Lamharon
Naangot sing Wala’y Katapusan sa Akon Pamilya
Ang tagsulat nagaistar sa Utah, Estados Unidos sang Amerika.
Sang gin-adoptar ako sa edad nga tatlo ka tuig, ang akon matuod-tuod nga iloy nagtugot lang nga matigayon ang pag-adoptar kon ang ginakilala ko karon nga mga ginikanan magsugot nga ang mga ordinansa sa Simbahan para sa akon hikuton lang pagkatapos ako mag-edad 12 ka-tuig. Sa iya hunahuna kinahanglan mangin yara na ako sa husto nga edad agud maghimo sang pagpili para sa akon kaugalingon, pero mabudlay gid ang maghulat.
Huo, mabudlay makita nga ang akon mga abyan ginabunyagan pagtungtong nila sa edad nga walo ka tuig, pero mas mabudlay pa gid ang mahibaloan nga indi ako mahugpong sa mga ginikanan nga nag-adoptar sa akon kag sa lima ko ka mga magulang mientras wala pa ako nagtungtong sa edad nga 12 katuig. Nakulbaan ako nga may matabo sa akon kag indi ako mahugpong sa ila.
Sang nagahilapit na ang akon ika-12 nga kaadlawan, nagsugod kami plano para sa akon bunyag kag sa paghugpong sa akon sa pamilya ko. Ginpapili ako sang akon mga ginikanan kon diin nga templo kami ihugpong. Sa akon panumduman ang San Diego California nga templo ang pinakamatahum, gani ang bilog ko nga pamilya nagsugot nga magbiyahe pakadto sa California para sa paghugpong.
Indi na ako makahulat nga mangin kabahin sang wala’y katapusan nga pamilya upod sang akon mga ginikanan kag mga utod. Sa tion sang akon paghugpong, nabatyagan ko ang espiritu sing tuman kabaskog nga mabudlay ini ipabutyag sa mga tinaga. Karon nga nahugpong na ako sa akon pamilya, ang akon mga balatyagon sang kabalaka nabuslan sang kaumpawan kag katawhayan, sa paghibalo nga karon naangot na ako sing wala’y katapusan sa ila.