunauʻia ʻo e Ngaahi Pōpoaki Fakalaumālié”

Naʻe pehē ʻe Palesiteni Tōmasi S. Monisoni ʻi he fakaʻosinga ʻo e Konifelenisi Lahi Fakavaeuataʻu Hono 184, ʻi he ʻaho Sāpate, 5 ʻOkatopa 2014, “Kuo tau aʻusia ha ongo ʻaho nāunauʻia ʻo ha ngaahi pōpoaki fakalaumālie.”

ʻOku kau ʻi he ngaahi pōpoaki ko iá ʻa e mahuʻinga ʻo hono fakatupulaki ha fakamoʻoni te ke malava ai ke kātakiʻi ʻa e ngaahi tūkunga kotoa pē; muimui ʻi he akonaki ʻo e Fakamoʻuí pea hoko ko ha ākonga mateaki; muimui mo poupou ki he kau palōfitá; fakaʻaongaʻi fakapotopoto e tauʻatāina ke filí; ngaohi ʻa e ʻapí ke hoko ko ha feituʻu ʻo e ʻofá, maluʻanga, faʻifaʻitakiʻanga mo e akoʻanga ʻo e ongoongoleleí.

Naʻe fakamatala ʻa Palesiteni Monisoni ʻi heʻene lea fakaava ʻi he ʻaho Tokonakí ki he hokohoko atu ʻa e tupulaki ʻo e Siasí. Naʻe pehē ʻe Palesiteni Monisoni “Kuo tau fakalaka ʻeni ʻi he toko 15 miliona tupú pea ʻoku kei tupu tokolahi pē.” “ʻOku hoko atu ʻetau polokalama ngāue fakafaifekaú ʻo ʻikai taʻofi. ʻOku ʻi ai haʻatau kau faifekau ʻe toko 88,000 tupu ʻoku lolotonga ngāue, ʻo vahevahe ʻa e pōpoaki ʻo e ongoongoleleí ki he māmaní.”

ʻI he fakataha ʻo e hoʻatā Tokonakí, naʻe tukuange fakalāngilangi ai ʻa ʻEletā Kālosi H. ʻĀmato mo ʻEletā Uiliami R. Uoka mei he Kōlomu ʻUluaki ʻo e Kau Fitungofulú pea fokotuʻu kinaua ki he tuʻunga ko e taki māʻolunga mālōlō. Naʻe tukuange ʻa ʻEletā ʻĀliki V. Minasani mo ʻEletā Kavito Senikani mei he Fitungofulu Fakaʻēlia.

Ko e fuofua taimi ʻeni ʻi he konifelenisi lahí kiate kinautolu ʻoku ʻikai ko ʻenau lea fakafonuá ʻa e lea faka-Pilitāniá ke nau vahevahe ʻenau pōpoakí ʻi heʻenau lea tuʻufonuá. Ne lea ʻa ʻEletā Sī Hongi (Samu) Uongi ʻi he lea faka-Kenitoní, ʻEletā ʻEtuato Kavaleti mo ʻEletā Hiulo E. Mātinesi ʻi he lea faka-Sipeiní, pea mo ʻEletā Kālosi A. Kōtoi ʻi he lea faka-Potukalí.

Naʻe fakafonu ʻe he kakaí ʻa e sea ʻe 21,000 ʻi he Senitā Konifelenisí pea fonu mo ha ngaahi feituʻu ʻi he Temipale Sikueá ʻi Sōleki Siti, ʻIutā, USA, ʻi he fakatahaʻanga konifelenisi takitaha, ʻa ia naʻe liliu ki ha lea fakafonua ʻe 90 tupu, pea fakamafola ki ha ngaahi fonua ʻe 170 tupu. Ko e tahá, naʻe lava ke maʻu ʻa e ngaahi fakatahá ʻi he televīsoné, letioó, fakamafola ʻi he satelaité , mo e ʻinitanetí, kau ai mo e ngaahi device toʻotoʻó. ʻOku fakaʻilongaʻi ʻe he konifelenisí ni ʻa e taʻu ʻe 90 hono fakamafola fakaletioó kae pehē ki he taʻu ʻe 65 ʻo hono fakamafola televīsone ʻo e konifelenisí.

Ko e lea ʻa Palesiteni Thomas S. Monson ʻi he fakataha hoʻatā Sāpate ʻo e konifelenisi lahí.