Hafatra ho an’ny Famangiana Isan-tokantrano, Febroary 2015
Ireo Toetran’i Jesoa Kristy : Tsy Nanam-pahotana
Halalino ombam-bavaka ity hafatra ity ary katsaho ny hahafantarana izay tokony hozaraina. Ahoana no hahafahan’ny fahatakarana ny fiainan’ny Mpamonjy sy ny anjara asany mampitombo ny finoanao Azy sy mitahy ny fiainan’ireo olona izay iandraiketanao amin’ny alalan’ny famangiana isan-tokantrano? Ho fanampim-pahalalana bebe kokoa dia tsidiho ny reliefsociety.lds.org.
Finoana, Fianakaviana, Fanampiana
Ny Mpamonjintsika Jesoa Kristy ihany no hany afaka nanao sorompanavotana iray ho an’ny zanak’olombelona. Hoy ny Filoha Dieter F. Uchtdorf, Mpanolotsaina Faharoa ao amin’ny Fiadidiana Voalohany hoe: “I Jesoa Kristy ilay zanakondry tsy misy kilema [dia] nanaiky nankeo amin’ny alitara fanaovana sorona ary nanefa ny saran’ny fahotantsika.”1 Ny fahatakarana hoe tsy nanam-pahotana i Jesoa Kristy dia afaka manampy antsika hampitombo ny finoantsika Azy sy hiezaka hitandrina ny didiny sy hibebaka ary ho lasa madio.
Hoy ny Loholona D. Todd Christofferson ao amin’ny Kôlejin’ny Apôstôly Roambinifolo hoe: “I Jesoa dia … olona manana vatana sy fanahy, saingy tsy resin’ny fakam-panahy (jereo ny Môsià 15:5).” “Afaka mitodika Aminy isika … satria takany tsara ny mahazo antsika. Takany tsara ny olana, ary takany ihany koa ny fomba handresena ny olana. …
“… Afaka mamafa ny vokatry ny fahotana izay ao amintsika ny herin’ny Sorompanavotany. Rehefa mibebaka isika dia manamarina sy manadio antsika ilay sorona feno famindrampo nataony (jereo ny 3 Nefia 27:16–20). Toy ny hoe tsy resin’ny fakam-panahy isika ary toy ny hoe tsy nanaiky ho voasarik’izany.
“Rehefa miezaka isan’andro sy isan-kerinandro isika mba hanaraka ny dian’i Kristy dia manamafy ny fahamboniany ny fanahintsika, mihatony ny ady ao anaty, ary mitsahatra tsy manakorontana ireo fakam-panahy.”2
Soratra Masina Fanampiny
Avy amin’ny Soratra Masina
Ny Mpamonjy dia nanefa ny saran’ny fahotantsika tamin’ny alalan’ny maha-Zanakalahin’Andriamanitra Azy, tamin’ny alalan’ny fiainany tsy nisy fahotana, tamin’ny alalan’ny fijaliany sy ny nandatsahany ny ràny tao amin’ny Sahan’i Getsemane, tamin’ny alalan’ny fahafatesany teo amin’ny hazofijaliana ary tamin’ny alalan’ny fitsanganany tamin’ny maty avy ao am-pasana. Amin’ny alalan’ny Sorompanavotan’i Jesoa Kristy dia afaka ho tonga madio indray isika rehefa mibebaka amin’ny fahotantsika.
Nampianatra ny vahoakany momba ny Sorompanavotan’i Jesoa Kristy ny Mpanjaka Benjamina ary avy eo izy dia nanontany azy ireo raha toa ka nino ny teniny izy ireo. “Ary nihiaka tamin’ny feo tokana izy rehetra, nanao hoe: … ny Fanahy … nitondra fiovana mahery vaika tao aminay, na tao am -ponay, ka tsy manana fironana hanao ratsy intsony izahay fa ny hanao soa lalandava kosa. …
“Ary izahay dia vonona hanao fanekempihavanana amin’Andriamanitray, hanao ny sitrapony sy hankatò amin’ny zava-drehetra” (Môsià 5:1–2, 5).
Afaka manana “fiovampo mahery vaika” koa isika tahaka ny vahoakan’ny Mpanjaka Benjamina izay “tsy nanana fironana hanao ratsy intsony fa ny hanao soa lalandava kosa” (Môsià 5:2).
© 2015 an’ny Intellectual Reserve, Inc. Zo rehetra voatokana. Natonta teto Etazonia. Fankatoavana ny tamin’ny teny Anglisy: 6/14. Fankatoavana ny Fandikana: 6/14. Fandikana ny Visiting Teaching Message, February 2015. Malagasy. 12582 654
Eritrereto Ity
Inona no maha-samy hafa ny hoe madio amin’ny hoe tonga lafatra ?