iTukutuku ni Mataveiliutaki Taumada, Maji 2015
Ovici e Ligana Dauloloma
Me vakataka e levu sara, au sa dau vakauqeti sara ga ena icakacaka ni liga kei na ivakatagi e tuvalaki vakamatau. Dua vei ira na gauna vakaoqori sa ikoya na noqu a duri tu ka vakaraica tu na iyaloyalo boroi vakamatau nei Frans Schwarz na daudroini ni Denmark ka vakatokai Na Mosi ni Yalo mai na Were.1
Na iyaloyalo totoka, vakamosiyalo ni saravi oqo e vakaraitaka tiko na gauna ni nona masu na iVakabula mai na Were o Kecisemani. Ni masu tiko, sa mai wavu tu e yasana e dua na agilosi, ka maroroi koya voli e ligana dauloloma ni veivakalomavinakataki, veivakamamautaki vakalomalagi kei na veitokoni.
Na balavu ni noqu vakananuma toka na droini qoka na kena toso ni kena tarai cake ki yaloqu kei na noqu vakasama na vakanananu kei na vakavinavinaka e sega ni na vakamacalataki rawa. Sa qai rawa niu na vakila na ka e a yaco kevaka meu a tu kina ni sa tekivutaka na iVakabula na cakacaka levu duadua e mai cakava e vuravura me sa taura vei Koya na ivalavala ca ni vuravura. Au qoroya na nona loloma levu kei na kauwai ni Tamada vei ira na luvena. Au sa vakadrukai sara ga ena titobu ni veika vinaka e cakava na Luvena ka sega na nona cala vei ira kece na tamata vakakina vei au.
Na Solibula ni Luvena na Kalou
Ena veiyabaki ena gauna vata oqo eda dau vakananuma kina ka vakasamataka na solibula e a cakava o Jisu Karisito baleti ira kece na tamata.
Sa sega sara ga ni rawa meu vakasotara vata na nona rawata na iVakabula na ka e vakayacora mai Kecisemani me laki yaco ki Kolikoca. E a taura vei Koya na icolacola ni ivalavala ca ka sauma ena isau ena sega ni veisautaki rawa ka sega walega ni baleti Atama kei na nona ivalavala ca ia sa ivalavala ca kece sara ga ni bilioni ka bilioni na kai vuravura ka ra bau bula. Na solibula tabu vakalou oqo e vakavuna me kaya kina vakaoqo, “Raica koi au na Kalou sa kaukauwa sara, au sa sautaninini ena mosi ni veivakararawataki ko ya; au a bunotaka na dra ka sa yaluma sara kina na yagoqu kei na yaloqu.” (V&V 19:18)
E a vakararawataki baleti au.
E a vakararawataki baleti kemuni.
Dau vakasinaiti na yaloqu ena vakavinavinaka niu vakananuma na inaki vakamareqeti ni nona solibula. Dau vakacegui au na nodra dau vakadonuya na isolisoli oqo o ira sa vakanamata na yalodra mera veivutuni ka savai na nodra caka cala veitalia se loaloa vakaevei na nodra cala se bibi vakacava na nodra icolacola.
Eda rawa ni savasava ka yaloqaqa tale. Ena rawa ni da na vueti ena nona solibula tawamudu na iVakabula.
O cei ena vakalomavinakataki keda?
E dina ni na sega ni dua vei keda ena laki sotava na veika sa sotava oti na Turaga, ia eda na sotava na noda veiaua ni bula dredre—na gauna ni rarawa kei na lomabibi ka da nanuma ni na sivia sara mai na kena eda rawa ni lako curuma. Ena tiko na gauna me na vaka me sa tara bi sara ga na dredre kei na ivalavala ca ena bikai keda.
Ena vakakina, kevaka da sa laveta na yaloda vua na Turaga ena gauna vakaoqori o Koya ena ki-la ka na veivuke vakakina. O Koya e a solibula mai na were vakakina mai na kauveilatai ena sega ni na laivi keda ena gauna vakaoqori. O Koya ena vakaukauwataki, vakauqeti, ka na vakalougatataki keda. O Koya ena ovici keda ena ligana dauloloma.
O Koya e na levu cake mai na agilosi vei keda.
O Koya ena kauta mai vei keda na veivakalomavinakataki, veivakabulai, vakanuinui, kei na veivosoti.
Ni o Koya na noda Dauveivueti.
Na noda Dauveisereki.
Na noda iVakabula dauloloma ka Kalou dauveilomani.
© 2015 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/14. Vakadonui me vakadewa: 6/14. Vakadewa ni First Presidency Message, March 2015. Fijian. 12583 858
Veivakavulici mai na iTukutuku oqo
Ni bera ni o veivakavulici, vakasaqara na veidusimaki ni Yalotabu ena nomu vakatulewataka na tikina cava ena veivuke vakalevu vei ira o vakavulica. Ni ko sa wasea na itukutuku e a wasea o Peresitedi Uchtdorf, vakadinadinataka na iVakabula kei na Nona veivueti ni solibula Vakasamataka mo tarogi ira o vakavulica tiko na cava na ibalebale ni Nona Veisorovaki vei ira kei na ka era vakila ena veivakacegui ni Turaga ni ra sotava na rarawa kei na dredre.