Mesaj Premye Prezidans lan, Janvye 2015
Suiv Pwofèt yo
Mwen te sèvi nan Lame Amerikèn nan nan fen Dezyèm Gè Mondyal la. Mwen sete yon maren, ran ki pi piti nan lame a. Apresa m te kalifye pou m te vin Maren Premye Klas, apre sa m te kalifye pou m te vin Kavalye Twazyèm Klas.
Dezyèm Gè Mondyal la te fini, epi m te resevwa relèv mwen. Men m te pran desizyon ke, si m ta janm gen pou retounen nan militè ankò, m te vle sèvi kòm dirijan militè. M te panse: “M pa vle sèvi nan kuizin ankò, ni lave pon bato ankò, si m ka evite sa.”
Lè m te fin relve a, mwen te antre nan Lame Naval Etazini an. M t al nan fòmasyon militè chak Lendi swa. M te etidye anpil pou m te ka kalifye akademikman. M te pase tout kalite egzamen imajinab: mantal, fizik, ak emosyonèl. Finalman, m te resevwa bèl nouvèl sa yo: “Yo aksepte ou pou w vin resevwa ran ofisye nan Lame Naval Etazini an.”
Mwen te jwayezman montre madanm mwen, Frances, lèt la, epi m te di: “M reyisi! M reyisi” Li te anbrase mwen epi l te di: “Ou te travay di pou w te pase.”
Epi, yon bagay te rive. Yo te aple m pou m te vin konseye nan episkopa pawas mwen an. Reyinyon konsèy evèk la sete menm jou swa avèk reyinyon fòmasyon militè m nan. M te konnen te gen yon konfli terib la a. M te konnen ke m pa t ap gen tan pou m te ranpli devwa m nan Lame Naval la ansanm ak devwa m nan episkopa a. Kisa pou m te fè? M te gen yon desizyon pou m te pran.
Mwen te priye sou sa. Epi apre, m t al jwenn mesye ki te prezidan pieu m nan lè m te ankò yon tigason an, Èldè Harold B. Lee (1899–1973), ki te nan Kolèj Douz Apot yo lè sa a. M te chita bò tab la anfas li. M te di l konbyen m te renmen pòs la nan lame a. Anfèt, m te montre l kopi lèt nominasyon m te resevwa a.
Apre l te fin panse sou sijè a brèfman, li te di mwen: “Men sa pou w fè, Frè Monson. W ap ekri Biwo Zafè Naval la pou w di yo ke, poutèt apèl ou resevwa kòm yon manm nan episkopa a, ou pa ka aksepte pozisyon sa a nan Lame Naval Etazini an.”
Kè m te brize. Li te ajoute: “Apresa ekri kòmandan Douzyèm Distri Naval la nan San Francisco epi di yo ke w ta renmen yo relve ou nan Lame a.”
Mwen te di: “Èldè Lee, ou pa konprann militè. Sètènman, y ap refize ban m nominasyon an si m refize aksepte li, men Distri Naval Douzyèm nan p ap relve mwen. Avèk yon lagè k ap devlope nan Kore a, mwen sèten ke y ap rele yon souzofisye pou l al patisipe. Si yo ta rele m, mwen ta pi renmen ale kòm ofisye, men m pap kapab si m pa aksepte nominasyon sa a. Èske w si se konsèy sa a ou vle m resevwa?”
Èldè Lee te pase men l sou zepòl mwen epi tankou yon papa k ap pale avèk pitit li, li te di: “Frè Monson, ou dwe gen plis lafwa. Militè se pa pou ou.”
M te retounen lakay mwen. M te mete nominasyon an ki te mouye ak dlo nan je m nan anvlòp li akonpaye pa lèt nominasyon an epi m te di yo m pa t ka aksepte li. Apresa m te ekri Douzyèm Distri Naval la yon lèt pou m te mande pou yo te relve m nan Lame Naval la.
Relèv mwen nan Lame Naval la te nan dènye gwoup relèv yo te fè anvan Lagè Kore a te eklate. Yo te rele tout gwoup militè ki te nan katye jeneral mwen yo. Sis semèn apre yo te fin aple m pou m te konseye nan episkopa a, yo te aple m kòm evèk nan pawas mwen an.
Mwen pa t ap gen pozisyon m genyen nan Legliz la jodia si m pa t suiv konsèy yon pwofèt, si m pa t priye sou desizyon sa a, si m pa t vin gen yon konesans sou yon verite enpòtan: sajès Bondye souvan parèt foli pou lèzòm.1 Men, pi gwo leson nou ka apran nan mòtalite a sèke, lè Bondye pale epi pitit li obeyi, y ap toujou gen rezon.
Yo konn di ke listwa depann sou ti desizyon, e sekonsa sa ye pou lavi nou tou. Desizyon detèmine destine. Men yo pa kite nou san èd pou nou pran dezisyon nou yo.
Si nou vle wè limyè syèl la, si nou vle santi enspirasyon Bondye Toupuisan an, si nou vle gen santiman sa a andedan kè nou ke Pè Selès la ap gide nou, enben, suiv pwofèt Bondye yo. Lè nou suiv pwofèt yo, n ap nan teritwa ki gen sekirite.
© 2015 pa Intellectual Reserve, Inc. Tout dwa rezève. Enprime nan Etazini Damerik. Apwobasyon Anglè: 6/14. Apwobasyon tradiksyon: 6/14. Tradiksyon First Presidency Message, January 2015. Hatian. 12581 036
Ansèyman nan Mesaj Sa a
Se pa anpil manm nan Legliz la k ap resevwa yon konsèy pèsonèl nan men yon Apot, jan Prezidan Monson te resevwa l la. Men nou ka toujou jwenn benediksyon si nou suiv ansèyman pwofèt yo ak apot yo. Panse pou w li diskou Prezidan Monson yo nan dènye konferans jeneral la (sonje diskou pou louvri konferans lan ak sa pou fèmen l lan tou). Chèche direksyon espesifik oswa apèl alaksyon. Ou gen dwa pale sou sa ou aprann yo avèk moun w ap vizite yo epi panse sou fason pou aplike konsèy Prezidan Monson nan.