Feia apî
E upooti‘a na roto ia Iesu Mesia
E fifi to’u i ni‘a i te amu-rahi-raa i te maa. No to’u mau taime pinepine no te amu-rahi-raa i te pae hopea ua tae mai te teimaha o te faahapa, te pe‘ape‘a e te au ore. E au ra e mea paruparu roa vau i te tamataraa i te upooti‘a i to’u fifi.
No te hoê tau maoro, ua tau‘a ore au i te mea e, te Taraehara a te Faaora aita te reira e faaora noa ia tatou i te hopea, e faaora atoa râ ia tatou mai te au ore ma te haamaitai atoa ia tatou, e e tano ho‘i te reira no to’u huru tamau e te au ore ia amu rahi i te maa.
Ua faaoti au e horo‘a ia’u iho i to’u Faaora. Ua pure au. Ma te haehaa, ua farii au i to’u paruparu, e to’u hinaaro i te aroha, e i muri iho ua ani au i te Metua i te Ao ra ia haamaitai ia’u i Ta’na tauturu hanahana i roto i te mahana e haere mai nei. I taua pô ra, ua ite au i te faa‘iteraa papû a te hoê Metua here, e te vai ra To’na hinaaro faito ore ia tauturu i Ta’na tamaiti e To’na puai mârô ore no te faaoti i To’na hinaaro.
Mai taua pô ra, aita te maa i riro ei faaûruraa teimaha i ni‘a ia’u. Ua ite au e o Iesu Mesia te tumu mau o to’u manuïa. Mai ia Paulo, e haapii mai au e « E ti‘a ia’u te mau mea atoa nei i te Mesia, tei tauturu mai ia’u ra » (Philipi 4:13). E e tamata vau eiaha e haamo‘e i te tahi atu haapiiraa a Paulo : « E teie nei, ia haamaitaihia te Atua o tei horoa mai i te re no tatou, no to tatou Fatu ra no Iesu Mesia » (1 Korinetia 15:57).