Ang Pagbaton sang Panaksihon sang Kasanag kag Kamatuoran
Ang inyo personal nga panaksihon sang kasanag kag kamatuoran indi lamang magabugay sa inyo kag sa inyo kaliwatan diri sa kalibutan, kundi magaupod ini sa inyo sa bug-os nga wala’y katapusan.
Bilang isa ka piloto, nakabiyahe na ako sing madamo nga inoras patabok sa mga kontinente kag kadagatan sa tion sang kadulom sang kagab-ihon. Ang pagtan-aw sang langit sa gab-i sa gwa sang akon bintana sa eroplano, labi na gid ang Milky Way, masami nga nagapahalawhaw sa akon sang kalaparon kag kadalumon sang mga gintuga sang Dios—nga ginalaragway sang balaan nga mga kasulatan nga “mga kalibutan nga indi maisip.”1
Wala pa mag-isa ka siglo ang nagligad sang ang kalabanan sang mga astronomer ang naghaum-haom nga ang aton galaxy nga Milky Way amo lamang ang nagaisahanon nga galaxy sa bug-os nga uniberso.2 Nagdumdom sila nga ang tanan sa gwa sang aton galaxy isa lamang ka malapad nga kawalan, isa ka wala’y katapusan nga espasyo—bakante, matugnaw, kag wala sing mga bituon, kasanag, kag kabuhi.
Sang nangin mas sopistikado na ang mga teleskopyo—lakip na ang mga teleskopyo nga sarang ipadala sa kahawaan—ang mga astronomers nagsugod sa paghangop sang isa ka matahum, halos mabudlay intiendihon nga kamatuoran: ang uniberso mas dako gali kaayo sangsa ginapatihan sang bisan sin-o sadto, kag nga ang kalangitan napun-an sang indi maisip nga mga galaxy, ang tagsa nagaunod sang ginatos ka binilyon ka mga bituon.3
Sa malip-ot lamang nga tion, ang aton paghangop parte sa uniberso himpit nga nagbaylo.
Sa karon sarang naton makita ang pila sining malayo nga mga galaxy.4
Nakahibalo kita nga yara sila dira.
Yara na sila dira sa sulod sang malawig na kaayo nga panahon.
Apang antes makaangkon ang katawhan sang mga instrumento nga may igo nga kabaskog agud tipunon ang selestiyal nga kasanag para makita ining mga galaxy, wala kita magpati nga posible gali ini.
Ang kalaparon sang uniberso wala gulpi magliwat, pero ang aton ikasarang nga makakita kag makahangop sining kamatuoran nagbaylo gid sing dako. Kag kaupod inang mas dako nga kasanag, ang katawhan nagsugod nga makakita sang matahum kaayo nga mga talan-awon nga wala gid sadto ginahunahuna.
Mabudlay para sa Aton nga Magpati Sinang Indi Naton Makita
Ibutang ta nga nakabiyahe kamo pabalik sa kahapon kag nakigsugilanon sa mga tawo nga nagkabuhi isa ka libo ukon isa ka gatos ka tuig ang nagligad. Hunahunaa ang pagtinguha nga ilaragway sa ila ang pila ka moderno nga mga teknolohiya nga ginapasipakpakan naton sa karon nga panahon. Halimbawa, ano ayhan ang pamensaron sining mga tawo parte sa aton kon sugiran naton sila parte sa mga jumbo jets, microwave ovens, mga ginauyatan nga gamit nga nagaunod sang madamo kaayo nga digital nga mga library, kag mga video sang aton mga apo nga ginapaambit naton gilayon sa minilyon ka mga tawo sa bug-os nga kalibutan?
Basi may pila man nga magpati sa aton. Ang kalabanan magayaguta, magapamatok, ukon basi gani magpahipos ukon maghalit sa aton. Ang pila mahimo nga magtinguha sa paggamit sa logika, pagpangatarungan, kag mga ebidensya nga nahibal-an nila agud ipakita nga naintoan kita, buang-buang, ukon basi gani makatalagam. Mahimo nga akusaron nila kita sa pagtinguha sa pagpatalang sa iban.
Pero siyempre, nagsala gid lamang ini sila. Mahimo nga maayo man ang ila tinutuyo kag sinsero. Mahimo nga positibo man ang ila pamatyagan sang ila opinyon. Apang indi lang gid sila makakita sing maathag tungod wala pa nila mabaton ang mas kompleto nga kasanag sang kamatuoran.
Ang Pangako sang Kasanag
Daw isa ka kinaiya sang katawhan ang maglaum nga husto kita bisan sala kita. Kag kon amo sina ang sitwasyon, ano nga paglaum ang may yara para sa bisan sin-o sa aton? Kapalaran bala naton nga magpaanud-anod sa tunga sang dagat sang nagasumpakilay nga impormasyon, nga nahunong sa balsa nga gin-angot-angot naton gikan sa aton mga opinyon?
