Palanasem ti Pagnaan Dagita Saksakam
No kitaentayo ni Jesus kas Pagwadantayo ken no surotentayo dagiti tugotna, makapagsublitayo a sitatalged iti Nailangitan nga Amatayo.
Ay-ayatek a kakabsatko, napakumbabaak bayat ti panagtakderko iti sanguananyo ita a bigat. Dawatek ti pammati ken kararagyo para kaniak bayat ti panangibinglayko kadakayo ti mensahek.
Nangrugitay amin iti daytoy nakaskasdaaw ken napateg a panagbaniaga idi pumanawtayo iti lubong ti espiritu ket simrek iti daytoy masansan a mapannubok nga addang a maawagan iti mortalidad. Dagiti kangrunaan a panggep ti panagbiagtayo iti daga ket manggun-od iti bagi a nagtagilasag ken nagtagitulang, manggun-od iti padas nga umay laeng babaen ti pannakisina kadagiti nailangitan a nagannaktayo, ken mangkita no matungpaltayo met laeng dagiti bilin. Iti libro ni Abraham kapitulo 3 mabasatayo: “Ket ipaneknektayo kadakuada daytoy, ta kitaentayo no aramidenda amin a banag nga ibilin kadakuada ti Apo a Diosda.”1
Idi umaytayo ditoy daga, intugottayo dayta naindaklan a sagut manipud iti Dios—ti kinawayatayo nga agpili. Iti adu a wagas adda pribilehiotayo a pumili para iti bagbagitayo. Ditoy a makasursurotayo manipud kadagiti napapait a padas. Makailasintayo iti nasayaat ken dakes. Ammotayo ti paggidiatan ti napait ken nasam-it. Masursurotayo a dagiti desision ti mangikeddeng iti pagtungpalan.
Awan duaduak a pinanawantayo ti Amatayo nga addaan iti nasged a tarigagay nga agsubli Kenkuana, tapno makagun-odtayo iti pannakaitan-ok a planona para kadatayo ken tartarigagayantayo unay. Nupay nabatitayo tapno mangsapul ken mangsurot iti dayta a dalan a mangiturongto kadatayo nga agsubli iti Amatayo iti Langit, dinatayo imbaon ditoy nga awan pangiturong ken pangiwanwan. Ketdi, inikkannatayo kadagiti ramit a kasapulatayo, ket tulongannatayto no kiddawentayo ti tulongna ken ikarigatantayo nga aramiden ti amin a kabaelantayo nga agibtur agingga iti kanibusanan ken manggun-od iti agnanayon a biag.
Tapno makatulong a maiwanwantayo addaantayo kadagiti balikas ti Dios ken ti Anakna a masarakan kadagiti nasantuan a kasuratan. Addaantayo iti balakad ken pannursuro dagiti propeta ti Dios. Kangrunaan ti amin, naipaayantayo iti naan-anay a pagwadan a surotentayo—ti pagwadan ti Apotayo ken Mangisalakantayo, ni Jesucristo—ken nabilintayo a sumurot iti pagwadanna. Kinuna ti Mangisalakan a Mismo: “Umayka, surotennak.”2 “Dagiti banag a naimatanganyon nga inaramidko ti aramidenyonto met.”3 Sinaludsodna, “Ania a kita ti tao ti rumbeng a pagbalinanyo?” Ket insungbatna, “Pudno kunak kadakayo, kas kaniak.”4 “Tinandaannna ti dana ket inturongna ti dalan.”5
No kitaentayo ni Jesus kas Pagwadantayo ken no surotentayo dagiti tugotna, makapagsublitayo a sitatalged iti Nailangitan nga Amatayo tapno makipagnaed Kenkuana iti agnanayon. Kinuna ni propeta Nephi, “Malaksid no agibtur ti tao agingga iti panungpalan, a mangsurot iti pagwadan ti Anak ti sibibiag a Dios, saanto a maisalakan.”6
Maysa a babai, tunggal isalaysayna dagiti padasna bayat ti isasarungkarna iti Nasantuan a Daga, kinunana, “Nagnaak iti nagnaan ni Jesus!”
Nalibotnan ti lugar a nagnaedan ken nangisuruan ni Jesus. Nalabit a nagtakder iti rabaw ti dakkel a bato a nagtakderan idi ni Jesus wenno nakitanan ti kabanbantayan a minatmatan idi ni Jesus. Dagiti padas, a napasaranna, ket nangparagsak unay kenkuana; ngem ti pannagnana iti lugar a nagnaan idi ni Jesus ket saan a kas iti kapateg ti pannagna a kas iti pannagnana. Iti panangtuladna kadagiti tignay ni Jesus ken panangsurotna iti pagwadanna ket adayo a napatpateg ngem iti panangpadasna a mangsapul kadagiti tugot iti nagnaanna iti daytoy a biag.
