Parau poro‘i a te Peresideniraa Matamua, Tenuare 2015
Pee i te mau peropheta
Ua tavini au i roto i te nuu moana no te Hau Marite i te hopea o te Tama’i Rahi II o te ao nei. E ti‘araa ihitai to’u, te ti‘araa haehaa roa a‘e i roto i te nuu moana. Ei reira ua pa‘uma vau i te ti‘araa ihitai no te pŭpŭ hoê, e i muri iho ei fa‘ehau papa‘i parau no te pŭpŭ toru.
Ua hope atura te Tama‘i Rahi II o te ao nei, e ua vaiihohia vau. Ua faaoti a‘era vau e, ia tomo noa’tu faahou vau i roto i te nuu fa‘ehau, ua hinaaro vau ia riro ei faatere nuu fa‘ehau. Ta’u i feruri, « mai te peu e nehenehe, eiaha faahou â te ohipa tamâraa i te piha tunuraa maa, eiaha faahou â te ohipa ʻuiraa i te pahi ».
I te vaiihoraahia vau, ua tapa‘o vau ia’u i roto i te pŭpŭ faaherehere o te nuu moana o te Hau Marite. Ua haere au i te mau haapiipiiraa na te fa‘ehau i te mau pô monire atoa. Ua tamau noa vau i ta’u haapiiraa no te manuïa i roto i te reira. Ua haere au i te mau hiʻopoʻaraa atoa : no te pae feruriraa, te pae tino e te manava. E i te hopea, ua tae mai te parau apî rahi e : « Ua fariihia oe ei faatere no te hoê pŭpŭ faaherehere o te nuu moana o te Hau Marite ».
Ua oaoa roa vau i te faaiteraa i te reira i ta’u vahine, ia Frances, ma te parau e : « Ua manuïa vau ! Ua manuïa vau ». Ua tauahi mai oia ia’u ma te parau e, « I haa na oe no te rave faaoti roa i te reira ».
Ua tupu râ te hoê ohipa. Ua piihia vau no te riro ei tauturu i roto i te episekoporaa o ta’u paroisa. E e tupu te apooraa a te episekopo i te pô mau o ta’u haapiipiiraa na te faʻehau. Papû roa ia’u e, e titoraa rahi mau teie. Papû roa ia’u e, eita vau e taimehia no te rave i ta’u ohipa i roto i te pŭpŭ faaherehere o te nuu moana ma te rave atoa’tu i ta’u hopoiʻa i roto i te episekoporaa. Nahea pai ? E tiʻa ia ravehia te hoê faaotiraa.
E ua pure au no te reira. I muri iho, ua haere au e farerei i te taata tei riro na ei peresideni tĭtĭ no’u i to’u tamariiraa, o Elder Harold B. Lee (1899–1973), tei roto i te Pŭpŭ no te Tino Ahuru Ma Piti Aposetolo i tera ra tau. Ua parahi au i mua ia’na i te tahi pae i te airaamaa. Ua parau vau ia’na i to’u anaanatae rahi no te faatereraa i ta’u pŭpŭ nuu faʻehau. Ua faaite roa vau ia’na i te hoê hohoʻa o te rata ta’u i farii.
Ua feruri rii oia, ei reira ua parau maira, « Teie te tiʻa ia oe ia rave e te taeaʻe Monson. E papaʻi oe i te Piha toroʻa o te nuu moana no te parau ia ratou e, no to oe piiraahia i roto i te episekoporaa, eita faahou ta oe e nehenehe e farii i te reira tonoraa i roto i te pŭpŭ faaherehere o te nuu moana no te Hau Marite ».
Ua pe‘ape‘a roa to’u aau. Ua parau faahou mai ra oia e, « I muri iho e papaʻi oe i te faatereraa o te Ahuru ma piti Mataeinaa o te nuu moana i San Francisco no te parau ia ratou e, ua hinaaro oe ia tatarahia oe i rapae i te pŭpŭ faaherehere ».
