Etinda ya Bakambi ya Yambo, Sanza ya Misato 2015
Tozingami kati ya Maboko na Ye ya Boboto
Lokola basusu mingi, nafulami mbala na mbala na misala kitoko ya maboko mpe miziki. Libaku moko ya lolenge oyo ezalaki ntango natelemaki liboso ya etando makasi esalami na Frans Schwarz moyemi ntoki ya mboka Danemark na nkombo The Agony in the Garden.1
Elilingi kitoko ya etando ya mawa oyo elakisi Mobikisi ya kofukama na elanga ya Getesemane. Lokola azali kosambela, anzelu moko atelemi penepene na Ye, kozingaka Ye na maboko ya boboto, kopesaka Ye lilendisi, lisungi ya lola, mpe lisalisi.
Molai ya ntango natalaki etando oyo, mingi koleka nayokaki bolingo mpe botondi kati ya motema mpe makanisi na ngai. Nakoki koyoka, na moke, nini yango esengelaki kozala wana ntango Mobikisi abandaki mosala na Ye ya monene ya kokokisa eteni ya bokufi na komemaka likolo na Ye moko masumu ya mokili. Nakamwaki na bolingo ezanga nsuka mpe mawa ya Tata mpo na bana na Ye. Natondisami na botondi ya mozindo mpo na oyo Mwana se moko oyo azanga lisumu asalaki mpo na bato nionso mpe mpo na ngai.
Libonza ya Mwana ya Nzambe.
Mobu nionso na eleko oyo tosepelaka mpe tomaniolaka likabo oyo Yesu Klisto apesaki mpo na bato nionso.
Oyo Mobikisi asalaki kobanda na Getesemane kokende na Gologota mpo na biso eleki mayele ya bososoli na ngai. Azuaki likolo na Ye moko mokumba ya masumu na biso mpe afutaki lisiko ya libela mpe ya makasi kaka mpo na mobeko oyo Adama abukaki na ebandeli te kasi lisusu mpo na masumu mpe bobuki mibeko ya nkoto na nkoto ya milimo oyo esila kozwa bomoi. Mbeka oyo ya seko, ya bule esalaki ete “kutu Nzambe, oyo aleki banso na monene, alenga mpo na mpasi, mpe atangisa makila na lidusu moko moko ya mposo na ye, mpe ayoka mpasi na nzoto mpe molimo” (D&A 19:18).
Amonaki mpasi mpo na ngai.
Amonaki mpasi mpo na yo.
Molimo na ngai etondisami meke na botondi ntango natali motuya mpe ntina ya mbeka oyo. Epesi ngai bomikitisi ya koyeba ete baoyo nionso bandimi likabo oyo mpe bakitisi mitema na bango epai na Ye bakoki kolimbisama mpe kopetolama na masumu na bango, atako molili monene ya masumu na bango to bozito koluta ya mikumba na bango.
Tokoki mbala moko lisusu kokoma bato oyo bazangi mbindo mpe bato ya peto. Tokoki kosikolama na libonza ya seko ya Mobikisi na biso ya bolingo.
Nani Akolendisa Biso?
Atako moko te kati na biso akonyokwama na bozindo lokola Nkolo na biso anyokwamaki, moko na moko kati na biso akozala na bangonga na biso moko—ya molili mpe ya bololo ntango mpasi mpe mawa ekoki kokoma monene koleka makasi na biso. Ekozala na bangonga wapi bozito mpe soni ya masumu na biso ekobima na lolenge moko ezanga mawa likolo na biso.
Atako bongo, soki tokotombola mitema na biso epai ya Nkolo na bangonga yango, na bosolo Akoyeba mpe Akososola. Ye oyo anyokwamaki na kozangaka litomba mpo na yemei kasi mpo na biso kati na elanga mpe likolo ya ekulusu akotika biso te na kozangaka sikawa kosunga biso. Akolendisa, akopesa biso mpiko, mpe akopambola biso. Akozinga biso na maboko na Ye ya boboto.
Epai na biso akozala mingi koleka anjelu.
Akomemela biso lipamboli elenda, libiki, elikya, mpe bolimbisi.
Mpo ete Azali mobikisi na biso.
Mokangoli na Biso.
Mobikisi na Biso atonda na mawa mpe Nzambe apambolama na biso.
© 2015 na Intellectual Reserve, Inc. Lotomo nionso na bakomi. Ebetami na USA. Bondimami na lokota ya Angele: 6/14. Bobongoli endimami: 6/14. Bobongoli na First Presidency Message, March 2015. Lingala. 12583 639
Koteya uta na Etinda oyo
Yambo boteya, boluka bokambami ya Molimo mpo na kosunga bososola bonsenga ya solosolo ya baoyo yo bozali koteya. Ntango bozali kokabola biteni kowuta na etinda ya Mokambi Uchtdorf, pesa litatoli ya Mobikisi mpe libonza na Ye ya bosikoli. Kanisa kotuna na baoyo bozali koteya nini Bomikabi na Ye elakisi mpo na bango mpe boniboni bango bayokaki lilendisi ya Nkolo na ntango na bango ya “molili mpe ya mpasi makasi.”