Mensahe ti Umuna a Panguluen, Abril 2015
Yawag ni Presidente Monson ti Tured
Kalablabas ti maysa nga oras, napaliiw ni Presidente Thomas S. Monson, ngem naawagantayo nga agaramid kadagiti pili ti maysa a kita wenno sabali.
Tapno makaaramid kadagiti nasirib a pangngeddeng, imbalakadna, kasapulantayo ti tured—“ti tured a mangisao iti saan, ti tured a mangisao iti wen. Dagiti desision ti mangikeddeng iti pagtungpalantayo.”1
Iti sumaganad nga adaw, ipalagip ni Presidente Monson kadagiti Santo iti Ud-udina nga Aldaw a kasapulanda ti tured a mangitakder iti kinapudno ken kinalinteg, mangitandudo iti no ania ti patienda, ken mangsaranget iti lubong a mangum-umsi kadagiti agnanayon nga ik-ikkan pateg ken prinsipio.
“Kanayon nga umay iti tunggal maysa kadatayo ti awag iti tured,” kinunana. “Kankanayon ken kankanayonto latta”2
Ti Tured ti Mangisangbay iti Pananganamong ti Dios
“Maipasangotayto amin iti panagbuteng, mapadasantayto ti maumsi, ken sabtentayonto ti pannakasuppiat. Maaddaantayo koma—datayo amin—iti tured a magsuppiat iti napagnunumuan ti kaaduan, ti tured a mangitakder iti prinsipio. Ti tured, saan a kompromiso, ti mangisangbay iti isem iti pananganamong ti Dios. Ti tured ket agbalin a nabiag ken addaan iti makaayayo a saguday no maibilang daytoy a saan laeng a tay panangaklon ti kinamalalaki nga ipapatay no di ketdi pay kas maysa a determinasion nga agbiag a sidadayaw. Iti intay panagtultuloy, ikalikagumtayo ti agbiag a kas rumbeng, awan duadua nga maawattayo ti tulong manipud iti Apo ken mabirukantayo ti liwliwa kadagiti balikasna.”3
Agibtur nga addaan iti Tured
Ania ti kaipapanan ti agandur? Magusgustuak daytoy a kaipapanan: ti agibtur nga addaan iti tured. Mabalin a kasapulanyo ti tured tapno mamati; kasapulanyonto daytoy bayat ti panagtungpalyo. Awan duadua a kasapulanto unay daytoy iti panaganduryo agingga iti dayta nga aldaw a panawanyonto daytoy mortal a panagbiag.”4
Maaddaan iti Tured a Mangitakder iti Kinapudno
Maaddaankayo [koma] iti tured a sititibker a mangitakder iti kinapudno ken kinalinteg. Gapu ta ti ayo iti kagimongan ita ket adayo kadagiti ik-ikkan pateg ken prinsipio ti Apo nga intedna kadatayo, napasingkedanen ti inkay pannakaawag tapno itandudo no ania iti patienyo. Malaksid no sititibker a naimula dagiti ramut ti pammaneknekyo, marigatankayto a mangibtur iti umsi dagiti mangsubok iti pammatiyo. No sititibker a naimula, ti pammaneknekyo iti ebanghelio, iti Mangisalakan, ken iti Nailangitan nga Amatayo ket mangaringto iti amin nga aramidenyo iti unos ti panagbiagyo.”5
Kasapulantayo ti Naespirituan ken Naindayawan a Tured
“Dagiti mensahe a nailadawan iti telebision, kadagiti sine, ken iti sabali pay a media [ita] ket masansan unay a kasupadi dayta kayattayo nga arakupen ken ipateg dagiti annaktayo. Pagrebbengantayo saan laeng a mangisuro kadakuada nga agbalin a nasalun-at iti espiritu ken doktrina no di ket tulongan pay ida nga agtalinaed iti kasta a wagas, iti laksid kadagiti puersa iti ruar a mabalin a pakaipasanguanda. Kasapulanto daytoy ti adu a panawen ken panangikagumaanantayo—ken tapno matulongantayo dagiti sabsabali, kasapulantayo mismo ti naespirituan ken naindayawan a tured a mangsarked iti dakes a makitatayo iti tunggal bangir.”6
Agbalintayo Koma a Kanayon a Natured
“Iti panagbiagtayo iti inaldaw-aldaw, di mapengdan ti pannakasuot ti pammatitayo. No dadduma makitatayo ti bagbagitayo a napalawlawan kadagiti sabali a tattao ngem nakatakdertayo iti bassit nga ummong wenno agmaymaysatayo a mangitaktakder iti no ania ti maikanatad wenno saan. …
“Agbalintayo koma a natured ken nakasagana a mangitakder iti no ania ti patientayo, ken no nasken nga agmaymaysatayo a mangitakder kabayatan ti panagtultuloy, maaramidtayo koma daytoy a situtured, a napapigsa iti pannakaammo nga iti kinapudnona saantayo nga agmaymaysa iti kaano man no agtakdertayo a kaduatayo ti Amatayo iti Langit.”7
© 2015 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/14. Pannakaanamongna a maipatarus: 6/14. Pannakaipatarus ti First Presidency Message, April 2015. Ilokano. 12584 864
Panangisuro manipud iti Daytoy a Mensahe
Mabalinyo a dawaten kadagiti sursuruanyo a mangpanunotda iti maysa a situasion iti umay a lawas—iti pagtaengan, iti trabaho, iti eskuela, wenno iti simbaan—a mamagkasapulan kadakuada nga agtignay nga addaan iti tured. Mabalin a sanguenda ti panagbuteng, agandur iti maysa a banag a mapannubok, mangitakder kadagiti pammatida, wenno mangikeddeng nga agtungpal a naan-anay iti maysa a pagbatayan ti ebanghelio. Awisenyo ida a mangibinglay kadagiti kapanunotanda wenno mangisurat kadagitoy.