Ua parau aʻera vau, « E te taeaʻe Lee, aita paha oe i ite i te faanahoraa o te nuu faʻehau. E farii ihoa ïa ratou ia iriti mai ia’u mai roto i te faatereraa ia patoʻi atu vau i te reira, eita râ te Ahuru ma piti Mataeinaa o te nuu moana e vaiiho noa ia’u mai te reira. No te tamaʻi e fatata ra i Korea, e titau mai ratou i te hoê faatere tei ore â i faataahia no te tahi atu pŭpŭ. E mai te peu e titauhia vau, e mea au aʻe na’u ia haere ei tiʻa faatere, e eita e haere mai te peu eita vau e farii i teie nei faatereraa. Ua papû maitai anei ia oe, teie ihoa te parau aʻo ua hinaaro oe ia’u ia farii ?»
Ua tuu atura Elder Lee i to’na rima i niʻa i to’u tapono e mai te hoê metua ra te huru, ua na ô mai nei e, « E te taeaʻe Monson, ia rahi atu â to oe faaroo. E ere te nuu faʻehau no oe ».
Ua hoʻi atura vau i te fare. Ua faahoʻi aʻera vau i te parau tonoraa tei rari i te roimata i roto i to’na vehi e tae noa’tu i te rata apiti no te faaara eita vau e farii i te reira. I muri iho ua papaʻi au i te hoê rata i te Ahuru ma piti Mataeinaa o te nuu moana no te ani ia ratou ia tatara ia’u i rapae i te pŭpŭ faaherehere o te nuu moana.
Tei roto ta’u aniraa i te mau aniraa hopea ta te faatereraa o te nuu moana i farii hou te Tamaʻi i Korea. Ua ineine aʻena to’u pereue faʻehau. E ono noa hepetoma i muri mai to’u piiraa ei tauturu i roto i te episekoporaa, ua piihia vau ei episekopo.
Eita vau e tae i niʻa i teie tiʻaraa ta’u e mau nei i roto i te Ekalesia i teie mahana ahani aita vau i pee i te parau aʻo a te hoê peropheta, e ahani aita vau i pure no niʻa i te reira faaotiraa, ahani aita vau i taa i te hoê parau mau faufaa rahi : pinepine roa te paari o te Atua e hiʻohia ei mea maamaa i te taata.1 Te haapiiraa rahi hoê roa râ ta tatou e nehenehe e haapii i roto i te tahuti nei maori râ, ia parau te Atua e ia faaroo Ta’na mau tamarii, e tano noa ratou.
Te parauhia nei e, te huri nei te tuaaai i niʻa i te tahi rii noa mea iti, e mea na reira atoa to tatou oraraa. Na te mau faaotiraa e faataa i to tatou ananahi. Aua‘e râ, aita tatou i vaiiho otahi-noa-hia i roto i ta tatou mau faaotiraa.
Mai te peu ua hinaaro outou ia ite i te maramarama o te raʻi, mai te peu ua hinaaro outou i te putapu i te faaûruraa o te Atua Mana Hope, mai te peu ua hinaaro outou ia vai i roto i to outou aau te manaʻo e, te arataʻi ra te Metua i te Ao ra ia outou, a pee i te mau peropheta a te Atua. Ia pee outou i te mau peropheta, e vai noa outou i te vahi paruru.
© 2015 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/14. Parau faati‘a no te iritiraa : 6/14. Iritiraa no First Presidency Message, January 2015. Tahitian. 12581 895
Haapiiraa no roto mai i teie parau poroʻi
E mea varavara te mau melo o te Ekalesia e farerei tino roa i te hoê aposetolo no te farii i te parau aʻo mai ta te peresideni Monson. Teie râ, e haamaitaihia tatou ia pee tatou i te mau haapiiraa a te mau peropheta e a te mau aposetolo. A opua na ia taiʻo i te mau aʻoraa a te peresideni Monson mai roto mai i te amuiraa rahi i maʻiri aʻenei (a haamanaʻo atoa i te mau parau omuaraa e te mau parau opaniraa). A hiʻo i te mau arataʻiraa taa ê e aore râ te mau tiʻaororaa. E nehenehe ta outou e tauaparau i te mea ta outou i haapii e te feia ta outou e hahaere ra ma te feruri i te tahi mau raveʻa no te faaohipa i te parau aʻo a te peresideni Monson.