Imposible bala nga makita ang kamatuoran?
Ang katuyuan sang akon ginahambal amo ang ipahibalo ang masadya nga mensahe nga ang Dios Mismo—ang Ginuo sang mga Kasuldadohan nga nakahibalo sang tanan nga kamatuoran—naghatag sa Iya mga anak sang pangako nga sarang nila hibal-on ang kamatuoran para sa ila kaugalingon.
Palihog binagbinaga ang kasangkaron sang sini nga saad;
Ang Nagapadayon kag Gamhanan nga Dios, ang Tagtuga sining indi matungkad nga uniberso, magahambal sa ila nga nagapalapit sa Iya nga may sinsero nga tagipusuon kag tunay nga katuyuan.
Magahambal Sia sa ila sa mga damgo, mga palanan-awon, mga hunahuna, kag mga balatyagon.
Magahambal Sia sa paagi nga indi gid masal-an kag masobra pa sangsa tawhanon nga eksperiyensya. Hatagan Niya sila sang diosnon nga giya kag mga sabat para sa ila personal nga mga kabuhi.
Siyempre, may yara gid sinang magayaguta kag maghambal nga ining butang imposible, nga kon may Dios gid man, mas madamo pa Sia nga mas maayo himuon sangsa magpamati kag magsabat sa pangamuyo sang isa ka tawo.
Pero ginasiling ko ini sa inyo: nagaulikid ang Dios sa inyo. Magapamati Sia, kag magasabat Sia sa inyo personal nga mga pamangkot. Ang mga sabat sa inyo mga pangamuyo magaabot sa Iya kaugalingon nga paagi kag sa Iya kaugalingon nga tion, kag gani, kinahanglan ninyo nga pamatian ang Iya tingug. Gusto sang Dios nga makita ninyo ang alagyan pabalik sa Iya, kag ang Manluluwas amo ang alagyan.5 Luyag sang Dios nga magtuon kamo parte sa Iya Anak, nga si Jesucristo, kag angkunon ang dako nga paghidaet kag kalipay nga nagaabot gikan sa pagsunod sang banas sang diosnon nga pagkadisipulo.
Mahal kong mga abyan, yari ang isa ka direkta nga eksperimento, nga may garantiya gikan sa Dios, nga makita sa libro sang dumaan nga kasulatan nga gintanyag sa tagsa ka lalaki, babayi, kag bata nga handa nga magtilaw sini:
Una, kinahanglan ninyo nga tun-an ang pulong sang Dios. Buot silingon sina amo ang pagbasa sang balaan nga mga kasulatan kag pagtuon sang mga pulong sang dumaan subong man sang moderno nga mga propeta parte sa ginpanumbalik nga ebanghelyo ni Jesucristo—indi sa tuyo nga dudahan ukon pakalainon kundi nga may sinsero nga kaluyag nga diskubrehon ang kamatuoran. Binagbinaga ang mga butang ng inyo mabatyagan, kag ihanda ang inyo mga hunahuna nga batunon ang kamatuoran.6 “Bisan pa kon indi na kamo maglabaw sangsa maghandum sa pagpati … nga mahatagan ninyo sing duog ang [pulong sang Dios].”7
Ika-duha, kinahanglan ninyo nga pamensaron, binagbinagon, tinguhaan sing maisog nga magtuo,8 kag mangin mapinasalamaton sa kamaluluy-on sang Ginuo sa Iya mga anak gikan sa tiyempo ni Adan tubtob sa aton panahon agud magpahamtang sang mga propeta, mga manugtulok, kag mga manugbugna nga magpanguna sa Iya Simbahan kag buligan kita sa pagbalik sa Iya..
Ikatlo, kinahanglan ninyo mamangkot sa Amay nga Langitnon, sa ngalan ni Jesucristo, agud ipakita sa inyo ang kamatuoran sang Ang Simbahan ni Jesucristo sang mga Santos sa Ulihing mga Adlaw. Magpamangkot nga may bunayag nga tagipusuon kag matuod-tuod nga tinutuyo, nga may pagtuo kay Cristo.9
May yara man sang ikaapat nga tikang, nga ginhatag sa aton sang Manluluwas: “Kon bisan sin-ong tawo buot maghimo sang kabubut-on [sang Dios], makahibalo sia kon ang pagtulun-an gikan sa Dios ukon nagpamulong ako sa akon kaugalingon.”10 Buot silingon, kon luyag ninyo nga pamatud-an ang kamatuoran sang mga prinsipyo sang ebanghelyo, kinahanglan gid anay nga ipangabuhi ninyo ini. Tilawi ang mga doktrina sang ebanghelyo kag mga pinanudlo sa Simbahan sa inyo mismo nga kabuhi. Himoa ini nga may matuod-tuod nga tinutuyo kag nagapadayon nga pagtuo sa Dios.
