Parau poroʻi na te mau tuahine hahaere, Mati 2015
Te huru o Iesu Mesia : Te faaoroma‘i-roa-raa e te faaoroma‘i
A tuatapapa na roto i te pure i teie materia ma te imi ia ite e aha te faa‘ite atu. Nahea te maramaramaraa i te oraraa e te ohipa a te Faaora e faarahi ai i to outou faaroo Ia’na e e haamaitai ai i te feia ta outou e haapa‘o nei na roto i te tere hahaereraa ? No te mau haamaramaramaraa hau atu, a haere i ni‘a i te reliefsociety.lds.org.
Te Faaroo, Te Utuafare, Te Totauturu
Pinepine te faaoroma‘i i te ferurihia ei hoê huru hau, e te farii-noa-raa, mai ta te peresideni Dieter F. Uchtdorf, tauturu piti i roto i te Peresideniraa Matamua i parau, « e ere te faaoroma‘i i te farii-noa-raa, e ere atoa i te oreraa e rave no to tatou ri‘ari‘a. Te faaoroma‘i o te tia‘i-itoito-raa ïa e te tape‘a-[itoito]-noa-raa ïa. O te rave tamau-noa-raa ïa i te tahi mea… noa’tu ua faataimehia te mau hinaaro o to tatou aau. E ere te faaoroma‘i i te tape‘a-noa-raa e tae noa’tu i te hopea, o te tape‘a-maitairoa-raa râ e tae noa’tu i te hopea ».
I roto i to tatou oraraa hou te tahuti nei, ua faaineine to tatou Metua i te Ao ra i e hoê faanahoraa no tatou—no Ta’na mau tamarii varua—e ua tuô tatou ma te oaoa i te rave‘a ia haere mai i te fenua nei. (hi‘o Ioba 38:7). A ma‘iti ai tatou i te faatu‘ati i to tatou hinaaro i ni‘a i To’na i te roaraa o to tatou oraraa i ni‘a i te fenua nei, e « faariro [Oia] ia [tatou] ei mauhaa i [To’na] rima e ora’i te taata e rave rahi » (Alama 17:11).
Te na ô faahou ra te peresideni Uchtdorf, « te faaoroma‘i o te fariiraa ïa i te mea e ore roa e nehenehe ia tauihia e te ti‘araa’tu i mua i te reira ma te itoito, te maitai e te faaroo. O te hinaaro ïa ‘ia auraro i te mau mea atoa ta te Fatu e hinaaro e tuu i ni‘a ia [tatou], mai te tamarii e auraro ho‘i i to’na metua’ [Mosia 3:19]. Te auraa mau o te faaoroma‘i o te riroraa ei mea ‘mau maite e te etaeta, e te aueue ore i te haapaoraa i te mau faaue a te Fatu’ [1 Nephi 2:10] i te mau hora atoa o te mahana atoa noa’tu e mea paari ia rave i te reira ».1
Te tahi atu mau irava papa‘iraa mo‘a
No roto mai i te mau papaʻiraa moʻa
Te parau nei te papa‘iraa mo‘a ia tatou e i roto i to tatou oraraa tahuti nei, e mea ti‘a ia tatou ia « faaoroma‘i i te mau ati… e rave rahi e tae i ni‘a ia [tatou] » I muri iho ua horo‘a mai te Atua i teie parau fafau tamahanahana, « a faaoromai râ i te reira, no te mea, inaha, te pihai iho ïa vau ia oe, e tae noa’tu i te hopea o to oe pue mahana » (PH&PF 24:8).
Te aamu o te Bibilia i muri nei o te hoê ïa hi‘oraa no te faaoroma‘i e te faaroo.
« Ua haere maira te hoê vahine… a hoê a‘era ahuru ma piti ti‘ahapa o’na matahiti i te poheraa i te tapahi… ua faatiaia maira i [ta te Mesia] hiti ahu : [mau] ihora taua tapahi no’na ra i reira.
« Ua na ô maira Iesu, ua faatiaia mai te hoê ia’u : ua ite hoi au, e e mana tei reva’tu na no ô nei atu ia’u nei.
« E ite a’era taua vahine ra e aita oia i mo‘e, ua haere maira oia ma te rurutaina, tipapa hua maira i raro i mua ia’na, faa‘ite maira ia’na i mua i te aro o te taata atoa, i te mea i faatiaia mai ai oia ia’na, e ua ora roa oia i reira ra.
« Ua parau atura oia ia’na, e faaitoito, e tau tamahine, ua ora oe i to oe faaroo ; ia ora na i te haerea » (Luka 8:43–48).
Mai ia’na, e nehenehe tatou e ite i te mau haamaitairaa e te tamahanahanaraa, e oia’to‘a ïa te faaoraraa i te ma‘i, a imi ai tatou ia Iesu Mesia—na ta’na Taraehare e faaora i to tatou ma‘i.
© 2015 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/14. Parau faati‘a no te iritiraa : 6/14. Iritiraa no Visiting Teaching Message, March 2015. Tahitian. 12583 895
A feruri i teie
I roto i teie aamu o te Luka 8, mea nahea te mau matahiti faaoroma‘i o teie vahine e i muri iho to’na faaroo ia Iesu Mesia i haamaitai ai ia’na ?