iVaqa ni Veisiko, Okosita 2015
Na iVakarau Vakalou i Jisu Karisito: Yalomalumalumu kei na Yalomalua
Vulica ena masumasu na itukutuku oqo ka vakasaqara mo kila na ka mo na wasea. Ena vakalevutaka vakacava na nomu vakabauti Koya ka vakalougatataki ira o vakaraica voli ena veisiko na kilai vakamatata ni bula kei na ilesilesi ni iVakabula? Me ikuri ni itukutuku, lako ki na reliefsociety.lds.org.
Vakabauta, Matavuvale, Veivukei
Kaya o Jisu, “Ia ko koya vei kemudou sa levu cake, me sa vaka ga na gone; ia ko koya sa turaga me sa vakataki koya sa dauveiqaravi O cei vei rau sa uasivi cake, ko koya sa tiko me kana, se ko koya sa dauveiqaravi? Ko koya sa tiko me kana ne? Ia koi au kau sa tiko vata kei kemudou me vaka e dua na dauveiqaravi” (Luke 22:26-27).
“Na iVakabula sa noda ivakaraitaki cecere duadua ena kaukauwa ni yalomalua kei na talairawarawa. Mai na veika kece, na Nona solia na yalona kivua na Tamana e sa kauta mai na cecere, ka vakakina na qaqa levu sara, ni vakayaco-ka ena ivolatukutuku ni veigauna. Rairai eso na vosa vakatabui sara ena ivolanikalou sa vaka koto oqo, ‘Me kakua ni yaco na noqu lewa, me yaco ga na nomuni lewa’ (Luke 22:42).”1
Vaka na tisaipeli i Jisu Karisito, eda dau sasagataka tu ga meda vakataki Koya. E kaya o Elder Ulisses Soares ena Vitusagavulu “na yalomalumalumu ena gadrevi vei keda kevaka meda na ivalavala va-Karisito vakalevu cake. Ke sega oya eda na sega ni rawa ni vakatorocaketaka na ivalavala vinaka tale eso. Na yalomalumalumu e sega ni kena ibalebale na gogo, ia sa vakaibalebaletaki ena vakarautaki ni itovo vinaka kei na yalovinaka, vakaraitaki ni kaukauwa, bula vakacegu, bulabula vakaituvaki, kei na bula vakaivakarau.”2 Ni da cakacaka me vakatorocaketaki na ivakarau oqo, eda na raica ni “kena soli tu ena yalomalua na yaloda kivua na Tamada ena kauta mai vei keda na veivakaukauwataki ni Kalou—na kaukauwa ni yalomalumalumu. Na kaukauwa meda sotava kina na dredre ni bula oqo, na kaukauwa ni vakacegu, na kaukauwa ni vakanuinui, na kaukauwa ni dua na yalo e vavadugudugu voli ena loloma kei na ivakadinadina i Jisu Karisito, mai na kaukauwa ni veivueti.”3
iKuri ni iVolanikalou
Mai na iVolanikalou
Dua vei ira na gauna taleitaki ka veivakaukauwataki ena veivakalotutaki i Karisito oya na gauna a vuya kina o Koya na yavadratou na Nona tisipeli. “Sa tucake mai nai vakayakavi, ka luvata na nona isulu, ka kauta mai e dua nai tauwelu, ka vauca ki tolona. Ni sa oti oqo sa livia na wai ki na dari, ka vakatekivu me vuya na yavadra na tisaipeli, ka solota enai tauwelu sa vau ki tolona” (Joni 13: 4–5).
Ena nona vakaraitaka na cakacaka tabu vakalotu oqo na iVakabula, era na rairai vakadrukai saraga na tisaipeli ni mai tekiduru e matadra na nodra Turaga ka iVakavuvuli ka vakayacora e dua na veiqaravi vakaciriloloma Sa qai vakamacalataka o Jisu na lesoni a vinakata o Koya me ratou vulica ka vakakina o keda kece sara.
“Ia kevaka kau sa vuya na yavamudou, koi au na Turaga kei nai Vakavuvuli, sa dodonu talega mo dou veivui yava.
“Niu sa solia e dua na ivakarau vei kemudou, mo dou kitaka me vaka kau sa kitaka oti vei kemudou” (Joni 13:14–15).
© 2015 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/15. Vakadonui me vakadewa: 6/15. Vakadewa ni Visiting Teaching Message, August 2015. Fijian. 12588 858
Vakasamataka Oqo
Ena vukei keda vakacava na yalomalumalumu meda na dauloloma me vakataka na iVakabula?