Rongorongo n Reirei ni Kakawari, Aokati 2015
Anuan Iesu Kristo aika Tabu—Nimamannei ao Nanorinano
Tataromwaaka ni kamatebwaia te bwai n reirei aei ao n ukoukoria n ataia bwa tera ae ko na tibwauaia. E kanga am atatai ni maiun ao ana mwakuri te Tia Kamaiu ni karikirakea am onimaki Irouna ao ni kakabwaiaia naake ko tararuaia rinanon te reirei ni kakawari? Ibukin rongorongona riki tabeua, nakon reliefsociety.lds.org.
Onimaki, Utu, Buoka
E taku Iesu, “Ane e kakannato riki i buakomi, ao ke e mena n ai aron ane te tei riki; ao ane te mataniwi, n ai aron te tabonibai. Ba e anga ae kakannato riki, ane rarikiriki n amarake, ke ane e bekutata? tiaki are rarikiriki n amarake? ao ngai I mena i buakomi n ai aron te tia bekutata” (Ruka 22:26–27).
“Te Tia Kamaiu bon ara katoto ae rietata man mwaakan te nanorinano ao te taotaonakinnano. N rikina ni koaua, Ana taotaonakinnano n Ana kantaninga nakon te Tama e kakoroa nanon te bwai ae kakannato, ao te kabanea ni korakora naba, n te bwai ae riki n rongorongo ni kabane. Tao tabeua taeka aika moan te tabu ni booki aika tabu a bebete, ‘Akea au taeka, ma e na tauaki am taeka’ (Ruka 22:42).”1
Ngkai ana reirei Iesu Kristo ngaira, ti ukoukoria n taainako n riki n ai Arona. “Te nimamannei e kakawaki ibukira ni karikiira riki n ai aron Kristo, “ e taku Unimwaane Ulisses Soares man te Itingaun. N akean aei ti na bon aki kona ni karikirakei tabeua aaro aika tamaroa aika kakaawaki. Te riki n nimamannei tiaki nanona bwa te mamaara, ma bon nanona karaoan te aroaro ma te tamaroa ao te akoi, kaotan te korakora, te rau, nakoraoin bonganam i bon iroum, ao am taubaang i bon iroum.”2 Ngkai ti mwakuri ni karikirakea te katei aei, ti na kunea bwa “ara taotaonakinnano ma te nanorinano n ara kantaninga nakon te Tama e anganiira mwaakan te Atua—mwaakan te nanorinano. Bon te mwaaka ni kaitarai kangaanga n te maiu, mwaakan te rau, mwaakan te kantaninga, mwaakan te nano ae kaonaki ma te tangira ibukin ao ana kakoaua te Tia Kamaiu Iesu Kristo, mwaakan te kaboomwi.”3
Rakan riki Booki aika Tabu
Man Koroboki aika Tabu
Teuana ana kabanea ni kakukurei ao ni mwaakaroiroi n ana mwakuri Kristo bon ngke E teboki waeia Ana reirei. “E teirake man te amarake, ao e kaki kunnikaina; ao e ana te kaoa, ao e kabaea nukana. Ao rimwi e kabaroa te ran i nanon te betin, ao e teboki waeia ana reirei, ao e kaoi n te kaoa are e kabaeaki nukana iai” (Ioane 13:4–5).
Ngkai e kabwarabwara te otenanti te Tia Kamaiu, ana reirei a bon rootaki n te aro are aia Tia Kamaiu ao aia Tia Reirei e katorobubua imataia ao ni karaoa te mwakuri ni ibuobuoki ma te nimamannei. Iesu e kamataata te reirei ae E tangiria bwa a na reiakinna ao ngaira ni kabane:
“Ao ngkai I teboki waemi, ngai ae ami Uea ao ami tia Reirei, ao e riai bwa kam na teboteboki naba waemi.
“Bwa I anganingkami te bwai ni kakairi, bwa kam na katotonga ae I karaoia nakoimi.” (Ioane 13:14–15).
© 2015 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/15. Kariaiakaki rairana: 6/15. Rairan te Visiting Teaching Message, August 2015. Kiribati. 12588 859
Iangoa Aio
E kanga karekean te nanorinano ni buokiira n tangira n aron ae e karaoia te tia Kamaiu?