Mensahe sa Visiting Teaching, Agosto 2015
Langitnon nga mga Kinaiya ni Jesucristo: Mapailubon kag Mapainubuson
Tun-i sing mainampuon ining materyal kag magpangamuyo agud mahibaloan kon ano ang ipaambit. Paano ang paghangop sa kabuhi kag misyon sang Manluluwas makapadugang sang inyo pagtuo sa Iya kag magabugay sa ila nga inyo ginabantayan paagi sa visiting teaching? Para sa dugang nga impormasyon, maglog-on sa reliefsociety.lds.org.
Pagtuo, Pamilya, Bulig
Si Jesus nagsiling, “Ang labing daku sa tunga ninyo mangin subong sang kamanghuran, kag ang pangulo, mangin subong sang nagaalagad. Kay sin-o bala ang daku pa, ang nagalingkod sa pagkaon, ukon ang nagaalagad? Indi bala ang nagalingkod sa pagkaon? Apang ako yari sa tunga ninyo subong sang nagaalagad” (Lucas 22: 26–27).
“Ang Manluluwas amo ang aton halimbawa sang gahum sang pagkamapainubuson kag pagkamapailubon. Kay sa katapusan, ang Iya pagpaidalum sa pagbuot sang Amay nagdala sang pinakadaku, kag bisan pa sang pinakamakagagahum, nga hitabo sa bug-os nga kasaysayan. Ayhan, ang pila sang pinakabalaan nga mga pulong sa bug-os nga balaan nga mga kasulatan amo lang gid ang, ‘Indi ang akon kabubut-on, kundi ang imo, paghimuon’ (Lucas 22:42)”1
Bilang mga disipulo ni Jesucristo, pirme kita nagatinguha nga mangin pareho sa Iya. “Ang pagkamapailubon tuman kaimportante agud kita mangin mas Cristohanon,” siling ni Elder Ulisses Soares sang Seventy. Kon wala ini, indi kita makapatubo sang iban pa nga importante nga mga kinaiya. Ang mangin mapailubon wala nagakahulugan sang kahuyang, kundi nagakahulugan ini sang paggawi nga may kaayo kag pagkamaluluy-on, nga nagapakita sang kabakod, katawhay, husto nga paghatag-bili sa kaugalingon, kag pagpugong-sa-kaugalingon.”2 Sa aton pagtinguha nga mapatubo ining kinaiya, masalapuan naton nga “ang mapainubuson nga pagpaidalum sang aton pagbuot sa Amay nagadala sa aton sang pagpakamaayo sang Dios—ang gahum sang pagkamapainubuson. Ini amo ang gahum sa pag-atubang sang mga pagtilaw sang kabuhi, ang gahum sang paghidaet, ang gahum sang paglaum, ang gahum sang tagipusuon nga nagatibok nga may pagpalangga kag panaksihon para kay Jesucristo, bisan pa sa gahum sang pagtubos.”3
Dugang nga Balaan nga mga Kasulatan
Gikan sa Balaan nga mga Kasulatan
Isa sang pinakamanami kag pinakagamhanan nga tinion sang pag-alagad ni Cristo amo sang ginhugasan Niya ang mga tiil sang Iya mga disipulo. “Natindog sa panihapon, ginhal-id ang iya mga kunup, kag nagkuha sia sing inugpamahid kag ginwagkus niya. Nian nagbobo sia sang tubig sa batiya, kag nagsugud sa paghinaw sang mga tiil sang mga gintoton-an, kag sa pagpahid sa ila sang inugpamahid nga nawagkus niya.” (Juan 13:4–5)
Sa pagpresentar sang Manluluwas sini nga ordinansa, ayhan ang mga disipulo nahalawhaw nga ang ila Ginuo kag Manunudlo nagluhod sa ila atubangan kag naghimo sang subong ka mapailubon nga pag-alagad. Si Jesus dayon nagpaathag sang mga leksyon nga luyag Niya nga ila kag aton matun-an:
“Niyan kon ako, ang Ginuo kag Manunudlo ninyo, naghinaw sang inyo mga tiil, kamo man dapat mahinaway sang inyo mga tiil.
“Kay naghatag ako sa inyo sing sulundan, agud nga kamo man maghimo suno sa nahimo ko sa inyo” (Juan 13:14–15).
© 2015 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/15. Petsa sang pagtugot sa paglubad: 6/15. Paglubad sang Visiting Teaching Message, August 2015. Hiligaynon. 12588 861
Binagbinaga Ini
Paano ang pagkamapainubuson makabulig sa aton nga magpalangga subong sang ginhimo sang Manluluwas?