Mensahe sang Unang Panguluhan, Hunyo 2015
Ang Pamilya MahimoMag-inupdanay singWala’y Katapusan
Ang gahum sang priesthood sa pagbugkos sang mga pamilya sing wala’y katubtuban isa sang pinakadaku sa mga regalo sang Dios. Ang tagsa ka tawo nga nakaintiyendi sang plano sang kaluwasan nagahandum sinang nagapabilin nga bugay. Sa nagahugpong gid lang nga mga seremonya nga ginahikot sa napahanungod nga mga templo sang Ang Simbahan ni Jesucristo sang mga Santos sa Ulihing mga Adlaw nga ang Dios nagatanyag sang promisa nga ang mga pamilya mahimo nga mabugkos sing ululupod sa katubtuban.
Ang mga yabi sang priesthood nga nagahimo sini nga posible ginpanumbalik sa duta ni propetang Elijah kay Joseph Smith sa templo sa Kirtland. Yadtong mga yabi sang priesthood dalayon kag wala’y untant nga ginpasa paagi sa buhi nga mga propeta sa Ang Simbahan ni Jesucristo sang mga Santos sa Ulihing mga Adlaw tubtob sa karon.
Ang Manluluwas sa Iya dutan-on nga pag-alagad naghambal parte sa gahum sa paghugpong sang mga pamilya sa pamulong kay Pedro, ang Iya angulo nga Apostoles, sang Sia nagsiling, “Sa pagkamatuod, nagasiling ako sa inyo, bisan anong inyo gapuson sa duta gapuson sa langit: kag ang bisan ano nga inyo hubaran sa duta hubaran sa langit” (Mateo 18:18).
Sa selestiyal nga ginharian gid lang nga sarang kita magpangabuhi sa mga pamilya sa katubtuban. Didto mahimo kita magkabuhi upod sa mga pamilya sa presensya sang aton Amay nga Langitnon kag sang Manluluwas. Ang Propetang si Joseph Smith naglarawan sinang manami nga eksperiyensya sa sini nga paagi sa Doctrine and Covenants:
“Kon ang Manluluwas magkari makita naton sia kon ano gid sia. Makita naton nga isa man sia ka tawo kasubong naton.
“Kag ang amo man nga pag-inupdanay nga nagapatunga sa aton diri magapatunga sa aton didto, ugaling pagaupdan ini sang wala’y katapusan nga himaya, nga inang himaya wala pa naton naekperiyensiyahan sa karon”. (D&C 130:1–2).
Ining balaan nga kasulatan nagapahayag nga sarang kita magdab-ot nga may pagsalig para sa langitnon nga sulukdan sa aton mga relasyon sa sulod sang panimalay. Mahimo kita mag-ulikid sing husto sa mga miyembro sang aton pamilya, sa buhi kag minatay, sa paghimo sang tanan nga aton masarangan agud itanyag sa ila ang mga ordinansa sang priesthood nga magabugkos sa aton sa langit.
Madamo sa inyo, bata kag tigulang, ang nagahimo sina. Nagpangita kamo sang mga ngalan sang inyo mga katigulangan nga wala pa nakabaton sang mga ordinansa nga makahugpong sa inyo.
Halos tanan sa inyo may mga buhi nga mga himata nga wala pa nahugpong sa mga pamilya paagi sa gahum sang priesthood. Madamo ang may mga buhi nga himata nga nakabaton sang ordinansa sang priesthood apang wala nagatipig sang mga kasugtanan nga ginhimo nila sa Dios. Ang Dios magapakamaayo sa inyo agud nga makabulig kamo sa pagdab-ot sa tanan sang inyo mga himata nga may pagtuo. May promisa sa inyo nga ginahimo ang Ginuo sa Iya mga disipulo nga nagahikot sa pagdala sang iban sa Iya.
“Kag ang sin-o man ang magbaton sa inyo, mangin yara man Ako, bangud magapanguna ako sa inyo atubangan. Mangin yara Ako sa inyo natuo nga kamot kag sa inyo nawala, kag ang akon Espiritu mangin yara sa inyo mga tagipusuon, kag ang akon mga angheles magapalibot sa inyo, sa pagtib-ong sa inyo” (DC 84:88).
