Mesaj Premye Prezidans lan, Jen 2015
Fanmi kapab ansanm pou tout tan
Pouvwa Prètriz la pou liye fanmi etènèlman an se youn nan pi gwo don Bondye. Chak moun ki konprann plan sali a vin gen gwo dezi pou jwenn benediksyon etènèl sa a. Se sèlman nan seremoni sèlman ki akonpli nan tanp konsakre Legliz Jezikri pou Sen Dènye Jou yo Bondye ofri pwomès ke fanmi kapab liye ansanm pou tout tan an.
Kle prètriz pou rann bagay sa a posib yo te retabli sou tè a palentèmdeyè Eli ki te pote yo bay Joseph Smith nan Tanp Kirtland nan. Kle prètriz sa yo transmèt pa mwayen yon liy dwat atravè pwofèt vivan yo nan Legliz Jezikri pou Sen Dènye Jou yo rive jiska jodia.
Nan ministè li nan mòtalite a, Sovè a te pale sou pouvwa pou sele fanmi yo nan pawòl li te di Pyè, ki sete Apot anchèf li, lè l te di: “An verite, m ap di ou: tout sa ou liye sou tè a ap liye nan syèl la: epi tout sa ou delye sou tè a ap delye nan syèl la” (Matye 18:18).
Se sèlman nan wayòm selès la nou kapab viv anfanmi pou tout tan. Nan kote sa a, nou kapab rete anfanmi nan prezans Papa nou ki nan Syèl la avèk Sovè a. Pwofèt Joseph Smith te dekri eksperyans ekstraòdinè sa a nan fason sa a nan Doktrin ak Alyans yo:
“Lè Sovè a parèt, n ap wè l jan l ye a. N ap wè li se yon moun tankou noumenm.
“Epi menm relasyon sosyal ki egziste pami nou isit la pral egziste pami nou nan lòtbò a, sèlman l ap double avèk laglwa etènèl, yon laglwa nou pa jwi kounyeya” (D&A 130:1–2).
Ekriti sa a sigjere ke, avèk konfyans, nou kapab vize yon nivo selès nan relason nou genyen andedan fanmi nou. Nou kapab sousye tèlman pou manm fanmi nou, vivan ak mò, ke nou fè tout sa nou kapab pou ofri yo òdonans prètriz sa yo ki pral liye nou ansanm nan syèl la.
Gen anpil nan nou, jèn ak granmoun, k ap fè sa aktyèlman. Nou chèche non zansèt nou yo ki potko resevwa òdonans ki ka sele nou ansanm yo.
Prèske nou tout gen fanmi ki vivan ki pa sele an fanmi pa pouvwa prètriz la. Anpil nan nou gen fanmi ki vivan ki te resevwa òdonans prètriz yo men ki pa kenbe alyans yo te fè avèk Bondye yo. Bondye ap beni nou pou nou kapab ede nan lonje lamen bay fanmi sa yo ak lafwa. Gen yon pwomès Senyè a te fè disip li ki chèche mennen lòt moun ba li yo:
“Epi nenpòt moun ki resevwa nou, m ap la tou, paske m prale devan nou. M ap sou kote dwat nou ak sou kote goch nou, epi Lespri m ap nan kè nou, epi zanj mwen yo ap alantou nou pou pote nou anlè” (D&A 84:88).
Nan fenèt biwo m nan, chak jou m wè mesye ak madanm marye k ap pran foto nan mitan bèl flè yo ak fontèn yo. Lemarye a souvan leve lamarye a nan bra li, omwen sou kèk grenn eskalye, pandan fotograf la ap pran foto maryaj yo. Chak fwa m wè sa, mwen panse ak kèk koup mwen te konnen ki yon lè—pafwa nan yon tan tou kout apre maryaj yo—te oblije youn pote lòt nan lòt fason lè lavi a te vin difisil. Nou ka pèdi travay. Timoun gen dwa fèt avèk gwo pwoblèm. Maladi ka vini. Epi lè sa a, abitid pou nou fè pou lòt moun sa nou ta renmen yo fè pou nou yo —lè sa te pi fasil la—ap vin fè nou tounen ewo ak ewoyin nan moman eprèv sa yo lè sa mande plis pase nou te panse nou te genyen nan nou yo.
Se yon devwa pou nou bay fanmi nou kalite relasyon nou kapab pote ale nan prezans Bondye a. Nou dwe eseye pa ofanse lòt ni pa fache pou tout bagay. Nou ka pran detèminasyon pou nou padone byenvit e totalman. Nou ka eseye chèche bonè lòt la anwo pwòp bonè pa nou. Nou ka gen jantiyès nan pale nou. Si nou eseye fè tout bagay sa yo, n ap envite Sentespri a vin nan fanmi nou ak nan lavi nou.
Asirans mwen ba nou sèke, avèk èd Senyè a epi avèk kè repantan, nou ka gen yon apèsi nan lavi sa a sou kalite lavi nou vle genyen pou tout tan an. Pè Selès la renmen nou. Li vle pou nou retounen al jwenn ni. Sovè a, atravè pouvwa Ekspyasyon l lan, rann posib pou nou gen chanjman nan kè nou bezwen genyen an pou nou ka antre nan tanp sakre yo, pou nou ka fè alyans nou kapab kenbe nan apre, epi lè lè a rive, pou nou ka viv anfanmi pou tout tan nan laglwa selès la—lakay nou ankò.
© 2015 pa Intellectual Reserve, Inc. Tout dwa rezève. Enprime nan Etazini Damerik. Apwobasyon anglè: 6/14. Apwobasyon tradiksyon: 6/14. Tradiksyon First Presidency Message, June 2015. Haitian. 12586 036
Ansèyman nan Mesaj Sa a
Lè w ap pataje doktrin sou fanmi etènèl la, panse sou sa Èldè Richard G. Scott nan Kolèj Douz Apot yo te di a: “Toujou chèche pou nou fòtifye fanmi yo. Anseye avèk yon vizyon sou enpòtans sa genyen pou fanmi yo sele nan tanp lan. … Lè w gen vizyon òdonans sèlman nan tanp yo, w ap ka ede bati wayòm Bondye a sou tè a” (“I Have Given You an Example,” Liahona, Me 2014, 34). Kijan ou ka ede moun w ap anseye yo devlope yon vizyon sou enpòtans pou yo sele nan tanp lan? Envite moun ki poko sele yo pou yo pale sou etap yo ka pran pou prepare yo pou òdonans sa a. Envite sa ki deja sele yo pou yo pale sou fason yo ka kenbe vizyon fanmi etènèl yo te genyen an epi travay pou yo ka amelyore relasyon yo youn ak lòt.