Etop eke Visiting Teaching, Ofiong Ita eke isua 2015
Mme Edu-uwem eke Jesus Christ: Anyan-ime ye Ime
Bong akam kpeb nkpo emi ndien yom ndidiongo se ekpebuanade. Didie ke ndifiok uwem ye utom eke Andinyanga edi nnam mbuotidem mbufo ke Enye okori onyung odiong mbio owo emi mbufo esede enyin eto ke visiting teaching? Ke oyomde ndifiok awak, ka ke reliefsociety.lds.org.
Mbuotidem, Ufokidung, Unwam
Ime edi nkpo eke ekerede ke ediwak ini ete ke edi ndobo, isioroke uyo, edi nte President Dieter F. Uchtdorf, Udiana Ono-item ke First Presidency, eketingde ete ke, “Ime idige ndisin-nwed nworo, nko ke idige nditre ndinam oto ke ntak ndik nnyin. Ime oworo ata editie-mbet nyung nyo. Oworo nditie ye nkpo … ekpedi nte udong esit nnyin ebighide ndidi. Ime idige ndiyo ke ekpri ini; ime edi nditim nyo nkure!”
Ke uwem emi nnyin ikodude ke spirit, Ete nnyin ke Heaven ama otim uduak ono nnyin—ndito Esie eke spirit ndien ima—ifiori nkpo idara ke ufang eke inyende ndidi ke isong (kese Job 38:7). Nte nnyin imekde uduak nnyin man asanga ye uduak Esie kini uwem ke isong nnyin emi, Enye “eyenam [nnyin] idi nkpo-utom ke ubok [Esie] ke ndinyanga ediwak ukpong” (Alma 17:11).
President Uchtdorf akaka iso eting ete ke, “Ime oworo ete ndinyime nkpo eke mukemeke ndikpuhu ndien oyo enye ye uko, mfon, ye mbuotidem. Oworo ‘ndinyime ndisuk-idem nno kpukpru nkpo emi Jehovah okutde ete odot ndiworo nno [nnyin], kpa nte eyenowong osukde ibuot ono ete esie’ [Mosiah 3:19]. Nte akpatre, ime oworo ‘ndinyene iwuk ye nsongonda, ndien atuak-ada ke ndinim mbet Jehovah’ [1 Nephi 2:10] kpukpru ini ke kpukpru usen, ekpedi kini osongde ndinam oro.”1
Mme Ndadian Itie Nwed Abasi Efen
Emi oto Nwed Abasi
Nwed Abasi eting ono nnyin ete ke uwem isong nnyin, ke nnyin “inyene ndime ke ndutuho, koro [nnyin] iyenyene ediwak.” Abasi ama ono nnyin enwongo ndongesit emi ete, “Eyo mmo, koro, sese, Ami ndodu ye mbufo, tutu osim utit usen mbufo” (D&C 24:8).
Nke-mbuk Nwed Abasi eke etienede mi edi uwutnkpo kabanga ime ye mbuotidem.
“Ndien nnwan emi okodongode eriworo iyip ke isua duopeba … okotukde nnyeriye ofong-idem [Christ]: ndien idaha oro eriworo iyip esie ekpehe [etre].
“Ndien Jesus odoho ete, … Owo okotuk Mi: koro mmofiok nte odudu ama oworo Mi ke idem.
“Edi ke ini nnwan oro okutde ete imo idibeke, enye edi ke nnyek-idem ediduo Enye ke iso, onyumg eting ke iso kpukpru owo ntak eke enye okotukde Enye, ye adanga nte udongo esie okokurede ini kiet.
“Edi Jesus odoho enye ete, Eyen-anwan, mbuotidem fo akanam fi okop nsongidem; nyong koduk ke emem” (Luke 8:43–48).
Ukem nte nnwan oro, nnyin imekeme ndibo edidiong ye ndongesit, nko ye edikok, nte nnyin isangade ikpere Jesus Christ—emi Uwa-usio-isop Esie ekemede ndikok nnyin.
© 2015 eketode Intellectual Reserve, Inc. Ekpan kpukpru unen ndiming nwed emi. Ekeming ke USA. Enyimme eming ke Iko Mbakara: 6/14. Enyimme Ndikabare: 6/14. Ndikabare eke Visiting Teaching Message, March 2015. Efik. 12583 553
Kere banga Emi
Nte ewetde ke Luke 8, didie ke nnwan emi okobo utip oto ke ediwak isua emi enye ekenyenede ime ye mbuotidem ke Jesus Christ?