Tapana ang Banas sang Imo mga Tiil

Ni Pangulong Thomas S. Monson

Kon kita nagatulok kay Jesucristo bilang aton Halimbawa kag samtang nagasunod kita sa Iya mga tikang, sarang kita makabalik sing hilway sa aton Langitnon nga Amay.

Mga pinalangga kong kauturan, mapainubuson ako nga nagatindog sa inyo atubang sini nga aga. Nagapangabay ako sang inyo pagtuo kag mga pangamuyo para sa akon samtang ginapaambit ko sa inyo ang akon mensahe.

Tanan kita nag-umpisa sang isa ka matahum kag kinahanglanon nga pagpanglakaton sang ginbayaan naton ang kalibutan sang mga espiritu kag nagsulod sa sining masami-nga-makahalangkat nga kahimtangan nga ginatawag mortalidad. Ang mayor nga mga katuyuan sang aton pagkatawo sa kalibutan amo ang mag-angkon sang lawas sang unod kag tul-an, makabaton sang eksperiyensya nga nagagikan lamang sa paghamulag gikan sa aton langitnon nga mga ginikanan, kag agud tan-awon kon pagasundon naton ang mga kasuguan. Sa libro ni Abraham kapitulo 3 mabasahan naton: “Kag pagatilawan naton sila, agud makita kon himuon nila ang tanan nga butang nga isugo sang ila Ginuong Dios sa ila.”¹

Sang magkari kita sa duta, dala naton ang isa ka dako nga regalo gikan sa Dios—ang aton kahilwayan sa pagpili. Sa linibo ka paagi may pribelihiyo kita sa pagpili para sa aton kaugalingon. Diri sarang kita magtuon gikan sa mabudlay nga agalon sang eksperiyensya. Ginahibalo naton ang maayo kag malain. Ginakilala naton kon diin ang mapait kag ang matam-is. Natun-an naton nga ang mga desisyon nagadikta sang kapalaran.

Napat-od ko nga nagbiya kita sa aton Amay nga may nagapalanglapaw nga handom nga magbalik sa Iya, agud mabaton naton ang pangkahitaasan nga ginplano Niya para sa aton nga amo man ang gusto naton para sa aton kaugalingon. Bisan pa nga kita dapat ang magpangita kag magsunod sinang banas nga magadala sa aton pabalik sa aton Amay sa Langit, wala Niya kita ginpadala diri nga wala sing direksyon kag giya. Kundi, ginhatagan Niya kita sang kasangkapan nga kinahanglanon naton, kag buligan Niya kita kon pangayuon naton ang Iya bulig kag tinguhaan nga himuon ang tanan naton nga masarangan sa pagpadayon tubtob sa katapusan kag mag-agom sang kabuhi nga wala’y katapusan.

Agud magiyahan kita may yara kita sang mga pulong sang Dios kag sang Iya Anak nga makita sa aton balaan nga mga kasulatan. May yara kita sang mga laygay kag pinanudlo sang mga propeta sang Dios. Kag pinakaimportante, ginpahamtangan kita sang perpekto nga halimbawa agud sundon—ang halimbawa sang aton Ginuo kag Manluluwas, si Jesucristo—kag gintulinan kita nga sundon ina nga halimbawa. Ang Manluluwas mismo nagsiling: “Kari, magsunod sa akon.”² “Ang mga buluhaton nga inyo nakita nga ginahimo ko, ina amo man ang inyo himuon.”³ Ginsambit Niya ining pamangkot, “Ano nga sari sang mga tawo kamo mangin dapat?” Kag dayon Sia nagsabat, “Sa pagkamatuod ginasiling ko sa inyo, bisan subong man sa akon.”⁴ “Ginmarkahan niya ang banas kag nag-una sa alagyan.”⁵

Kon kita nagatulok kay Jesucristo bilang aton Halimbawa kag samtang nagasunod kita sa Iya mga tikang, makabalik kita nga hilway sa aton Langitnon nga Amay agud magpuyo upod sa Iya sa katubtuban. Siling sang propeta nga si Nefi, “Luwas kon ang isa ka tawo magapadayon tubtob sa katapusan, sa pagsunod sang halimbawa sang Anak sang buhi nga Dios, indi sia maluwas.”⁶

Isa ka babayi, tagsa ka tion nga magsugid parte sa iya mga eksperiyensya sang magbisita sa Balaan nga Duta, nagasiling, “Naglakat ako sa ginlaktan ni Jesus!”

