Mensahe sa Visiting Teaching
Mga Kinaiya ni Jesucristo: Pagkamatarong
Tun-i sing mainampuon ining materyal kag magpangamuyo agud mahibaloan kon ano ang ipaambit. Paano ang paghangop sa kabuhi kag misyon sang Manluluwas makapadugang sang inyo pagtuo sa Iya kag magabugay sa ila nga inyo ginabantayan paagi sa visiting teaching? Para sa dugang nga impormasyon, maglog-on sa reliefsociety.lds.org.
Pagtuo, Pamilya, Bulig
“Tugoti ang pagkamatarong nga magpuno sang imo panghuna-huna sing wala untat; nian ang imo pagsalig magabakod sa presensya sang Dios; kag ang doktrina sang priesthood magatinlo sang imo kalag kasubong sang mga tun-og gikan sa langit.” (D&C121:45).
Ano ang pagkamatarong? Si Pangulong James E. Faust (1920-2007) nagsiling: Ang pagkamatarong sa bug-os sini nga kahulugan nagalakip sang tanan nga kinaiya sang kaayo nga nagabulig sa aton sa pagporma sang aton pamatasan.”1 Si Pangulong Gordon B. Hinckley (1910–2008) nagdugang: “Ang pagpalangga sa Dios amo ang ginahalinan sang tanan nga pagkamatarong, sang tanan nga kaayo, sang tanan nga kalig-on sang pamatasan.”2
Nahanungod sa kaangtanan sa tunga sang mga babayi kag sang pagkamatarong, si Elder D. Todd Christofferson sang Korum sang Napulo’g Duha ka mga Apostoles nagsiling: “Ang mga babayi nagadala sa kalibutan sang isa ka sahi sang pagkamatarong, isa ka langitnon nga dulot nga nagahimo sa ila nga sagad sa pagtudlo sang mga kinaiya pareho sang pagtuo, kaisog, paghangop sa balatyagon sang iban, kag kasampaton sa mga kaangtanan kag sa mga kultura. …
“Mga sisters, sa tanan sang inyo mga kaangtanan, ang inyo relasyon sa Dios, ang inyo Amay nga Langitnon, nga amo ang ginahalinan sang inyo moral nga gahum, ang dapat ninyo pirme unahon sa inyo kabuhi. Dumduma nga ang gahum ni Jesus nag-abot paagi sa Iya malig-on nga debosyon sa pagbuot sang Amay. … Magtinguha nga mangin kasubong sina nga klase sang disipulo sang Amay kag sang Anak, kag ang inyo impluwensya indi gid maglus-aw.”3
Dugang nga Balaan nga mga Kasulatan
Mga Salmo 24:3–5; Mga Taga-Filipo 4:8; 2 Pedro 1:3–5; Alma 31:5; D&C 38:23–24
Gikan sa Balaan nga mga Kasulatan
Sa karon nga panahon, ang matarong nga mga babayi, nga napun-an sang pagtu-o, nagadab-ot sa Manluluwas. Sa Lucas 8 mabasa naton ang parte sa isa ka babayi nga may tagas sang dugo sa sulod sang 12 katuig nga indi mapaayo. “Nagpangita sia sang pagpang-ayo sang sia nagpalapit sa likod [ni Cristo], kag nagtandog sang sidsid sang iya kunop: kag sa gilayon natugon [nauntat] ang pagtagas sang iya dugo. … Kag si Jesus nagsiling, May isa nga nagtandog sa akon: kay nabatyagan ko nga ang gahum4 naggwa sa akon.” Ining matarong matinuohon nga babayi nagyaub sa Iya atubangan, nag-asoy [sa Iya] sa atubangan sang tanan nga katawhan” nga “nagtandog sia sa iya” kag “nag-ayo sia gilayon. Kag nagsiling sia sa iya, Anak, magpakaisog: ang imo pagtuo nag-ayo sa imo” (tan-awa saLucas 8:43–48 tan-awa man sa 6:17–19).
Paagi sa Iya pagkamatarong,5 si Cristo makapang-ayo, makabulig, makapabakod, makapaumpaw, kag makapalipay kon pilion naton nga may kaisog kag pagtuo nga magdab-ot sa Iya.
© 2015 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/14. Petsa sang pagtugot sa paglubad: 6/14. Paglubad sang Visiting Teaching Message, June 2015.Hiligaynon. 12586 861
Binagbinaga Ini
Paano ang pagkamatarong nagabulig kag nagapabakod sa aton?