Mensahe sang Unang Panguluhan, Agosto 2015
Magtindog bilang Kasanag
Nangin pribelihiyo ko ang magtambong sa madamo nga pangkultura nga mga selebrasyon nga ginahiwat angot sa mga pagpahanungod sang templo. Nanamian ako sa ila tanan, lakip na ang pinakaulihi nga akon gintambongan sa Phoenix, Arizona, USA, sang nagligad nga Nobyembre.
Ang lamharon nga mga miyembro sang Simbahan nga nagapasakop sa pangkultura nga mga selebrasyon nagpakita sang manami, halandumon nga mga programa. Sang nagligad nga tuig sa Phoenix, antes lang gid sang selebrasyon, ginhambalan ko ang mga tag-pasakop, “Mga anak kamo sang kasanag.”
Luyag ko nga mahibaloan sang tanan nga mga lamharon sang Simbahan nga mga anak sila sang kasanag. Bangud sina, may responsibilidad sila nga “mangin mga sulu sa kalibutan” (Mga Taga-Filipos 2:15). May katungdanan sila nga ipaambit ang mga kamatuoran sang ebanghelyo. May obligasyon sila nga magtindog bilang parola sang templo, nga nagapasilak sang kasanag sang ebanghelyo sa labing nagadulom nga kalibutan. May mando sila nga tipigan ang ila sulu nga nagasiga kag nagasilak sing masanag.
Agud kita “manginhuwaran sa mga nagatuo” (1 Timoteo 4:12), kita mismo dapat magtuo. Dapat kita magpatubo sang pagtuo nga kinahanglanon agud makapadayon sing espirituhanon kag magpasilak sang kasanag sa iban. Dapat naton atipanon ang aton panaksihon tubtob nga mangin angkla ini para sa aton mga kabuhi.
Kalakip sa pinakaepektibo nga mga pamaagi agud maangkon kag matipigan ang pagtuo nga ginakinahanglan naton sa karon amo ang pagbasa kag pagtuon sang balaan nga mga kasulatan kag pagpangamuyo sing masunson kag tayuyon. Sa mga lamharon sang Simbahan, nagasiling ako, kon wala pa ninyo ini ginahimo, magpatubo karon sang pamatasan sang adlaw-adlaw nga pagtuon sang balaan nga mga kasulatan kag pagpangamuyo. Kon wala ining duha ka importante nga mga buluhaton, ang mga impluwensya sang kalibutan kag ang kon-kaisa mapait nga realidad sang pangabuhi makapapiraw ukon bisan pa makapalong sang inyo kasanag.
Ang mga tinuig sang pagkalamharon indi mahapos. Amo ini ang ali nga mga tinuig nga si Satanas magatentar sa inyo kag magahimo sang iya bug-os nga ikasarang agud patalangon kamo palayo sa alagyan nga magadala sa inyo pabalik sa inyo langitnon nga puluy-an. Pero sa inyo pagbasa kag pagpangamuyo kag pag-alagad kag pagtuman, makilala ninyo sing mas tul-id “ang kasanag nga nagasilak sa kadulom” (D&C 6:21), ang aton Ehemplo kag aton kabakod—bisan pa ang Ginuong Jesucristo. Sia ang Kasanag nga aton ipataas agud magpuas ang nagalikop nga kadulom (tan-awa sa 3 Nefi 18:24)
Nga may mabakod nga panaksihon sang Manluluwas kag sa Iya ginpanumbalik nga ebanghelyo, wala katapusan ang inyo oportunidad nga magsilak. Ginapalibutan kamo sang mga ini adlaw-adlaw, sa bisan ano nga sirkumstansya ninyo. Sa pagsunod ninyo sa ehemplo sang Manluluwas, maangkon ninyo ang oportunidad nga mangin kasanag, nga amo kamo sini, sa mga kabuhi sang nagapalibot sa inyo— sa miyembro sang inyo kaugalingon nga pamilya, mga kaklase, mga kaupod sa ulubrahan, mga kakilala, ukon lubos nga mga estranghero.
Kon kamo kasanag sa kalibutan, ang mga tawo sa palibot ninyo magabatyag sang pinasahi nga espiritu nga magaganyat sa ila nga mag-upod sa inyo kag magsunod sang inyo ehemplo.
Nagapangabay ako sa mga ginikanan kag mga lider sang aton mga lamharon nga buligan sila sa pagtindog para sa kamatuoran kag pagkamatarong. Buligi nga maabrihan sing masangkad ang ila panan-aw sang mga ganhaan sang pagtuon, sang paghangop, kag sang pag-alagad sa ginharian sang Dios. Patubua sa ila ang kabakod nga batuan ang mga tentasyon sang kalibutan. Hatagi sila sang determinasyon nga magpangabuhi sing matarong kag may pagtuo, nga mangin mapinangamuyuon, kag magsandig sa langit bilang ila malig-on nga angkla.
Sa aton mga lamharon, nagasiling ako, ang aton Amay nga Langitnon nagapalangga sa inyo. Kabay nga mabatyagan man ninyo ang pagpalangga sang mga lider sang Simbahan para sa inyo. Kabay nga padayon kamo nga makaangkon sang kaluyag nga mag-alagad sa inyo Amay nga Langitnon kag sa Iya Anak. Kag kabay nga sa tanan nga tinion magpanglakaton kamo sa kamatuoran kag magtindog bilang kasanag sa mga anak sang Dios.
Pagtudlo gikan sa Sining Mensahe
Huna-hunaa nga hambalan upod sa inyo ginatudloan kon ano ang kahulugan nga mangin “[anak] sang kasanag.” Ano nga mga responsibilidad ang nagaupod diri? Sarang ninyo hambalan ang mga tinion sang ang ila kasanag nangin pinasahi ang kasidlak kag kon ano ang nagpasidlak diri. Huna-hunaa ang pagpangabay sa ila nga magpanumdum sang isa ka pat-od nga tawo, subong sang isa ka lamharon, isa ka kaupod sa trabaho, ukon isa ka miyembro sang ila pamilya, nga ayhan nagakinahanglan sang kasanag. Dayon sarang kamo magpangamuyo sing ulupod parte sa isa ka paagi nga mapaambit ang kasanag sa sina nga tawo.
© 2015 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/15. Petsa sang pagtugot sa paglubad: 6/15. Paglubad sang First Presidency Message, August 2015. Hiligaynon. 12588 861