iTukutuku ni Mataveiliutaki Taumada, Okosita 2015
Tucake Mo Rarama
Au a donumaka ka tiko ena levu sara sa soqo ni marau vakavanua ka dau vakayacori ena gauna e dau vakatabui kina e dua na valetabu Au taleitaki ira kece, wili kina na kena ka se qai vakayacori walega oqo mai Phoenix, Arizona, Amerika, ena vula o Noveba sa oti
O ira na itabagone Yalododonu Edaidai ka ra vakaitavi ena soqo ni marau vakavanua era biuta vata e dua na parokaramu totoka, ka guiguilecavi dredre. Ena yabaki sa oti, au a tukuna vei ira na vakaitavi mai Phoenix ni bera na veivakamarautaki, “Oi kemuni na gone ni rarama.”
Au gadreva mo ni kila taucoko na itabagone ena Lotu ni o kemuni na gone ni rarama. Ni sa vaka o ya, sa tu vei ira na itavi mera “rarama kei vuravura” Filipai 2:15; Sa nodra itavi mera wasea na dina ni kosipeli Era sa kacivi me ra duri tu vaka na bikeni ni valetabu, ena vakacaudrevi ni rarama ni kosipeli ki na dua na vuravura e vakasinaiti ena butobuto. Sa nodra ilesilesi mera vakacaudreva tikoga na nodra cina ka me rarama sara.
Me na rawa vei keda “meda na ivakaraitaki ni tamata vakabauta” (1 Timoci 4:12), o keda sara ga meda vakabauta. Sa dodonu meda vakatorocaketaka na vakabauta e veiganiti ki na noda bula tiko vakayalo ka vakaraitaka na rarama kivei ira na tani. Sa dodonu me da bucina na noda ivakadinadina me yacova ni sa mai dua na ikelekele ena noda bula.
E so na veisala momona sara me rawati ka maroroi kina na vakabauta eda gadreva nikua oya me wiliki ka vulici na ivolanikalou ka meda dau masu vakawasoma ka vakagumatua. Vei kemuni na itabagone ena Lotu, au kaya, kevaka o ni se bera ni vakayacora vakakina, ni vakatorocaketaka saraga oqo e dua na iwalewale ni wili ivolanikalou kei na masumasu ena veisiga. Ni sega na itavi veiganiti e rua oqo, na idre mai tautuba kei na dina ni veika e yaco vakavolivoliti keda tu ena rawa ni katabokoboko se bokoca laivi sara ga na nomu rarama.
Na veiyabaki ni itabagone e sega ni ka rawarawa. Era sa yabaki matua me na temaki iko kina o Setani ka saga vagumatua me siwati iko mai na salatu ka na muataki iko lesu ki na nomu itikotiko vakalomalagi. Ia ni ko sa wiliwili ka masumasu ka veiqaravi ka talairawarawa voli, ko na qai mai kila vakavinaka cake “na rarama ka cilava na butobuto” V&V 6:21), na noda Daunivakaraitaki ka noda qaqa---sa ikoya na Turaga o Jisu Karisito. Sa iKoya na Rarama meda dulaka cake me vakaseyavutaka na butobuto vakasokumuni (raica na 3 Nifai 18:24).
Ni sa tiko na ivakadinadina kaukauwa ni iVakabula kei na Nona kosipeli vakalesuimai, sa tawavakaiyalayala na nomu madigi mo caudre. Era vakavolivoliti iko tu ena veisiga, ena ituvaki cava ga o na raici iko kina Ni ko sa vakamuria na ivakaraitaki ni iVakabula, sa na nomu na madigi mo dua na rarama, me vaka sara ga, ena nodra bula o ira era vakavolivoliti iko—se ra lewe ni nomu matavuvale, itokani ni kalasi, mata cakacaka vata, veikilai, se vulagi saraga.
Ni ko sa dua na rarama kei vuravura, era na vakila e dua na yalo vakasakiti na tamata era vakavolivoliti iko ka ra na via maleleti iko ka muria na nomu ivakaraitaki.
Au vakamasuti kemuni na itubutubu kei na iliuliu ni itabagone mo ni vukei ira mera tudei ena dina kei na yalododonu. Veivuke ena tadolavi raraba ni nodra raica na matamata ni vulika, nodra kilaka, kei na veiqaravi ena matanitu ni Kalou. Taracake e lomadra na kaukauwa mera vorata na veitemaki ni vuravura. Solia vei ira na yalo mera lako ena yalosavasava kei na vakabauta, mera dau masumasu, ka vakanamata ki lomalagi me nodra ikelekele ena veigauna.
Kivei kemuni na noda itabagone, au kaya, sa lomani kemuni na Tamada Vakalomalagi. Mo ni sa vakila talega na loloma e tiko vei ira na iliuliu ni Lotu me baleti kemuni. Me sa tiko vei kemuni na gagadre ni qarava na Tamada Vakalomalagi kei na Luvena. Ka mo ni sa dau lako voli ena yalodina ka duri tu vaka e dua na rarama ena kedra maliwa na luve ni Kalou.
Veivakavulici mai na iTukutuku Oqo
Navuca ni veivosakitaki vata kei ira o vakavulica se cava na ibalebale mo dua na “[luve] ni rarama.” Na itavi cava ena sala muria mai? Sa rawa ni o veivosakitaka na gauna eso e sa rarama saraga kina na nodra cina kei na cava a vakavuna. Navuca mo tarogi ira mera vakasamataka vakatabakidua e dua na tamata, me vaka e dua na itabagone, dua na matacakacaka vata, se dua na lewe ni nodra matavuvale, ka na rairai gadreva me vakararamataki. Drau sa na qai rawa ni masu vata me baleta na iwalewale me wasei kina na rarama vua na tamata oya.
© 2015 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/15. Vakadonui me vakadewa: 6/15. Vakadewa ni First Presidency Message, August 2015. Fijian. 12588 858