iVaqa ni Veisiko, Maji 2015
Na iVakarau i Jisu Karisito: Vosota Vakadede kei na Yalovosota
Vulica ena masumasu na itukutuku oqo ka vakasaqara mo kila na ka mo na wasea. Ena vakalevutaka vakacava na nomu vakabauti Koya na kila deivaki ni bula kei na ilesilesi ni iVakabula, ka vakalougatataki ira o vakaraica voli ena veisiko? Me ikuri ni itukutuku, lako ki na reliefsociety.lds.org.
Vakabauta, Matavuvale, Veivukei
Na yalovosota e dau kilai tu ni valavala e vakanomodi, ia me vaka e kaya o Peresitedi Dieter F. Uchtdorf, na iKarua ni Daunivakasala ena Mataveuiliutaki Taumada, Na Yalovosota e sega ni moimoi malua, ka sega ni levei ni dua na ka me ivakaraitaki ni noda sa rere. Na yalovosota e kena ibalebale wawa ka vosota vakadede dina. E kena ibalebale ni vosota toka e dua na ka … ke bera madaga kina ni yaco ni lomada. Na Yalovosota e sega walega ni vosota vakadede; ia sa vosota vakadede vakavinaka!“
Ena noda bula taumada, e a vakarautaka na Tamada Vakalomalagi e dua na ituvatuva me baleti keda—na Luvena vakayalo—ka da kaila ena marau ena noda sa na lako mai ki vuravura (raica na Jope 38:7). Ni da sa digitaka meda semata na lomada ki-na Yalona ena noda sa mai tu oqo e vuravura, “o Koya ena qai vakayagataki [keda] e [Ligana] mera vakabulai kina na tamata” (Alama 17:11).
Tomana o Peresitedi Uchtdorf, “Na yalovosota e kena ibalebale me ciqomi na ka sa sega ni rawa ni veisautaki ka tu vakarau mo sotava ena kaukauwa, loloma veivueti kei na vakabauta. E kena ibalebale na noda sa soli keda kece kina veika e vinakata na Turaga me vakayacora vei [keda] me vaka saraga e dua na gonelailai ni talairawarawa vei tamana” [Mosiah 3:19]. Sa kena ibalebale ga ni yalovosota na dei kei na gugumatua ka sega ni dau veisau vakarawarawa ena maroroi ni ivunau ni Turaga’ [1 Nifai 2:10] ena veiaua ena veisiga kevaka sara mada ga me dredre.1
iKuri ni iVolanikalou
Mai na iVolanikalou
E tukuna vei keda na ivolanikalou ni ena noda bula tiko e vuravura, meda na saga meda, “dau vosota na dredre, ni na levu eda na sotava.” “Mo dau vosota sara, raica ena yaco vei iko e vuqa na ka ni veivakararawataki; ia mo vosota ga, raica au na tiko ga kei iko ena gauna taucoko ni nomu bula” (V&V 24:8).
Na italanoa mai na iVolatabu oqo ena vakaraitaka na vosota kei na vakabauta.
A sa dua na yalelwa sa turidrabalavu ka yabaki tinikarua … a sa tara na tutu ni isulu ni [Karisito] a sa mudu vakasauri na idavedave ni nona dra.
A sa kaya ko Jisu, … Sa dua sa tarai au niu vakila ni kaukauwa sa lako tani vei au.
“Ia, ni sa kila na yalewa ni sa na sega ni vuni sa lako mai sa cuva sobu vua ka tukuna e matadra kecega na lewe vuqa naka sa tarai koya kina kei na nona sa bula vakasauri kina.
“A sa kaya vua, Tu cake mo lako ga, sa vakabulai iko na nomu vakabauta.” (Luke 8:43–48).
Me vakataki koya na yalewa, sa na rawa ni da na vakalougatataki ka vakalomavinakataki ka vakabulai sara kina ni da sa semati keda vei Jisu Karisito—ni sa Nona Veisorovaki ga ena vakabulai keda.
© 2015 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/14. Vakadonui me vakadewa: 6/14. Vakadewa ni Visiting Teaching Message, March 2015. Fijian. 12583 858
Vakasamataka Oqo
Mai na veika e vola o Luke 8, e a vakalougatataki vakacava na yalewa oqo mai vei Jisu Karisito ni sa vosota tu mai ena vica vata na yabaki na kena mate.