Nagkadto sia sa duog kon sa diin nagpangabuhi kag nagpanudlo si Jesus. Siguro nagtindog sia sa bato nga gintindugan ni Jesus ukon nagtulok sa kabukiran nga gintulok Niya sadto. Ining mga eksperiyensya, bisan ini lamang, nangin makakulunyag na para sa iya; apang ang pisikal nga maglakat kon sa diin naglakat si Jesus indi masyado kaimportante sangsa maglakat kasubong nga Sia naglakat. Ang pag-ilog ang Iya mga binuhatan kag pagsunod sang Iya halimbawa mas importante sangsa pagsubay sang nabilin sa mga banas nga Iya ginlaktan sa kabuhi.

Sang gintanyag ni Jesus ang pangagda sa isa ka manggaranon nga tawo, “Kari, magsunod sa akon,”⁷ wala Sia magtumod nga sundon Sia sang manggaranon nga tawo pasaka-panaog sa mga bungyod kag mga nalupyakan sa ila lugar.

Indi naton kinahanglan maglakat sa mga baybayon sang Galilea ukon sa mga kabukiran sang Judea kon sa diin naglakat si Jesus. Tanan kita sarang maglakat sa banas nga Iya ginlaktan kon, upod ang Iya mga pulong sa aton mga dulunggan, ang Iya Espiritu nga nagapuno sa aton mga tagipusuon, kag ang Iya mga pinanudlo nga nagagiya sa aton pangabuhi, pilion naton nga sundon Sia samtang nagapanglakaton kita sa kabuhi. Ang Iya halimbawa nagapasanag sa alagyan. Siling Niya, “Ako amo ang dalan, kag ang kamatuoran, kag ang kabuhi.”⁸

Kon aton tun-an ang banas nga ginlaktan ni Jesus, makita naton nga gin-agyan man Niya ang madamo sa amo man nga mga hangkat nga pagaatubangon naton sa kabuhi.

Halimbawa, ginlakat ni Jesus ang banas sang kapaslawan. Bisan pa nga nag-eksperiyensya Sia sang madamo nga mga kapaslawan, ang isa sa pinakamakatalandog makita sa Iya pagtangis para sa Jerusalem sang Iya gintakop ang Iya pag-alagad sa publiko. Ang mga anak sang Israel nagsikway sang proteksyon nga Iya gintanyag sa ila. Samtang nagatulok Sia sa siyudad nga malapit na itugyan sa kalaglagan, napun-an Sia sing mga balatyagon sang tuman nga kasubo. Sa kalisod nagtuaw Sia, “O Jerusalem, Jerusalem, nga nagapatay sang mga manalagna kag nagabato sang mga ginpadala sa imo! Makapila kuntani nga buot ko tipunon ang imo mga anak subong sang munga nga nagatipon sang iya mga piso sa idalom sang iya mga pakpak, kag indi ka buot!”⁹

Ginlakat ni Jesus ang banas sang pagsulay. Si Lucifer, inang yawa, nga nagtipon sang iya pinakadako nga kusog, sang iya pinakamakagalanyat nga pagpang-ilad, nagtentar sa Iya nga nagpuasa sing 40 ka adlaw kag 40 ka gab-i. Wala mag-ampo si Jesus; kundi, ginpakigbatuan Niya ang tagsa ka pagsulay. Ang iya hingapusan nga mga pulong: “Palayo ka, Satanas!”¹⁰

Ginlakat ni Jesus ang banas sang kasakit. Panumduma ang Getsemani, kon sa diin yara Sia “sa kasakit … kag ang iya balhas nanginkaangay sang dalagkong tinulo sang dugo nga nagatupa sa duta.”¹¹ Kag wala gid sing malipat sang Iya pag-antos sa mapintas nga krus.

