Cov Mus Saib Xyuas tom Tsev tsab Xov, Ob Hlis Ntuj 2015
Tej Cwj Pwm ntawm Yexus Khetos: Tsis Muaj Kev Txhaum
Ua tib zoo thov Vajtswv kawm tej yam no thiab nug seb koj yuav tsum qhia dab tsi. Qhov uas koj to taub tus Cawm Seej lub neej thiab tej luag hauj lwm yuav ua rau koj txoj kev ntseeg Nws loj tuaj thiab foom koob hmoov li cas rau cov uas koj saib xyuas tom tsev? Kom tau ntaub ntawv xov xwm ntxiv, cia li txuas rau reliefsociety.lds.org.
Kev Ntseeg, Tsev Neeg, Kev Pab
Peb tus Cawm Seej, Yexus Khetos, yog tib tug uas muaj peev xwm theej tib neeg lub txhoj. Thawj Tswj Hwm Dieter F. Uchtdorf, tus Pab Cuam thib Ob hauv Thawj Pawg Thawj Tswj Hwm hais tias, “Yexus Khetos, tus Me Nyuam yaj uas tsis muaj qhov ceb, txaus siab muab Nws tus kheej txi ntawm lub thaj thiab them tus nqi rau peb tej kev txhaum.”1 Qhov uas peb to taub hais tias Yexus Khetos tsis muaj kev txhaum yuav pab peb txoj kev ntseeg Nws loj tuaj thiab pab peb siv zog ua raws li Nws cov lus txib, hloov siab lees txim, thiab ua neeg huv.
Txwj Laug D. Todd Christofferson ntawm Pawg Kaum Ob tug Thwj Tim hais tias “Yexus muaj ib lub cev nqaij daim tawv thiab ib tug ntsuj plig, tiam sis Nws tis ywj rau kev ntxias (saib Mauxiyas 15:5). Peb txaus siab tig mus rau Nws … vim Nws yeej to taub. Nws to taub peb tej kev nyiaj ntxeem, thiab Nws kuj paub kov yeej tej kev nyiaj ntxeem thiab. …
“… Lub hwj chim ntawm Nws txoj Kev Theej Txhoj tshem tau peb tej kev txhaum mus. Thaum peb hloov siab lees txim, Nws txoj kev tshav ntuj ua rau peb tsis muaj txim thiab ntxuav peb kom huv (saib 3 Nifais 27:16–20). Peb yuav nyob zoo li peb tsis tau ua txhaum, zoo li peb tsis tau ywj rau kev ntxias.
“Thaum peb siv zog ua raws li Yexus Khetos qhia txhua hnub thiab txhua lub lim tiam, peb tus ntsuj plig muaj zog tuaj thiab kov yeej, thiab kev ntxias tsis tsim txom ntxiv.”2
Vaj Lug Kub Ntxiv
Los ntawm cov Vaj Lug Kub
Tus Cawm Seej tau them nqi rau peb tej kev txhaum dhau los ntawm qhov uas Nws yog Vajtswv Leej Tub, Nws lub neej uas tsis muaj kev txhaum, Nws txoj kev raug txom nyem thiab los ntshav nyob hauv lub Vaj Khexemanes, Nws txoj kev tuag saum ntoo khaub lig, thiab Nws txoj Kev Sawv Rov Los. Dhau los ntawm Yexus Khetos txoj Kev Theej Txhoj, peb yuav rov qab ua neeg huv thaum peb hloov siab lees txim.
Tus Vaj Ntxwv Npeyamis qhia nws cov neeg txog Yexus Khetos txoj Kev Theej Txhoj ces nug lawv seb lawv puas ntseeg nws tej lus. “Lawv sawv daws qw ua ib lub suab hais tias: … tus Ntsuj Plig … tau ua ib qhov kev pauv loj nyob hauv peb, los sis nyob hauv peb tej siab, xwv kom peb tsis muaj siab xav ua phem ntxiv lawm, tiam sis ua zoo kom tsis tu ncua mus li. …
“Thiab peb txaus siab mus rau ib txog kev sib khi lus nrog peb tus Vajtswv los ua li nws siab nyiam, thiab ua raws li nws tej lus txib nyob hauv ib puas yam tsav” (Mauxiyas 5:1–2, 5).
Peb kuj muaj tau “ib qho kev pauv loj” zoo li tus Vaj Ntxwv Npeyamis cov neeg, uas “tsis muaj siab xav ua phem ntxiv lawm, tiam sis [xav] ua zoo kom tsis tu ncua mus li” (Mauxiyas 5:2).
© 2015 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv : 6/14. Pub txhais ua lus Hmoob: 6/14. Kev txhais Visiting Teaching Message, February 2015. Hmong. 12582 295
Xav Txog Qhov No
Qhov uas yus dawb huv thiab kev ua zoo tag nrho sib txawv li cas?