Te Rongorongo man te Moan Beretitentii, Aokati 2015
Riiki bwa te Ota
E reke au tai ni irii katei ni bukamarau aika mwaiti ake a karaoaki n irekereke ma katabuan te tembora. I bane n tangiri ni kabane, n raonaki ma teuana ae I a bon tibwa iria n aenako i Phoenix, Arizona, USA, n Nobembwa ae nako.
Kairake irouia aika Itiaki ni Boong aika Kaitira ake a iri katei ni bukamaru a kaoti aia burokuraem aika kamiimi, ma ni kauringaaba. Te ririki ae nako i Phoenix, imwaain teutana te katabu, I tuangiia taan ira te waaki, “Kam riki bwa natin te ota.”
I tangiriia kairake ni kabane n te Ekaretia bwa a na ataia bwa a riki bwa natin te ota. N aron anne, iai mwiokoaia n riki “bwa ootan te aonaaba” (I-Biribi 2:15). Iai aia beku n tibwa koauan te euangkerio. Iai nakoaia n tei bwa te kantaninga ibukin te tembora, n tei ibukin otan te euangkerio nakon rikiraken rotongitongin te aonaaba. Iai aia mwakuri ni kateimatoa ni kauramwaaka ao ni kaotamwaaka otaia.
N te aro bwa ti aonga n riki bwa “aia tia kairiri aomata aika onimaki” (1 Timoteo 4:12), ngaira i bon iroura ti riai n onimaki. Ti riai ni karikirakea te onimaki ae riai bwa e na teimatoa maiun tamneira ao ni katauraoa te ota ibukiia tabeman. Ti riai ni kawakina ara onimaki ni karokoa ae riki bwa oin boutokaan maiura.
Ibuakon kawai aika korakora ni karekea ao ni kawakina te onimaki are ti kainnanoia n te bong aei bon warekan ao kamatebwaian booki aika tabu ao n tataro n taainako ao n teimatoa. Nakoia kairake n te Ekaretia, I kangai, ngkana kam tuai ni karaoia, karikirakea te katei ngkai ni kamatebwai booki aika tabu ao tataro. N akean mwakuri aika uoua aika kakawaki aikai, ana mwakuri te aonaaba ao n tabetai baika koaua aika bubuaka n te maiu a kona ni kamemeerea ke ni kabua otam.
Ririki aika tebwitabun a bon aki bebete. Bon ririki aika kakawaki ngkana Tatan e na kariiri ngkami ao ni karaoa ana kabanea ni konaa ni kamwaneko man te kawai are e na kairiko n oki nakon mweengam are i karawa. Ma ngkai ko wareware ao n tataro ao ngkai ko beku ao n ongotaeka, ko na kamatataaki riki n “te ota are e oota n te rootongitong (taraaD&C 6:21), ara Katooto ao korakorara—bon te Uea Iesu Kristo. Bon Ngaia te Ota ti na tauii i eta ara taura ni kanakoa te rotongitong (taraa 3 Nibwaai 18:24).
Ma te kakoaua ae korakora ibukin te Tia Kamaiu ao Ana euangkerio are e a tia ni kaokaki, e na reke am tai aika akea tiatianakiia ni kaota te ota. A katobibiko ni katoa bong, ni bwaai nako ake ko karekei i bon iroum. Ngkai ko ira ana katoto te Tia Kamaiu, e na reke am tai n riki bwa te ota, n aron are ko kona n taekinna, ni maiuia naake a mena irarikim—bwa tao ngkana kain am utu, kaain am kiraati, raom ni mwakuri, ae ko tii kinaa, ke aomata aika ko aki kinaia.
Ngkana otan te aonaaba ngkoe, aomata ake irarikim a na namakina te tamnei ae onoti ao a na kan irekereke ma ngkoe ao n ira am katoto.
I bubutia kaaro ao taan kairiiri ibukiia ara kairake ni buokiia n tei ni matoatoa ibukin te koaua ao te raoiroi. Buokiia ni karikirakea aia taratara n reiakinaki, ibukin te atatai, ao ibukin te mwakuri n ibuobuoki n abanuean te Atua. Karikirakea inanoia te korakora n totokoa ana kariiri te aonaaba. Anganiia te kantaninga n nakonako inanon te tamaroa ao te onimaki, bwa a na tataromwaaka, ao n taraa karawa bwa aaia ae teimatoa.
Nakoia ara roronrikirake, I kangai, e tangirii ngkami Tamara are i Karawa. Ko bia namakina naba aia tangira taan kairiiri n te Ekaretia ibukim. Ko bia karekea te nano ni kan beku ibukin Tamam are i Karawa ao Natina. Ao ko bia nakonako n taainako n te koaua ao n tei bwa te ota ibuakoia natin te Atua.
Reirei man te Rongorongo Aei
Iangoia ni maroro ma naake ko reireiniia bwa tera ae nanonaki n ribwa bwa “[natin] te ota.” Tera te mwioko ae e uoti? Ko kona ni maroroakin taai ngkana otaia e a tia n riki n otamwaaka ao tera ae e kaotamwaaka. Iangoia n titirakiniia n iangoa te aomata ae onoti, n aron te kairake, te tia ibuobuoki ni mwakuri, ke kaain te utu, are e bae ni kainnanoa te ota. Ngkanne kam kona n tataro ni ikotaki iaon aron tibwauan te ota ma te aomata anne.
© 2015 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/15. Kariaiakaki rairana: 6/15. Rairan te First Presidency Message, August 2015. Kiribati. 12588 859