Kon himuon ninyo ining mga butang, may pangako kamo gikan sa Dios—nga nagatindog sa Iya pulong11—nga ipakita Niya sa inyo ang kamatuoran paagi sa gahum sang Balaan nga Espiritu.. Hatagan Niya kamo sang mas dako nga kasanag nga magatugot sa inyo nga makakita sa kadulom kag magsaksi sang mahimayaon kaayo nga mga talan-awon nga indi makita sang tawhanon nga panulok.
May pila nga mahimo magsiling nga ining mga tikang mabudlay kaayo ukon indi takos sa kabudlay. Apang ginapanugyan ko nga ining personal nga panaksihon sang ebanghelyo kag sang Simbahan amo ang pinakaimportante nga butang nga maagom ninyo sa sini nga kabuhi. Indi lamang kamo sini bugayan kag giyahan sa sining kinabuhi, kundi may direkta man ini nga importansya sa inyo kabuhi sa bug-os nga katubtuban.
Ang mga Butang sang Espiritu Sarang Lamang Mahangpan paagi sa Espiritu
Ang mga siyentipiko nabudlayan nga intiendihon ang kasangkaron sang uniberso tubtob nangin binag-o ang mga instrumento nga makatipon sang mas dako-dako nga kasanag agud mahangpan ang mas kompleto nga kamatuoran.
Si Apostoles Pablo nagtudlo sang kapareho nga prinsipyo nahanungod sa espirituhanon nga ihibalo. “Ang tawong di-espirituhanon wala nagabaton sang mga hiyas sang Espiritu sang Dios,” ginsulat niya sa mga taga-Corinto, “kay kabuangan sila sa iya, kag indi sia makahangop sa ila bangud nga ginatalupangod sila sa espirituhanon nga bagay.”12
Ang buot silingon, kon gusto ninyo nga makilala ang espirituhanon nga kamatuoran, dapat ninyo gamiton ang husto nga mga instrumento. Indi ninyo mahangpan ang espirituhanon nga kamatuoran gamit ang mga instrumento nga indi makakilala sini.
Ang Manluluwas naghambal sa aton sa aton nga panahon, “Ang butang nga iya sang Dios masanag; kag ang nagabaton sang kasanag, kag nagapadayon sa Dios, nagabaton sing dugang nga kasanag; kag inang kasanag nagadako nga nagadako tubtob sa himpit nga adlaw.”13
Kon mas ginapauyon naton ang aton mga tagipusuon kag mga kaisipan pakadto sa Dios, mas nagalikop ang diosnon nga kasanag sa aton mga kalag. Kag sa tagsa ka tion nga halog sa buot kag hanuot kita nga nagapangita sinang kasanag, ginapakita naton sa Dios ang aton kahanda sa pagbaton sang mas dako nga kasanag. Sing amat-amat, ang mga butang nga sadto daw buron, madulom, kag malayo mangin matin-aw, masanag, kag pamilyar sa aton.
Sa amo man, kon ilayo naton ang aton mga kaugalingon sa kasanag sang ebanghelyo, ang aton mismo nga kasanag magsugod sa pagdulom—indi sa sulod sang isa ka adlaw ukon isa ka semana pero amat-amat sa kadugayan—tubtob nga magbalikid kita kag indi na naton mahangpan kon ngaa nagpati kita sadto nga matuod ang ebanghelyo. Ang aton ihibalo sang una mahimo nga daw binuang na para sa aton tungod ang tuman kaathag sadto mangin buron, buaw, kag malayo na sa liwat.
Amo ini kon ngaa ginainsister gid ni Pablo nga ang mensahe sang ebanghelyo kabuangan para sa ila nga nagakawala, “apang sa [ila nga] ginaluwas ini gahum sang Dios.”14
Wala sing Pagtilaw sang Kapuraw
Ang Simbahan ni Jesucristo sang mga Santos sa Ulihing mga Adlaw isa ka lugar para sa mga tawo nga may nagkalain-lain nga mga panaksihon. May pila ka mga miyembro sang Simbahan nga ang panaksihon pat-od kag nagadabdab sing masingkal sa sulod nila. Ang iban nagatinguha pa nga hibaluon sa ila kaugalingon. Ang Simbahan isa ka puluy-an para sa tanan agud tipunan, bisan ano pa man ang kadalumon ukon kataason sang aton panaksihon. Wala gid ako sing nahibal-an nga paskil sa mga puwertahan sang aton mga simbahan nga nagasiling, “Kinahanglan nga amo sini kataas ang imo panaksihon para makasulod.”
