Visiting Tijing Mesej, Ogis 2015
Ol Fasin blong Jisas Kraes: Hem I No Gat Fasin blong Stap Flas mo Gat Tingting I Stap Daon
Stadi long toktok ia wetem prea mo luklukgud blong save wanem blong serem. ?Olsem wanem nao taem yu andastanem laef mo ol defren wok blong Sevya i leftemap fet blong yu long Hem, mo olsem wanem i blesem olgeta we yu stap lukluk long olgeta tru long visiting tijing? Blong kasem moa infomesen, go long reliefsociety.lds.org.
Fet, Famle, Help
Jisas i talem, “Sipos wan long yufala i hae moa, hem i mas kam olsem man we i yangfala moa long yufala; mo man we i lida blong yufala, hem i mas kam olsem man blong wok nomo blong yufala. ?Hu man we i hae moa? ?Man we i stap kakae long tebol, mo man we i stap karem kakae i kam? Yufala i save se man we i stap kakae long tebol, hem nao i hae moa. Be mi mi stap long medel blong yufala olsem man blong karem kakae nomo.” (Luk 22:26–27).
“Sevya Hem i bigfala eksampol ia nao blong paoa blong putum tingting i stap daon mo gat fasin blong stap lisin. Afta evri samting, fasin blong Hem blong mekem tingting blong Papa, hem i kamwan bigfala taem wetem paoa long ful histri blong wol. Ating sam long ol toktok we i moa tabu insaed evri skripja i simpol olsem, ‘Yu no mekem olsem we mi mi wantem, yu mekem olsem we yu nomo yu wantem.’ (Luk 22:42).”1
Olsem ol disaepol blong Jisas Kraes, yumi lukaotem oltaem blong kam olsem Hem. “Fasin blong no stap flas i impoten tumas blong kam moa olsem Kraes,” Elda Yulis Soares blong Olgeta Seventi i talem. Sapos yumi no gat fasin blong no stap flas, bae yumi no save gat ol nara impoten klin fasin. Blong gat fasin blong no stap flas, i no minim se yumi no strong, be i minim se yumi mas mekem samting wetem gud mo kaen fasin, stap soem se yumi strong, kwaet, stap helti, mo kontrolem yumiwan.”2 Taem yumi wok blong developem fasin ia, bae yumi faenem se “fasin ia blong givim tingting blong yumi wetem tingting i stap daon long Papa, bae i mekem se yumi gat paoa blong God—paoa blong tingting i stap daon. Hem i paoa ia nao blong fesem ol hadtaem blong laef, paoa blong pis, paoa blong hop, hem i paoa blong wan hat wetem wan lav blong Sevya Jisas Kraes mo testimon blong Hem, iven paoa blong fasin blong pemaot man.”3
Sam Moa Skripja
I Kam long Ol Skripja
Wan long ol taem blong ministri blong Kraes, we i swit mo strong, hem i taem Hem i bin wasem ol leg blong ol disaepol blong Hem. Nao hem i girap, i aot long tebol, i tekemaot kot blong hem, mo i tekem wan tawel i parpar long hem. Nao hem i tekem wan besin, i kafsaedem wota i go long hem. Nao i stat wasem leg blong ol man blong hem, mo i waepem leg blong olgeta long tawel ya we hem i parpar long hem. (Jon 13:4–5).
Taem Sevya i stap tokbaot odinens ia, ating ol disaepol oli filim sapraes se Lod mo Masta blong olgeta i bin nildaon long fored blong olgeta mo mekem wan seves wetem fasin blong no stap flas. Afta Jisas i bin eksplenem ol lesen we Hem i bin wantem olgeta mo yumi evriwan blong lanem:
Be from we mi, mi Masta mo mi Tija blong yufala, mi wasem leg blong yufala, yufala tu i mas waswasem leg blong yufala.
“Mi mi putum wan eksampol blong yufala, blong bambae yufala i save mekem sem fasin ya nomo we mi mi mekem long yufala” (Jon 13:14-15).
© 2015 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/15. Oli letem translesen: 6/15. Translesen blong Visiting Teaching Message, August 2015. Bislama. 12588 852
Tingting long Hemia
?Olsem wanem taem yumi gat tingting i stap daon, i helpem yumi blong gat lav olsem we Sevya i bin gat?