Mensahe iti Visiting Teaching, Agosto 2015
Dagiti Kababalin ni Jesucristo: Naemma ken Napakumbaba
Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawatyo iti biag ken mision ti Mangisalakan ket mangpapigsa iti pammatiyo Kenkuana ken mangparabur kadagiti ay-aywananyo babaen ti visiting teaching? Para iti ad-adu pay nga impormasion, mapan iti reliefsociety.lds.org.
Pammati, Pamilia, Tulong
Kinuna ni Jesus, “Ti dakdakkel kadakayo, isu koma ti kasla basbassit; ket ti agturay isu koma ti kasla agserbi. Ta asino ti dakdakkel, ti sumango iti panganan, wenno ti agserbi? saan a ti sumango iti panganan? ngem kadakayo siak ti kasla agserbi” (Lucas 22:26–27).
“Ti Mangisalakan ket isu ti naindaklan a pagwadan ti bileg ti panagpakumbaba ken kinamanagtulnog. Kalpasan ti amin, ti panangtulnogna iti pagayatan ti Ama ti nangyeg iti kadakkelan, ken uray pay ti kabilgan a pasamak iti amin a pakasaritaan. Nalabit a sumagmamano kadagiti kasagraduan a balikas iti amin a nasantuan a kasuratan ket ti laeng, ‘Saan koma a maaramid ti pagayatak, no di ti pagayatam’ (Lucas 22:42).”1
Kas disipulo ni Jesucristo, kalikagumantayo a kanayon ti agbalin aa kas Kenkuana. “Ti kinaemma ket napateg unay kadatayo tapno agbalin nga ad-adda a kas ken ni Cristo,” kinuna ni Elder Ulisses Soares ti Pitupulo, “No awan daytoy saantayo a kabaelan ti mangpadur-as kadagiti napapateg a saguday. Ti panagbalin a naemma ket saanna a kayat a sawen a kinakapsut, ngem kayatna a sawen ti kinasingpet ken kinasayaat nga agtignay, panangipakita iti pigsa, talinaay, nasalun-at a panangipateg iti bagi, ken panagkontrol iti bagi.”2 Iti panagtrabahotayo a mangpadur-as iti daytoy a kababalin, makitatayo a “ti napakumbaba a panagtulnog iti pagayatan ti Ama ket mangyeg kadatayo iti panangpabileg ti Dios—ti bileg ti kinapakumbaba. Daytoy ti bileg a mangsango kadagiti rigrigat ti panagbiag, ti bileg ti talna, ti bileg ti namnama, ti bileg ti maysa a puso nga agbitekbitek iti ayat ken pammaneknek maipapan ti Mangisalakan a ni Jesucristo, uray ti bileg ti pannakasubbot.”3
Dagiti Mainayon a Nasantuan a Kasuratan
Manipud kadagiti Nasantuan a Kasuratan
Maysa kadagiti kasam-itan ken kabilgan a kanito ti panagministro ni Cristo ket idi binugguanna dagiti saka dagiti disipulona. “Timmakder manipud iti pangrabii, ket inikkatna dagiti pagan-anayna; ket nangala iti maysa a tualia, ket imbarikesna. Kalpasanna nangibuyat idi iti danum iti maysa a bacca, ket rinugianna a bugguan dagiti saksaka dagiti adalanna, ken punasanna ida iti tualia nga imbarikesna” (Juan13:4–5).
Bayat ti panangyam-ammo ti Mangisalakan iti daytoy nga ordinansa, mabalin a natalipupos dagiti disipulo idi nagparintumeng ti Apo ken Maestroda iti sanguananda ket nagaramid iti napakumbaba unay a serbisio. Kalpasanna inlawlawag ni Jesus dagiti adalen a kayatna a sursuruenda ken sursuruentayo amin:
“No ngarud siak nga Apo ken Mannursuroyo, binugguak dagiti saksakayo; dakayo rebbengyo met ti agbibinnuggo kadagiti saksaka ti maysa ken maysa.
“Ta inikkankayo iti pagtuladan, tapno aramidenyo met koma kas iti inaramidko kadakayo” (Juan 13:14–15).
© 2015 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/15. Pannakaanamongna a maipatarus: 6/15. Pannakaipatarus ti Visiting Teaching Message, August 2015. Ilokano. 12588 864
Ibilang Daytoy
Kasano a ti kaadda ti kinapakumbaba ket makatulong kadatayo nga agayat kas iti inaramid ti Mangisalakan?