Ennaan eo an Būreejtōnji eo Kein Kajuon, M̧aaj 2015
Pein Iakwe eo An Ej Jepooļ
Āinwōt ro jet rellōn̄, ekkā aō en̄jake jān jerbal ko raiboojoj an jin̄a im al. Juon iien ke iaar jutak im̧aan juon jin̄a eaiboojoj im kar kōm̧m̧an jān rijin̄a in Danish eo Frans Schwarz taitōļ eo an The Agony in the Garden.1
Jin̄a in eaiboojoj ej kwaļo̧k an Rilo̧mo̧o̧r eo būkwelōlō ilo Jikin Kallib in Gethsemane. Ke Ej jar, juon enjeļ ej jutak iturin, erļo̧keļo̧k pein n̄an E ilo pein jouj, kaenōm̧m̧an E, jipan̄ jān lan̄, im rie.
Toon wōt aō joļo̧k eļap iien ilo jin̄a eo, eļapļo̧k en̄jake ko rem̧m̧an im eļapļo̧k kam̧m̧oolol ko rej itok ilo būruwō im ļōmņak eo aō. Imaron̄ en̄jake, ilo wāween eo edik, ta eo emaron̄ kar āinwōt n̄e iaar pād ke Rilo̧mo̧o̧r eo eaar jino kōjem̧ļo̧k jerbal eo An eļap ilo mour in jān bōk Ioon Make jerawiwi ko an laļ in. Ij bwilōn̄ kōn iakwe eo eļap im tūriam̧o eo an Jemād n̄an ajri ro Nejin. Ij obrak kōn eļap kam̧m̧oolol kōn ta eo Nejin eo ejjeļo̧k an jerawiwi eaar kōm̧m̧ane n̄an aolep armej im n̄an n̄a.
Katok eo an Nejin Anij
Kajjojo iiō ilo ilo iien in jej keememe im kejōkļo̧kjeņ kōn katok eo Jisōs Kraist eaar kōm̧m̧ane n̄an aolep armej.
Ta eo Rilo̧mo̧o̧r eo eaar kōm̧m̧ane jān Gethsemane n̄an Golgotha ilo etad ej ilōn̄ in aō maron̄. Eaar bōk ioon Make eddo in jerawiwi ko ad im kar kōļļāik juon wōnāān eo ejjeļo̧k jem̧ļo̧kin im epen, jab wōt n̄an wōtlo̧k eo an Adam kōn bilien im bilien jetōb ko raar mour. Katok in ejjeļo̧k jem̧ļo̧kin, ekwojarjar kar kōm̧m̧an eo eaar ken̄taan E, aaet Anij, Eļaptata iaan aolep, n̄an wididdid jen wōt metak, im to̧o̧rļo̧k bōtōktōk jān aolep ron̄ in menokaduin, im en̄taan jim̧or ilo ānbwin im jetōb (lale D&C 19:18).
Eaar en̄taan kōn n̄a.
Eaar en̄taan kōn kwe.
Aō eobrak kōn kam̧m̧oolol n̄e ij joļo̧k iien eaitok kōn meļeļe in eaiboojoj an katok in. Ij kōttāik eō n̄an jeļā bwe aolep ro rej bōk menin letok in im lelaļļo̧k būruweer n̄an E maron̄ jeorļo̧k ruwāer im erreo jān jerawiwi ko aer, jekdo̧o̧n ewi jon̄an marok in kōkkaļļe eo aer ak ewi jon̄an eddoin abōņōņō eo aer.
Jemaron̄ kōm̧m̧an ad jab libijinjin im bar juon alen erreo. Jemaron̄ pinmuur jān katok indeeo eo an Rilo̧mo̧o̧r eo ejitōn bōro.
Wōn eo Enaaj Kaenōm̧m̧an Kōj?
Men̄e ejjeļo̧k iaad enaaj maron̄ en̄jake m̧wilaļ in ta eo Irooj eaar en̄taan kake, kōj kajjojo enaaj wōr ad make iien emarok im awa ko reppen—iien būromōj ko ad im ad limō emaron̄ waļo̧k āinwōt eļapļo̧k jen ad maron̄ bōke. Enaaj wōr iien ko n̄e eddo eo im ajļo̧k eo kōn jerawiwi ko ad renaaj joon tok kōj.
Mekarta, n̄e jenaaj kotak būruwōd n̄an Irooj ilo iien rot kein, em̧ool E ejeļā im meļeļe. E eo eaar en̄taan make iaan kōn kōj ilo jikin kallib im ioon dōbwāāl eo E ej jamin naaj kōtļo̧k ad būrom̧ōj kiiō. E enaaj kōkajoorļo̧k, rōjan̄, im kōjeram̧m̧an kōj. Enaaj kabooļe kōj kōn pein iakwe eo An.
E enaaj ļapļo̧k jen juon enjeļ n̄an kōj.
Enaaj letok n̄an kōj kaenōm̧m̧an, kōmour, kōjatdikdik, im jeorļo̧k bōd.
Bwe E ej ad Ripinmuur.
Ad Rilo̧mo̧o̧r.
Ad Rilo̧mo̧o̧r etūriam̧o im ad Anij ejouj.
© 2015 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo kajin English: 6/14. Kōmālim an ukook: 6/14. Ukook eo an First Presidency Message, March 2015. Marshallese. 12583 874
Katakin jān Ennaan in
M̧okta jen am̧ katakin, pukōt tōl eo an Jetōb n̄an jipan̄ eok meļeļe aikuj ko kajjojo an ro kwoj katakin. Ilo am̧ kwaļo̧k m̧ōttan eo edik bōk jān ennaan eo an Būreejtōn Uchtdorf, kwaļo̧k naan in kam̧ool kōn Rilo̧mo̧o̧r eo im An katok in pinmuur. Ļōmņak in kajjitōk ippān ro kwoj katakin ta meļeļein Pinmuur eo An n̄an er im ewi wāween aer kar en̄jake kaenōm̧m̧an eo an Irooj ilo iien “ko aer remarok im awa ko reppen.”