Fas Presidensi Mesej, Ogis 2015
Stanap olsem wan Laet
Mi bin gat spesel janis blong stap atendem plante kalja selebresen we i stap hapen long ol taem blong tempol dedikesen. Mi bin lavem tumas evri kalja selebresen ia, wetem hemia we mi jes atendem i no longtaem long Foeniks, Arisona, YSA, las Novemba.
Ol Lata-dei Sent yut we oli tekpat long ol kalja selebresen ia, oli bin mekem ol gudfala so we bae mi no save fogetem. Las yia long Foeniks, hemia bifo nomo long selebresen ia, mi bin talem long olgeta we oli tekpat, “Yufala i ol pikinini blong laet.”
Mi wantem evri yut blong Jos oli save se olgeta oli ol laet. Olsem ia, oli gat wan responsabiliti blong stap “olsem ol laet long wol” (Filipae 2:15). Oli gat wan diuti blong serem ol trutok blong gospel. Oli gat wan koling blong stanap olsem wan laet blong givhan blong tempol, we i saenem gospel laet i go long wan wol we i gohed blong stap go moa long tudak. Oli gat wan wok blong kipim laet blong olgeta i laet mo laet strong.
Blong yumi stap “wan eksampol blong olgeta we oli biliv” (Fas Timoti 4:12), yumi tu yumi mas biliv. I nidim blong yumi mas divelopem fet blong save laef long saed blong spirit mo blong givim laet long ol narafala man. Yumi mas mekem testemoni blong yumi i strong kasem we i kam wan angka long laef blong yumi.
Long medel blong ol impoten rod blong kasem mo kipim fet, wanem yumi nidim tedei hem i blong rid mo stadi olgeta skripja mo blong prea oltaem mo no stop blong prea. Long ol yut blong Jos, mi talem, sapos yu no mekem yet, statem naoia blong mekem hemia wan fasin blong stap ridim skripja mo prea evri dei. Sapos yufala i no stap ridim skripja mo prea evri dei, ol fos blong aotsaed mo samtaem ol strong samting long laef i save mekem laet i no laet strong o putumaot laet blong yu.
Ol yia blong yangfala laef i no isi. I gat ol yia taem Setan bae i temtem yu mo bae i mekem evri samting blong giaman long yu long rod we bae i lidim yu i gobak long hom blong yu long heven. Be taem yu rid mo prea mo taem yu givim seves mo obei, bae yu kam blong save gud moa “laet ia we i saen long tudak” (luk long D&C 6:21), Eksampol mo paoa blong yumi—we i Lod Jisas Kraes. Hem i laet we yumi holem i go antap blong stopem tudak we i kam bigwan (luk long 3 Nifae 18:24).
Wetem wan strong testemoni blong Sevya mo gospel blong Hem we i kambak, yu gat plante moa janis blong saenaot. Oli stap raon long yufala wanwan dei, nomata wanem situesen yufala i stap long hem. Taem yu folem eksampol blong Sevya, bae hem i janis blong yu blong stap wan laet, olsem we yu bin stap mekem long olgeta raon long yu—nomata se oli ol memba blong famle blong yu, ol fren long skul, olgeta we yu wok wetem, olgeta we yu mitim wanwan taem, o olgeta we yu no save nating.
Taem yu stap wan laet long wol, pipol raon long yu bae oli filim wan spesel spirit we bae i mekem olgeta oli wantem mekem samting wetem yu mo folem eksampol blong yu.
Mi askem strong long ol papa mo mama, mo ol lida blong ol yut blong yumi, blong helpem olgeta i stanap strong from trutok mo from stret mo gud fasin. Helpem olgeta blong luk klia ol get blong stap lan, blong andastaning, mo blong seves long kingdom blong God. Bildim insaed olgeta paoa blong winim ol temtesen blong wol. Givim olgeta tingting blong wokbaot long klin fasin mo fet, wetem prea, mo blong luk i go long heven olsem angka blong olgeta blong oltaem.
Long ol yut blong yumi, mi talem, Papa blong yumi long Heven i lavem yufala. Bae yu filim tu lav we ol lida blong Jos i gat long yu. Bae yu oltaem gat wan tingting blong wantem givim seves long Papa blong yu long Heven mo long Pikinini blong Hem. Mo bae yu oltaem wokbaot long trutok mo stanap olsem wan laet long medel blong ol pikinini blong God.
Yusum Mesej Ia blong Tij
Gat tingting blong toktokraon wetem olgeta we yu tijim abaot wanem i minim blong stap wan “[pikinini] blong laet.” ?Wanem ol responsabiliti we yu mas mekem? Yufala i save tokraon long ol taem we ol laet blong olgeta i bin saen strong mo wanem i bin mekem se i laet strong. Gat tingting blong askem olgeta blong tingbaot wan man, olsem wan yut, wan we yu wok wetem, o wan memba blong famle blong olgeta, we ating bae i nidim laet. Afta yufala i save prea tugeta abaot wan wei blong serem laet wetem man ia
© 2015 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/15. Oli letem translesen: 6/15. Translation of First Presidency Message, August 2015. Bislama. 12588 852