Sa bintana sang akon opisina makita ko adlaw-adlaw ang mga bag-ong kasal nga nagapaltrato sa matahum nga mga bulak kag nagasumpit nga mga fountain. Masami nga ginakarga sang nobyo ang nobya sa iya mga butkon, bisan pila lang ka nagaduyog-duyog nga mga tikang, samtang ang litratista nagakuha sang mga larawan sang kasal. Sa tagsa ka tion nga makita ko ina, ginapanumdum ko ang kilala ko nga mga mag-asawa nga sa malip-ot lang nga panahon—kon kaisa sa tuman kalip-ot nga panahon pagkatapos sang ila kasal—nagakinahanglan nga magkarga sang isa kag isa sa iban nga mga paagi sang ang pangabuhi nangin mabudlay. Ang mga trabaho mahimo madula. Ang kabataan sarang matawo nga may mabug-at nga mga hangkat. Ang balatian mahimo mag-abot. Kag dayon, ang naandan nga mga pamatasan sa paghimo sa iban sang luyag naton nga himuon nila sa aton—sang mas mahapos pa ini—magahimo sa aton nga mga baganihan sa sinang mabudlay nga mga panahon nga magapangayo sang sobra sangsa ginahunahuna naton nga aton masarangan.
Utang naton sa aton mga pamilya ang sahi sang kaangtanan nga madala naton sa presensya sang Dios. Dapat kita magtinguha nga indi maghatag ukon maghupot sang kalain sang buot. Mahimo kita magdesisyon nga magpatawad sing gilayon kag lubos. Mahimo kita magtinguha nga unahon ang kalipayan sang iban labaw sangsa aton. Mahimo kita mangin malulo sa aton panghambal. Sa aton pagtinguha nga himuon ining mga butang, ginaagda naton ang Balaan nga Espiritu sa aton mga pamilya kag sa aton mga kabuhi.
Ang pasalig ko sa inyo amo nga, sa bulig sang Ginuo kag upod ang mahinulsulon nga mga tagipusuon, mahimo naton makita sa sini nga kabuhi ang sahi sang kabuhi nga luyag naton maangkon sa katubtuban Ang Amay nga Langitnon nagapalangga sa aton. Luyag Niya nga makabalik kita sa Iya. Ang Manluluwas, paagi sa gahum sang Iya Pagpasag-uli, nagahimo nga posible sang pagbag-o sa aton mga tagipusuon nga kinahanglanon agud nga makasulod sa balaan nga mga templo, maghimo sang mga kasugtanan nga aton dayon matipigan, kag sa indi madugay magkabuhi upod sa mga pamilya sing wala’y katubtuban sa langitnon nga himaya—nga nakapauli liwat.
© 2015 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/14. Petsa sang pagtugot sa paglubad: 6/14. Paglubad sang First Presidency Message, June 2015. Hiligaynon. 12586 861
Pagtudlo gikan sa Sining Mensahe
Sa imo pagpaambit sang doktrina sang wala’y katapusan nga mga pamilya, hunahunaa ang ginhambal ni Elder Richard G. Scott sang Korum sang Napulo’g Duha ka mga Apostoles: “Magtinguha pirme nga pabakuron ang mga pamilya. Magtudlo nga may panan-awan sang kaimportante sang mga pamilya nga mahugpong sa templo. … Kon may panan-awan kamo sang nagahugpong nga mga ordinansa sang templo, makabulig kamo sa pagpasad sang ginharian sang Dios sa duta” (“I Have Given You an Example,” Liahona, Mayo 2014, 34). Paano ninyo mabuligan ang inyo ginatudloan nga makaangkon sang panan-awan sang kaimportante nga mahugpong sa templo? Agdaha ang inyo mga ginabisitahan nga wala pa mahugpong sa templo nga hambalan ang mga tikang nga sarang nila mahimo padulong sa pag-angkon sinang ordinansa. Agdaha inang mga nahugpong na (sa templo) nga hambalan kon paano nila mapadayon ang panan-awan sang ila wala’y katapusan nga pamilya kag magtrabaho agud mapatin-ad ang ila mga kaangtanan sa isa kag isa.