Naan in Katak an Kōrā. M̧aaj 2015
Jekjek in Mour eo an Jisōs Kraist: Meanwōd im Kijenmej
Kanooj jar ilo ekkatak kōn katak in im pukōt n̄an jeļā ta eo n̄an kwaļo̧k. Ekōjkan naaj meļeļe mour eo im mijen eo an Rilo̧mo̧o̧r eo ej kōļapļo̧k tōmak eo ami ilo E im kōjeram̧m̧an ro kwoj (bōk eddoier) mije er kōn naan in katak an kōrā? N̄an meļeļe ko reļļapļo̧k, etal n̄an reliefsociety.lds.org.
Tōmak, Baam̧le, Deeor
Kijenmej ekkā ļōmņake āinwōt juon m̧wil ejej an naan, kadkad in m̧wil, ak āinwōt Būreejtōn Dieter F. Uchtdorf, Rikakpilōklōk eo Kein Karuo ilo Būreejtōnji eo Kein Kajuon, eaar ba, “Kijenmej ej jab m̧wil in ad em̧m̧akūt, barāinwōt ej jab likjab in m̧akūtkūt in ad mijak. “Kijenmej meļeļein niknik ilo kōttar im kijenmej. Ej meļeļein pād wōt ippān juon men … aaet n̄e ikdeleel eo an būruwōd ej rum̧ijļo̧k. Kijenmej ej jab baj niknik; ej lukkuun niknik!”
Ilo mour eo ad m̧okta, Jemedwōj Ilan̄ eaar karōk juon karōk n̄an kōj—Ajri in Jetōb ro Nejin—im jaar lamōj kōn lan̄lōn̄ kōn iien in em̧m̧an n̄an itok n̄an laļ in (lale Job 38:7). Ilo ad kālet n̄an kajejjet ankilaad ippān Ankilaan ilo mour in, E “Enaaj kōm̧m̧ane eok kein jerbal ilo peiū n̄an lo̧mo̧ren an elōn̄ armej” (Alma 17:11).
Būreejtōn Uchtdorf eaar wōnm̧aanļo̧k wōt, “Kijenmej meļeļein bōk men eo ej jab maron̄ oktak im ej jelm̧ae kōn peran, tūriam̧o̧, im tōmak. Ej meļeļein ‘m̧ōņōņō in ajeļo̧k e n̄an aolep men ko Irooj ej lo ekkar n̄an kaddoik [iood], em̧ool āinwōt juon ajri ej ajeļo̧k e n̄an jemān’ [Mosaia 3:19]. Eļaptata, kijenmej ej meļeļein ‘pen im dim, im ban m̧akūtkūt ilo kōjparok kien ko an Irooj’ [1 Nipai 2:10] aolep awa ilo aolep raan, men̄e ej pen n̄an kōm̧m̧ane.”1
Bar jet eoon ko
Jān Jeje ko Rekwojarjar
Jeje ko rekwojarjar rej jiron̄ kōj bwe ilo mour in ad ilaļ in, bwe jej aikuj in kijenmej ilo en̄taan ko, bwe jenaaj ioon elōn̄. Anij ej letok n̄an kōj kalim̧m̧ur in kaenōm̧m̧an in bwe jej aikuj kijenmeji, bwe Irooj ej pād ippād, aaet m̧ae jem̧ļo̧kin raan ko ad (lale D&C 24:8).
Bwebwenato in ilo Baibōļ ej juon waanjon̄ak in kijenmej im tōmak.
“Im juon kōrā, ar to̧o̧r ļo̧k bōtōktōkin ium̧win jon̄oul im ruo iiō … un̄n̄ūr tōrerein nuknuk ko An [Kraist]: im e mōkaj an jako an bōtoktōk to̧o̧r ļo̧k.
“Im Jisōs e ba, … juon en ear un̄n̄ūr Eō, bwe I ar jeļā kōn an kajoor ilo̧k jān Eō.
“Im ke kōrā eo ej lo e jab tilekek, ej itok im wūdiddid, im bun̄ im̧aan, im kwaļo̧k im̧aan mejān armej otemjej, kōn unin an un̄n̄ūr E, im kōjkan e m̧ōkaj an mour.
“Im E ba n̄an e, Nejū, am̧ tōmak ear kemour eok; kwōn ilo̧k ilo aenōm̧m̧an” (Luk 8:43–48).
Āinwōt liin, jemaron̄ loe kōjeram̧m̧an ko im aenōm̧m̧an, im em̧ool kōmour, ilo ad pukōt ļo̧k Jisōs Kraist—eo Pinmuur eo emaron̄ kōmour kōj.
© 2015 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo kajin English: 6/14. Kōmālim an ukook: 6/14. Ukook eo an Visiting Teaching Message, March 2015. Marshallese. 12583 874
Ļōmņak kōn Menin
Jān bwebwenato eo ilo Luk 8, ekōjkan an kōrā in kijenmej e iiō ko innām tōmak eo an ilo Jisōs Kraist eaar kōjeram̧m̧ane?