Idi idiaya ni Jesus iti maysa a nabaknang a lalaki ti awis, “Umayka, surotennak,”7 saanna laeng a plano a sumurot Kenkuana ti nabaknang a lalaki nga umuli ken bumaba kadagiti turod ken tanap ti ballasiw a pagilian.
Saan a nasken a magnatayo kadagiti igid ti baybay ti Galilea wenno kadagiti turod ti Judea tapno magnatayo iti nagnaan ni Jesus. Makapagnatayo amin iti dalan a nagnaan ni Jesus no, dumdumngegtayo kadagiti balikasna, punpunnuen ti Espirituna ti puspusotayo, iwanwanwandatayo dagiti pannursurona, pilientayo ti sumurot Kenkuana bayat ti panangdaliasattayo iti daytoy a biag. Ti pagwadanna ti manglawag iti dalan. Kinunana, “Siak ti dalan, ti kinapudno, ken ti biag.”8
No amirisentayo ti dalan a napagnaan ni Jesus, makitatayo a napasaranna ti adu a pannubok a mapasarantayonto iti biag.
Kas pagarigan, napasaran ni Jesus ti dana ti pannakapaay. Nupay napasaranna ti adu a pannakapaay, maysa kadagiti makasagid unay rikna ket ti panagladingitna para iti Jerusalem idi igibusna ti panagministrona kadagiti tao. Saan nga inawat dagiti annak ti Israel ti talged ti pannalaknib nga indiayana kadakuada. Iti panangmatmatna iti siudad nga asidegen a madadael, nakarikna Isuna ti nalaus a panagliday. Iti panagladingitna inyararawna, “O Jerusalem, Jerusalem, a mangpappapatay kadagiti propeta, ken mangbatbato kadakuada a naibaon kenka; tinarigagayak nga ummongen a sangkamaysa dagiti annakmo, kas iti panangummong ti pamusian dagiti piekna iti uneg dagiti payakna, ket dimo inaramid!”9
Napadasan ni Jesus ti dana ti sulisog. Ni Lucifer, a dakes, a nangummong iti kadakkelan a pigsana, ti makagargari unay a kinaulbodna, nangsulisog Kenkuana a nagayuno iti 40 nga aldaw ken 40 a rabii. Saan a simmuko ni Jesus; ketdi, linabananna ti tunggal sulisog. Ti panggibus a saona, “Umadayoka, Satanas.”10
Napadasan ni Jesus ti dana ti pannakapasakit. Panunotenyo ti Getsemani, ti lugar a “nagtutuokanna unay… ket nagling-et iti kas la kadagiti tedted ti dara a nagtinnag iti daga.”11 Ken awan ti makalipat iti panagsagabana iti naulpit a krus.
Magnanto ti tunggal maysa kadatayo iti dana ti pannakapaay, nalabit a gapu iti napukaw a gundaway, naabuso a bileg, pangngeddeng dagiti ipatpateg, pangngeddeng a datayo mismo ti nagaramid. Ti dana ti sulisog ti agbalinto a dana ti tunggal maysa. Mabasatayo iti maika-29 a benneg ti Doktrina ken Katulagan: “Ket nasken unay a sulisogen ti sairo dagiti annak ti tattao, wenno saanda a makapagtignay iti bagbagida.”12
Kasta met a mapadasantayonto ti dana ti pannakapasakit. Datayo kas katulongan, makanamnamatayo iti ad-adu pay ngem iti Apo, a pimmanaw iti daytoy a biag laeng kalpasan ti nakaro a sakit ken panagsagaba.
Idinto a mapadasantayonto ti nalaus a panagladingit, mapadasantayo met ti nalaus a kinaragsak.
Datayo, a kaduatayo ni Jesus, ket makapagnatayo iti dana ti panagtulnog. Saanto a kanayon nga agbalin a nalaka daytoy, ngem agbalin koma ti pagsasao a tawid nga imbati ni Samuel: “Adtoy ti panagtulnog naim-imbag ngem iti panagsakripisio, ken panangipangag ngem iti kinalukmeg dagiti karkarnero a lallaki.”13 Laglagipentayo koma a ti bunga ti kinasukir ket pannakaadipen ken ipapatay, idinto a ti gunggona iti panagtulnog ket wayawaya ken agnanayon a biag.
Datayo, katulad ni Jesus, ket makapagnatayo iti dana ti panagserbi. Kas iti agrimrimat a silaw nga agsapsapul iti kinaimbag ti biag ni Jesus bayat ti panagserbina kadagiti tao. Pinapigsana dagiti saka ti pilay, insublina ti panagkita ti bulsek, ken ti panagdengngeg ti tuleng.