Ang Simbahan indi lamang para sa perpekto nga mga tawo, kundi para ini sa tanan nga “magkari kay Cristo, kag magmangin himpit sa iya.”15 Ang Simbahan para sa mga tawo nga pareho ninyo kag nakon. Ang Simbahan isa ka duog sang pag-abiabi kag pagbatiti, indi sang pagseparar ukon pagpanaway. Isa ini ka lugar kon sa diin nagadab-ot kita agud magpaisog, magbayaw, kag magtib-ong sa kada isa samtang ginahimo naton ang aton indibidwal nga pagpangita sang diosnon nga kamatuoran.
Kon pamensaron gid, kita tanan mga biyahero nga nagapangita sang kasanag sang Dios samtang nagapanglakaton sa banas sang pagkadisipulo. Wala naton ginahusgaran ang iban sa kadakuon sang kasanag nga mahimo ukon indi nila mahatag; kundi, ginasagod kag ginapadasig ang tanan nga kasanag tubtob magdako ini nga maathag, masanag, kag matuod.
Isa ka Saad para sa Tanan
Kilalahon naton nga sa masami ang pag-angkon sang panaksihon indi makuha sa isa ka minuto, isa ka oras, ukon isa ka adlaw. Indi lang sing makaisa kag tapos na dayon. Ang proseso nga pagtipon sang espirituhanon nga kasanag isa ka lalab-uton nga bug-os-kabuhi.
Ang inyo panaksihon parte sa buhi nga Anak sang Dios kag sa ginpanumbalik nga Simbahan, Ang Simbahan ni Jesucristo sang mga Santos sa Ulihing mga Adlaw, mahimo nga indi dayon mag-abot suno sa gusto ninyo, pero ginapangako ko ini sa inyo: kon himuon ninyo ang inyo bahin, magaabot ini,
Kag mangin mahimayaon ini.
Ginatanyag ko ang akon personal nga pamatuod nga ang espirituhanon nga kamatuoran magapuno sang inyo tagipusuon kag magadala sang kasanag sa inyo espiritu. Ipakita sini sa inyo ang puraw nga kaalam upod ang manami nga kalipay kag langitnon nga paghidaet. Naeksperiyensyahan ko na ini sa akon kaugalingon paagi sa gahum sang Balaan nga Espiritu.
Kasubong sa ginsaad sa dumaan nga balaan nga kasulatan, ang indi malaragway nga presensya sang Espiritu sang Dios magatuga sa inyo nga magkanta sang ambahanon sang nagatubos nga gugma,16 magbayaw sang inyo mga mata sa langit, kag magsinggit sa pagdayaw sa Labing Mataas nga Dios, ang inyo Palasilungan, ang inyo Paglaum, ang inyo Tagpangapin, ang inyo Amay. Ang Manluluwas nagsaad nga kon pangitaon ninyo, makita ninyo.17
Nagasaksi ako nga ini matuod. Kon pangitaon ninyo ang kamatuoran sang Dios, nga inang sa karon daw madulom, buron, kag malayo amat-amat nga ipahayag kag mangin klaro kag mangin malapit sa inyo tagipusuon paagi sa kasanag sang grasya sang Dios. Matahum kaayo nga espirituhanon nga mga talan-awon, nga indi mahunahuna sang tawhanon nga mata, ang ipakita sa inyo.
Panaksihon ko nga ang ining espirituhanon nga kasanag malab-ot gid sang tagsa ka anak sang Dios. Pagapasanagon sini ang inyo kaisipan kag magadala sang pagpaayo sa inyo tagipusuon kag kalipay sa inyo kabuhi. Mahal kong mga kauturan, palihog indi pagpadugayi ang pagpangita kag pagpabakod sang inyo personal nga panaksihon parte sa langitnon nga hilikuton sang Dios, nga amo ang hilikuton sang kasanag kag kamatuoran.
Ang inyo personal nga panaksihon parte sa kasanag kag kamatuoran indi lamang magabugay sa inyo kag sa inyo kaliwatan diri sa kalibutan kundi magaupod man ini sa inyo sa bug-os nga wala’y katapusan, sa tunga sang mga kalibutan nga wala’y katapusan. Ini ginasaksi ko kag ginabilin ko sa inyo ang akon bendisyon sa ngalan ni Jesucristo, amen.
© 2014 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/14. Petsa sang pagtugot sa paglubad: 6/14. Paglubad sang Visiting Teaching Message, November 2014. Hiligaynon. 10871 861