Etop eke First Presidency, Ofiong Ita eke isua 2015
Ndidu ke Sung-sung Ekara Ubok Esie
Nte mbon efen, esidemere ekikere mi ke nkutde ndiye utom uso ye ikwo. Kiet ke otu emi ekedi enye emi ami nkadade ke iso ediye ndise owo anam-ndise eketode Denmark Frans Schwarz eke ibuot edide Ndutuho ke Inwang.1
Ediye ubiak ndise emi ama emen owut nte Andinyanga otongode edong ke Inwang Gethsemane. Nte Enye obongde akam, angel kiet akada adiana Enye, awang Enye ke sung-sung ubok, ono ndongesit, ukpeme eke heaven, onyung anwam.
Nte ami nkerede mbanga ndise emi mbighi, ntre ke esit ye ekikere mi oyoho ye inem udong ye ekom eke ami mme nkemeke nditing. Ami mmokut, ke ekpri ubak, nte ekpebietde ndidu ke ini Andinyanga okotongode utom Esie ke isong ke ndimen idioknkpo ererimbot mbiom ke Idemesie. Idem akpa mi ke akwa ima ye mbom eke Ete enyenede ono ndito Esie. Ami mmoyoho ye akwa esit ekom ke se anana-ndo Eyen akanam ono ofuri ubon-owo onyung anam ono mi.
Nwaidem eke Eyen Abasi
Kpukpru isua ke ini ntem nnyin iti inyung ikere ibanga nwaidem Jesus Christ akanamde ono ofuri ubon-owo.
Se Andinyanga akanam tongo ke Gethsemane tutu okosim Golgotha ke ibuot nnyin okpon akan ukeme mi ndifiok. Enye ama emen mbiomo idioknkpo nnyin obiom ke Idemesie onyung ekpe nsinsi ye akpatre isop eke midighe ke ntak akpa ndudue Adam ikpong edi edi ono mme idioknkpo ye ndudue eke ata ediwak mme owo emi ekedude ke uwem. Nsinsi, edisana nwaidem emi akanam “ kpa Abasi, andikpon nkan, ndinyek idem oto ke ubiak, ndien iyip okoworo ke ofuri ndudu-idem, onyung obo ndutuho ke ikpokidem ye ke spirit” (D&C 19:18).
Enye okobo ndutuho ono mi.
Enye okobo ndutuho ono fi.
Ukpong mi oyoho ye ekom oduoi kini ami nkerede mbanga se nsongurua nwaidem emi oworode. Anam mi nsuhore-idem ke ndifiok ete ke kpukpru owo eke enyimede eno emi ndien eyak esit mmo eno Enye ekeme ndibo erifen enyung eyet mme idioknkpo mmo, isehe nte ebrede mme nte mbiomo mmo odobide.
Ekeme ndinam nnyin inana ndo inyung isana ini kiet efen. Ekeme ndifak nnyin oto ke nsinsi nwaidem eke edima Andinyanga nnyin.
Anie owo Edidong Nnyin Esit?
Okposuk edi owo nnyin ndomo kiet idinyeneke oruk akwa idomo eke Andinyanga nnyin okokutde, nnyin kiet-kiet iyenyene nkim-nkim ye ndot-ndot—ini eke mfuho ye mbungo-esit ebietde nte okpon akan se nnyin ikpeyode. Ini eyedi eke udop ye mkpofiok idioknkpo edifikde nnyin.
Ke ntre, edieke nnyin iyakde esit nnyin ino Jehovah ke mme ini oro, ke akpaniko Enye eyediongo onyung ofiok. Enye emi okobode ndutuho ikpong ono nnyin ke inwang ye ke cross idiyakke nnyin inana ndongesit idahaemi. Enye eyeno nsongonda, uko, onyung odiong nnyin. Enye eyekanare nnyin okuk ke sung-sung ubok Esie.
Enye eyenam ofon akan angel kiet ono nnyin.
Enye eyeno nnyin ata ndongesit, ukok, idorenyin, ye erifen.
Koro Enye edi Andifak nnyin.
Andiyanga Nnyin.
Enyene mbom Andinyanga nnyin ye odot-ukpono Abasi nnyin.
© 2015 eketode Intellectual Reserve, Inc. Ekpan kpukpru unen ndiming nwed emi. Ekeming ke USA. Enyimme eming ke Iko Mbakara: 6/14. Enyimme Ndikabare: 6/14. Ndikabare eke First Presidency Message, March 2015. Efik. 12583 553
Ukpebnkpo eketode Etop Emi
Mbemiso mbufo eno ukpebnkpo, yom ndausung eke Spirit man anwam mbufo ndifiok mme akpan unana eke mbon owo emi mbufo ekpebde. Nte mbufo edade etop eke President Uchtdorf ebuana ye mbon efen, ting iko ntiense banga Andinyanga ye ufak nwaidem Esie. Kere banga ndibup mbon owo emi mbufo ekpebde nkpo se Uwa-usio-isop Esie oworode ono mmo ye nte mmo ekekopde ndongesit eto Jehovah kini “ekim ye ndot-ndot mmo.”