Napadasan ni Jesus ti dana ti panagkararag. Sinuruannatayo no kasano ti agkararag babaen ti pannangtedna kadatayo iti napintas a kararag nga ammotayo a ti Kararag ti Apo. Ket asino ti makalipat iti kararagna iti Getsemani, “Saan koma a maaramid ti pagayatak, no di ti pagayatam”?14
Dagiti dadduma pay a pammilin nga inted kadatayo ti Mangisalakan ket adda kadagiti ungto ti ramaytayo, a masarakan kadagiti nasantuan a kasuratan. Iti Sermonna iti Bantay, imbagana kadatayo nga agbalintayo a manangngaasi, napakumbaba, nalinteg, natarnaw iti panagpuspuso, ken mannakikappia. Binilinnatayo a situtured a mangitakder iti pammatitayo, uray no mauy-uyaw ken maidaddadanestayo. Indawatna kadatayo a parayrayentayo dagiti silawtayo tapno makita dagiti dadduma dagitoy ken maaddaanda iti tarigagay a mangitan-ok iti Amatayo iti Langit. Sinuruannatayo nga agbalin a nadalus iti dayaw iti agpada a panunot ken tignaytayo. Imbagana kadatayo a napatpateg nga amang ti mangidulin kadagiti gameng iti langit ngem iti daga.15
Dagiti pangngarigna ti mangisuro inga addaan bileg ken turay. Iti pakasaritaan ti naimbag a Samaritano, sinuruannatayo nga agayat ken agserbi kadagiti padatayo a tattao.16 Iti pangngarigna maipapan kadagiti talento, sinuruannatayo a mangpasayaat iti bagbagitayo ket mangikarigatan nga agbalin a perpekto17 iti pangngarig ti napukaw a karnero, binilinnatayo a mapan umarayat kadagiti pimmanawen iti dana ken nayaw-awanen iti dalanda.18
Iti panangikarigatantayo a mangikabil ken ni Cristo iti sentro ti biagtayo babaen ti panagsursuro kadagiti balikasna, panagsurot kadagiti pannursurona, ken babaen ti pannagna iti dalanna, inkarina kadatayo nga ibinglayna kadatayo ti agnanayon a biag a nangidatonanna iti biag tapno magun-od. Awan ti panggep a nangatngato pay ngem iti daytoy, a nasken a pilientayo nga awaten ti wagasna ket agbalintayo a disipulona ket aramidentayo ti aramidna iti unos ti panagbiagtayo. Awanen ti sabali pay a wagas, awan ti sabali a mapilitayo, nga ad-adda pay ngem iti maaramidna kadatayo.
Iti panangpanunotko kadagiti pudno a nangikarigatan a sumurot iti pagwadan ti Mangisalakan ken nakapagnan iti nagnaanna, dagus a mapanunotko ti nagan da Gustav ken Margarete Wacker—dua kadagiti addaan iti kangrunaan a kababalin ni Cristo a naam-ammokon. Isuda ket umili nga Aleman a nakiganggannaet iti akindaya a Canada, ket naam-ammok ida idi nagserbiak a kas mission president sadiay. Maysa a barbero ni Brother Wacker. Nupay bassit laeng ti pamataudanda, imbiglayda ti amin nga adda kadakuada. Saanda a naparaburan kadagiti annak, ngem inaywananda ti amin a sumrek iti pagtaenganda. Dagiti deadal a lallaki ken babbai ket sinapulda dagitoy nanumo, awan adalna a katulongan ti Dios ket imbilangda ti bagida a nagasatda no makabubosda uray maysa laeng nga oras a makadennada isuda.
Gagangay ti langada, agbeddalda nga agsao iti Ingles ken medio narigat a maawatan, bassit ti pagtaenganda. Awan kukuada a kotse wenno telebision, wenno saanda a nagaramid iti ania man kadagiti banag a gagangay a pakaawisan iti imatang ti lubong. Ngem masansan a sumarungkar kadakuada dagiti napudno tapno riknaenda ti espiritu nga adda sadiay. Ti pagtaenganda ket maysa a langit iti daga, ken ti espiritu a rumanraniag kadakuada ket natarnaw a kappia ken kinaimbag.
Mabalintayo met ti maaddaan iti dayta nga espiritu ket maibinglaytayo daytoy kadagiti tao bayat ti pannagnatayo iti dalan ti Mangisalakan ken panangsurottayo iti naan-anay a pagwadanna.
Mabasatayo iti Proverbio ti balakad, “Palanasem ti pagnaan dagita saksakam.”19 No aramidentayo, maaddaantayonto iti pammati, uray pay ti tarigagay, a magna iti dalan a nagnaan ni Jesus. Saantayto nga agduadua a ti dalan a pagpagnaantayo ket tartarigagayan ti Amatayo a surotentayo. Ti pagwadan ti Mangisalakan ti agserserbi a balangkas para iti amin a banag nga aramidentayo, ken dagiti balikasna ti manamnama a tarabay. Ti dalanna ti mangkibin kadatayo nga agawid. Daytoy koma ti agbalin a bendisiontayo, ikararagko iti nagan ni Jesucristo, nga ay-ayatek, a pagserserbiak, ken pampaneknekak, amen.
© 2014 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/14. Pannakaanamongna a maipatarus: 6/14. Pannakaipatarus ti First Presidency Message, November 2014. Ilokano. 10871 864