Agtutubo
Maysa a kas ken ni Sarah
Agnaed ti nagsurat iti Utah, USA.
Sigud a marigatanak a mangusar kadagiti pammatik kas sungbat iti maysa a saludsod kas kasimple ti “Apay a saanka nga umin-inum iti kape?” Iti napalabas ipambarko no kua kas “Napait unay” wenno “Diak magustuan ti ramanna.”
Apay a mabainak? Apay a mabutengak unay a mangitakder iti no ania ti patpatiek? Ti pannakalagipko itan, diak talaga maawatan no ania ti nagbutngak. Ngem naan-anay a maawatakon idi insardengkon ti panagpambarko.
Maysa nga aldaw iti klasek iti Ingles iti haiskul, impakaammo ti mangisursuro nga agbuyakami iti maysa a paset ti pabuya iti TV nga ammok a di rumbeng a buyaek. Idinto ta agdirdir-i iti gagar dagiti dadduma nga estudiante, ingngato ni Sarah ti imana ket indawatna no mabalinnan ti pumanaw.
Idi saludsoden ti manursuro kenkuana no apay, insungbat ni Sarah ti maysa a banag nga adda kinapudnona,“Agsipud ta siak ket Mormon, ken saanak nga agbuybuya kadagiti nalaad a pabuya.”
Ti turedna a nagtakder iti sanguanan ti klase ket makapasiddaaw. Agyamanak ken ni Sarah, timmakkderak met ken nagurayak iti ruar nga addaan iti nadalus a konsensia agingga a malpas ti pabuya.
Agnanayon a nagbalbaliwak. Inrugik ti nangilawlawag kadagiti pammatik imbes a panangliklik iti pagsasaritaan. Ken kas bungana, nakasarakak iti panagtalek iti bagik ken ad-addan ti pannakidanggayko kadagiti aktibidad iti Simbaan ken iti pagadalan.
Diak pulos imbaga ken ni Sarah no kasano ti kinapategna kaniak daydi a pagwadanna, ngem padasek a tuladen ti pagawadanna iti panagtalek. Naamirisko itan a ti maysa a kameng ti nakaskasdaaw, sagrado a Simbaan ti Dios ket awan a pulos ti inna pagbainan. Sapay koma ta kabaelak, babaen ti pagwadak, ti agbalin a maysa a kas ken ni Sarah.