iVaqa ni Veisiko, Feperueri 2015
Na Veika e Kilai Tani Kina o Jisu Karisito: Sega Nona iValavalaca
Vulica ena masumasu na itukutuku oqo ka tovolea mo kila na ka mo na wasea. Ena vakalevutaka vakacava na nomu vakabauti Koya na kilai vakamatata ni bula kei na ilesilesi ni iVakabula, ka vakalougatataki ira o vakaraica voli ena veisiko? Me ikuri ni itukutuku, lako ki na reliefsociety.lds.org.
Vakabauta, Matavuvale, Veivukei
Na noda iVakabula, o Jisu Karisito, sai koya duadua ga e rawata me veisorovaki me baleta na kawatamata. “O Jisu Karisito, na Lami sa sega ni ca, a soli Koya ena icabocabo ni soro ni solibula ka sauma na isau ni noda ivalavala ca,” e kaya ko Peresitedi Dieter F. Uchtdorf, na iKarua ni Daunivakasala ena Mataveiliutaki Taumada.1 Na noda kila ni a sega na nona ivalavala ca o Jisu Karisito e rawa ni vukei keda me vakalevutaki na noda vakabauti Koya ka segata me da muria na Nona ivakaro, veivutuni, ka yaco me savavuka.
“O Jisu … e dua na kabula vakalewe ka vakayalo, ia a sega ni soli koya ki na veitemaki (raica na Mosaia 15:5),” e kaya o Elder D. Todd Christofferson ena Kuoramu ni iApositolo Le Tinikarua. “E rawa ni da gole Vua … baleta ni kila o Koya. E kila o Koya na dredre, ka kila talega ko Koya na sala me da vorata kina na dredre. …
“… Na mana ni Nona Veisorovaki e rawa ni bokoca na revurevu ni ivalavalaca e tu vei keda. Ni da veivutuni, ena vakadonui keda ka vakasavasavataki keda na nona loloma soliwale ni veivakaduavatataki (raica na 3 Nifai 27:16–20). E vaka ga ni da a sega ni rawai, e vaka ni da a sega ni soli keda ki na veitemaki.
“Ni da segata ena veisiga yadua kei na veimacawa me da muria na sala nei Karisito, ena vakadeitaka na yaloda na kena duatani, sa na malumu na ivalu eloma, ka sega ni veivakaleqai na veitemaki.”2
iKuri ni iVolanikalou
Mai na iVolanikalou
E sauma na iVakabula na isau ni noda ivalavalaca ena Vakalou ni Nona Luve ni Kalou, Nona bula sega ni ivalavalaca, Nona vakararawataki kei na vakadavei ni Nona dra ena Were ko Kecisemani, Nona mate ena kauveilatai kei na Nona Vakaturi Cake mai na ibulubulu. Ena Veisorovaki nei Jisu Karisito, sa rawa kina ni da vakasavasavataki tale ena noda veivutunitaka na noda ivalavalaca.
E vakavulici ira na nona tamata na Tui o Penijamini ena Veisorovaki nei Jisu Karisito ka taroga kevaka era vakabauta na nona vosa. “Era sa qai kaci vata mai ka vaka: … sa cakacaka na Yalo ni Turaga … ki na yaloi keimami, ka keimami sa biuta tani na gagadre ca ka via kitaka tikoga na ivalavala dodonu. …
“Sa lomai keimami me keimami veiyalayalati kei na neimami Kalou, me keimami vakayacora na nona lewa ka muria na nona vunau” (Mosaia 5:1–2, 5).
E rawa talega ni yaco vei keda na “cakacaka yaco” me vakataki ira na tamata nei Penijamini na Tui, o ira era “sa biuta tani na gagadre ca, ka via kitaka tikoga na ivalavala dodonu” (Mosaia 5:2).
© 2015 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/14. Vakadonui me vakadewa: 6/14. iVakadewa ni iVaqa ni Veisiko, Feperueri 2015. Fijian 12582 858
Vakasamataka Oqo
Erau duidui vakacava me da savavuka mai na taucoko ni noda vinaka?