iTukutuku ni Mataveiliutaki Taumada, Feperueri 2015
iVakadinadina kei na Saumaki
E tiko e dua na duidui ena kena ciqomi e dua na ivakadinadina ni dina kei na saumaki vakaidina. Taura mada, a wasea na iApositolo cecere o Pita na nona ivakadinadina bula vua na iVakabula ni kila ni o Jisu na Luve ni Kalou.
“Sa qai kaya vei ira [ko Jisu], Ia dou sa kaya se ko cei koi au?
“Sa qai vosa ko Saimoni Pita, ka kaya, Oi kemuni na Karisito, na Luve ni Kalou bula.
“A sa vosa ko Jisu ka kaya vua, O sa kalougata Saimoni Pa- Jona, ni sa sega ni vakatakila vei iko na lewe kei na dra, na Tamaqu ga sa tiko mai lomalagi” (Maciu 16:15–17).
Ia e muri, ena Nona ivakasala vei Pita, sa solia kina na Turaga ki vua kei keda e dua na idusidusi me da yaco me da saumaki vakaidina ka vakadeitaka tiko na saumaki oqori ena nomu bula taucoko. E kaya kina vaqo ko Jisu:“Ia ni ko sa saumaki tale, mo vakataudeitaki ira na wekamu” (Luke 22:32).
E vakavuvulitaka vei Pita o Jisu ni dodonu me yaco e dua na veisau levu ni sa rawati e dua na ivakadinadina me rawa kina ni da vakasama, vakanananu, ka ivalavala me vaka e dua na tisaipeli saumaki dina i Jisu Karisito. Oqori na veisau levu eda dau vakasaqara kece. Ni da sa rawata, eda na gadreva me tomani tikoga na veisau oqori me yacova ni sa oti na bula vakatovolei oqo (raica na Alama 5:13–14
Eda sa kila mai na veika eda sa sotava kei na noda vakadikevi ira tiko eso tale ni na sega ni rauta na noda rawata e vica na gauna cecere ni kaukauwa vakayalo. A cakitaka o Pita ni kila na iVakabula ni sa oti mada ga na nona ciqoma mai na Yalotabu ni Karisito o Jisu. O iratou na Tolu na iVakadinadina ni iVola i Momani a soli vakadodonu vei iratou na ivakadinadina ni vosa ni Kalou na iVola i Momani, ia e muri eratou a malumalumu ena nodratou sega ni rawa ni tokoni Josefa Simici me Parofita ni nona Lotu na Turaga.
Eda gadreva e dua na veisau e yaloda, me vaka e vakamacalataki ena ivola i Alama: “Ia sa duavata ga na ka era sa tukuna—ni ra sa veivutuni ka sega tale ni via kitaka na ivalavala ca” (Alama 19:33; raica talega Mosaia 5:2).
E vakavuvulitaka vei keda na Turaga ni da sa saumaki vakaidina ki na Nona kosipeli, ena gole na yaloda mai na dau nanumi koya ga ki na veiqaravi me ra laveti cake na tani me ra goleva na bula tawamudu. Me rawati na saumaki oqori, sa rawa ni da masu ka cakacaka ena vakabauta me da yaco me vaka na tamata vou ka rawati mai ena Veisorovaki i Jisu Karisito.
E rawa ni da tekivu ena noda masu ena vakabauta me veivutunitaki kina na yalokocokoco kei na isolisoli me da kauwaitaki ira vakalevu cake kina na tani mai vei keda. E rawa ni da masuta na kaukauwa me da biuta laivi kina na qaciqacia kei na yalovuvu.
Na masu sa idola talega ni noda ciqoma na isolisoli ni lomana na vosa ni Kalou kei na lomani Karisito (raica na Moronai 7:47–48). Erau duavata na rua oqo. Ni da wilika, vakananuma vakatitobu, ka masulaka na vosa ni Kalou, ena yaco me da lomana. Ena biuta ki yaloda na Turaga. Ni da vakila na loloma oya, sa na tekivu me da lomana vakalevu cake na Turaga. Ena yaco vata mai kei na lomani ira na tani eda gadreva me rawa kina ni da vaqaqacotaki ira na tani e biuti ira mai ki na noda sala na Kalou.
Taura mada, e rawa ni da masuta me da kilai ira sa vinakata na Turaga me ra vakavulici mai vei ira Nona daukaulotu. E rawa ni ra masu ena vakabauta na daukaulotu tudei me ra kila mai na Yalo na veika me ra vakavulica ka vakadinadinataka. E rawa ni ra masu ena vakabauta me vakatara na Turaga me ra vakila na Nona loloma ena vukudra o ira kece era sota kaya. O ira na daukaulotu era na sega ni kauti ira kece mai era sota kaya ki na wai ni veipapitaisotaki kei na isolisoli ni Yalo Tabu. Ia e rawa ni ra rawata na Yalo Tabu me nodra itokani mai na nodra veiqaravi kei na veivuke ni Yalo Tabu, ena qai yaco na gauna, me veisau na yalodra na daukaulotu.
Ena dau vakavoui e veigauna na veisau ni da tomana tiko o keda kei ira ena yalo sega ni nanumi koya ga ena noda bula taucoko me da cakacaka ena vakabauta me da vaqaqacotaki ira na tani ena kosipeli i Jisu Karisito. Na saumaki e sega ni dua na ka me na yaco vakadua ga se dua na ka me yaco ga ena dua na gauna ena noda bula ia oqo e dua na iwalewale ena tomani tikoga. E rawa ni ramase cake tiko na bula me yacova na siga sa uasivi sara ko ya, ni da na raica na iVakabula ka kunea ni da sa yaco me vakataki Koya. Na Turaga e vakamacalataka na ilakolako me vakaoqo: “Na veika sa vu mai vua na Kalou e veivakararamataki; kei koya sa ciqoma na rarama, ka tudei tiko ga vua na Kalou, ena vakararamataki vakalevu; io ena tubu cake tiko ga na nona rarama me yacova na siga uasivi ko ya” (V&V 50:24).
Au yalataka vei kemuni ni rawa ni vakakina vei keda.
© 2015 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/14. Vakadonui me vakadewa: 6/14. iVakadewa ni iTukutuku ni Mataveiliutaki Taumada, Feperueri 2015. Fijian 12582 858
Veivakavulici mai na iTukutuku Oqo
O Elder David A. Bednar ena Kuoramu ni iApositolo Le Tinikarua e vakayagataka na “vosa vakatautauvata ni pikeli” me vakavuvulitaka kina ni saumaki e dua na iwalewale tomani ka sega ni yaco ga vakadua: “Na laini ena laini kei na ivunau ena ivunau, ena vakamalua ka voleka sara me sega ni vakilai na kena sa vaka mai na loma ni Kalou na noda inaki, noda vakanananu, noda vosa, kei na noda ivalavala” (“E Dodonu Mo Sucu Tale,” Liaona, Me 2007, 19). Vakasamataka mo railesuva na italanoa vakaibalebale ni pikeli kei ira o vakavulica. Na cava eda rawa ni cakava o keda yadua me da toso tikoga kina ki liu ena iwalewale malua ni saumaki me vaka e rau vosa ruarua kina o Peresitedi Eyring kei Elder Bednar?