Ang tagsa sa aton magalakat sa banas sang kapaslawan, ayhan tungod sa isa ka nadula nga oportunidad, isa ka gahum nga wala gingamit sing husto, mga pagpili sang isa ka pinalangga, ukon sang mga pagpili nga aton mismo ginahimo. Ang banas sang pagsulay mangin banas man sang kada isa. Mabasahan naton sa ika-29 nga seksyon sang Doctrine and Covenants: “Kag kinahanglan gid nga ang yawa magsulay sang mga anak sang tawo, kay kon indi indi sila mangin mga manugdumala sang ila mga kaugalingon.”¹²

Kita man magalakat sa banas sang kasakit. Kita, bilang mga alagad, makapaabot sing indi magsobra sangsa Agalon, nga nagbiya sa kalibutan matapos lamang ang grabe nga kasakit kag pag-antos.

Samtang makasalapo kita sa aton banas sang mapait nga kasubo, makasalapo man kita sang dako nga kalipayan.

Kita, kaupod si Jesus, sarang maglakat sa banas sang pagkamatinumanon. Indi ini pirme mangin mahapos, pero himuon naton nga gabay nga mga pulong ang ginpapanubli sa aton ni Samuel: “Yari karon, ang pagtuman maayo pa sang sa halad, kag ang pagpamati sang sa sapay sang mga carnero.”¹³ Panumdumon naton nga ang resulta sang pagka-dimatinumanon amo ang pagkabihag kag kamatayon, samtang ang padya para sa pagkamatinumanon amo ang kahilwayan kag wala’y katapusan nga kabuhi.

Kita, pareho kay Jesus, sarang maglakat sa banas sang pag-alagad. Kasubong sang isa ka masanag nga suga sang kaayo amo ang kabuhi ni Jesus sang Sia nag-alagad sa tunga sang katawhan. Naghatag Sia sing kusog sa mga tiil sang lupog, panulok sa mga mata sang bulag, palamatin-an sa mga dulunggan sang bungol.

Si Jesus naglakat sa banas sang pangamuyo. Gintudloan Niya kita kon paano magpangamuyo paagi sa paghatag sang matahum nga pangamuyo nga ginakilala naton bilang ang Pangamuyo sang Ginuo. Kag sin-o bala ang malipat sa Iya pangamuyo sa Getsemani, “Indi ang akon kabubut-on, kundi ang imo, paghimuon”?¹⁴

Iban pa nga mga panulin nga ginhatag sa aton sang Manluluwas yara lamang sa punta sang aton mga tudlo, makita sa balaan nga mga kasulatan. Sa Iya Wali sa Bukid, ginasilingan Niya kita nga mangin maluluy-on, mangin mapainubuson, mangin matarong, mangin putli sa tagipusuon, mangin mga makigdaeton. Ginatulinan Niya kita nga tindugan sing maisog ang aton mga ginatuohan, bisan pa nga ginainsulto kag ginapigos kita. Ginapangabay Niya kita nga pasigahon ang aton mga kasanag agud makita sang iban kag makaangkon sing kaluyag nga himayaon ang aton Amay sa Langit. Ginatudloan Niya kita nga mangin matinlo sa aton panghunahuna kag sa aton mga binuhatan. Ginasilingan Niya kita nga labing importante ang magtipon sang mga manggad sa langit sang sa duta.¹⁵

Ang Iya mga paanggid nagatudlo nga may gahum kag awtoridad. Sa istorya sang maayo nga Samariahanon, ginatudloan Niya kita nga magpalangga kag mag-alagad sa aton mga kasilingan.¹⁶ Sa Iya paanggid nahanungod sa mga talanton, ginatudloan Niya kita nga pauswagon ang aton mga kaugalingon kag lab-uton ang kahimpitan.¹⁷ Sa paanggid nahanungod sa nadula nga carnero, ginatulinan Niya kita nga salbaron yadtong mga nagbiya sa banas kag nagtalalang.¹⁸

