Mensahe iti Visiting Teaching, Abril 2015
Dagiti Kababalin ni Jesucristo: Saan a Manangallilaw wenno Managinsisingpet
Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawatyo iti biag ken mision ti Mangisalakan ket mangpapigsa iti pammatiyo Kenkuana ken mangparabur kadagiti ay-aywananyo babaen ti visiting teaching? Para iti ad-adu pay nga impormasion, mapan iti reliefsociety.lds.org.
Pammati, Pamilia, Tulong
Iti pannakaawattayo a saan a manangallilaw ken managinsisingpet ni Jesucristo ket makatulongto kadatayo a sipupudno a mangikarkarigatan a surotentayo ti pagwadanna. Elder Joseph B. Wirthlin (1917–2008) ti Korum dagiti Sangapulo-ket-dua nga Apostol kinunana: “Ti mangallilaw ket mangloko wenno mangyaw-awan. … Ti tao a saan a manangallilaw ket tao nga inosente, pudno ti panggepna, ken nadalus dagiti gandatna, a ti biagna mangyanninaw iti simple nga aramid iti panangitunosna kadagiti inaldaw a tingnayna kadagiti pagbatayan ti integridad. … Mamatiak iti kinapategna para kadagiti miembro ti Simbaan ti agbalin a saan a manangallilaw ket mabalin a nasnasken itan ngem iti dadduma a gundaway gapu ta adu ditoy lubong ti saan a makaawat iti kinapateg daytoy a saguday.”1
Maipapan ti panaginsisingpet, kinuna ni Presidente Dieter F. Uchtdorf, Maikadua a Mammagbaga iti First Presidency kinunana: “Awan kadatayo ti naan-anay a kas ken ni Cristo kas iti ammotayo a nasken koma a pagbalinantayo. Ngem napasnek ti tarigagaymi a mangatur kadagiti babakmi ken ti mabalin a panagbasolmi. Iti puso ken kararuami tarigagayanmi ti agbalin a nasaysayaat babaen ti tulong ti Pannubbot ni Jesucristo.”2
Ammomi a “maukomtayonto a mayannurot kadagiti tignaytayo, dagiti tarigagay ti puspusotayo, ken ti kita ti tattao a nagbalinantayo.”3 Ngem no ikarigatantayo ti agbabawi, agbalintayo a natartarnaw—ken “nagasat dagiti natarnaw ti panagpuspusona: ta makitadanto ti Dios” (Mateo 5:8).
Dagiti Mainayon a Nasantuan a Kasuratan
Manipud kadagiti Nasantuan a Kasuratan
Saan a manangallilaw dagiti babassit nga ubbing. Kinuna ni Jesucristo: “Bay-anyo dagiti babassit nga ubbing nga umayda kaniak, ket dikay pawilan ida: ta dagitoy isuda dagiti agtagikua ti pagarian ti Dios. … Ket inarakupna [dagiti ubbing], impatayna kadakuada dagiti im-imana, ket binendisionanna ida” (Marcos 10:14, 16).
Nagministro pay ni Cristo kadagiti ubbing iti America kalpasan ti Pannakailansana iti krus. Imbilinna nga ipan dagiti tao dagiti babassit nga annakda Kenkuana ket “indissoda ida iti daga iti aglawlawna, ket nagtakder ni Jesus iti tengnga; …
“… [Ket] nagsangit idi naisawangna dagitoy a balikas, ket pinaneknekan ti ummong daytoy, ket inubbana dagiti ubbingda, a sinaggaysa, ken binendisionanna ida, ken inkararaganna ida iti Ama. …
“Ket idi kumitada naiturong dagiti matada iti langit, ket naimatanganda ti panaglukat ti langit, ket nakitada dagiti anghel a bumabbaba manipud iti langit a kasla adda iti tengnga ti apuy; ket bimmabada ken linawlawda dagiti ubbing, … ket tinulongan ida dagiti anghel” (3 Nephi 17:12, 21, 24).
© 2015 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/14. Pannakaanamongna a maipatarus: 6/14. Pannakaipatarus ti Visiting Teaching Message, April 2015. Ilokano. 12584 864
Ibilang Daytoy
Ania ti masursurotayo maipapan ti panangallilaw manipud kadagiti babassit nga ubbing? (Kitaen iti Pangiwanwan iti Nasantuan a Kasuratan, “Allilaw.”)