Samtang ginatinguhaan naton nga ibutang si Cristo sa sentro sang aton mga kabuhi paagi sa pagtuon sang Iya mga pulong, paagi sa pagsunod sang Iya mga pinanudlo, kag paagi sa paglakat sa Iya banas, ginpangako Niya nga ipaambit sa aton ang wala’y katapusan nga kabuhi nga iya ginpanginmatyan nga maangkon. Wala na sing mas mataas pa nga katuyuan sangsa sini, nga dapat naton pilion nga batunon ang Iya disiplina kag mangin Iya mga disipulo kag himuon ang Iya buluhaton sa bug-os naton nga kinabuhi. Wala na sing iban pa, wala na sing bisan ano nga pagpili, ang makahimo sa aton pareho sang iya masarangan.

Sa akon pagpanumdom sadtong mga tunay nga nagtinguha nga sundon ang halimbawa sang Manluluwas kag sang mga naglakat sa Iya banas, nagasulod gilayon sa akon pamensaron ang mga ngalan nanday Gustav kag Margarete Wacker—duha sa pinaka-Cristohanon nga mga tawo nga akon nakilala. Sila tumandok nga mga Aleman nga nagsalhin sa nasidlangan nga Canada, kag nakilala ko sila samtang nagaalagad ako didto bilang mission president. Si Brother Wacker nagatrabaho bilang isa ka barbero. Bisan pa nga ang ila kita limitado, ginpaambit nila ang tanan nga yara sa ila. Wala sila ginbugayan sing mga kabataan, pero gin-atipan nila ang tanan nga nagasulod sa ila puluy-an. Ang maalam kag sopistikado nga mga lalaki kag babayi nagapakigkita gid sa sining mapainubuson, wala sing tinapusan nga mga alagad sang Dios kag nagkabig sang ila mga kaugalingon nga maswerte kon makahinguyang sing isa ka oras upod sa ila.

Ordinaryo lamang ang ila panghitsurahon, ang ila Iningles naga-utol-utol kag daw mabudlay intiendihon, ang ila puluy-an simple kaayo. Wala sila sing salakyan ukon telebisyon, ukon nagahimo sang bisan ano nga butang nga masami ginatalupangod sang kalibutan. Apang ang mga matinuohon nagasubay sang banas padulong sa ila puluy-an agud mag-ambit sang pamatyagon nga yara didto. Ang ila puluy-an isa ka langit diri sa duta, kag ang espiritu nga ila ginapaambit isa nga may puraw nga paghidaet kag kaayo.

Kita man sarang makaangkon sinang espiritu kag magpaambit sini sa kalibutan samtang nagalakat kita sa banas sang aton Manluluwas kag nagasunod sang Iya perpekto nga halimbawa.

Mabasa naton sa Mga Hulubaton ang paandam, “Tapana ang banas sang imo mga tiil.”¹⁹ Kon himuon naton ini, maangkon naton ang pagtuo, bisan pa ang kaluyag, nga maglakat sa banas nga ginlaktan ni Jesus. Indi kita magaduhaduha nga yara kita sa banas nga gusto sang aton Amay nga aton sundon. Ang halimbawa sang Manluluwas nagapahamtang sang balayan sang tanan nga aton ginahimo, kag ang Iya mga pulong nagahatag sang wala nagapalya nga giya. Ang Iya banas magadala sa aton pauli nga hilway sa katalagman. Kabay nga ini mangin aton bugay, ginapangamuyo ko sa ngalan ni Jesucristo, nga akon ginapalangga, nga akon ginaalagaran, kag akon ginapanaksihon, amen.

© 2014 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/14. Petsa sang pagtugot sa paglubad: 6/14. Paglubad sang First Presidency Message, November 2014. Hiligaynon. 10871 861