Mensahe ti Umuna a Panguluen, Agosto 2015
Tumakder a kas Maysa a Silaw
Naaddaanak iti gundaway a dumar-ay iti adu a parambak iti kultura a naangay a kagiddan dagiti panagidaton kadagiti templo. Paggaayatko amin dagitoy, agraman ti kaudian a maysa a dinar-ayak idiay Phoenix, Arizona, USA, itay napalabas a Nobiembre.
Dagiti agtutubo a Santo iti Ud-udina nga Aldaw a nakiraman kadagiti parambak iti kultura ket nangidatagda kadagiti nangayed ken nakallalagip a programa. Itay napalabas a tawen idiay Phoenix, kalpasan laeng ti parambak, imbagak kadagiti rimmaman, “Dakayo dagiti annak ti lawag.”
Kayatko a maammuan ti amin nga agtutubo ti Simbaan nga isuda dagiti annak ti lawag. Iti kasta, addaanda iti pagrebbengan nga agbalin a “kas silaw iti lubong” (Taga Filipos 2:15). Addaanda iti pagrebbengan a mangibinglay kadagiti kinapudno ti ebanghelio. Addaanda iti awag nga agtakder kas beacon ti templo, a mangyanninaw iti lawag ti ebanghelio iti umad-adun a nasipnget a lubong. Addaanda iti rebbengen a mangpatalinaed a narayray ti silawda ken sumsumged nga agrimrimat.
Tapno agbalintayo a “pagwadan dagiti mamati” (1 Timoteo 4:12), datayo mismo ket mamati. Nasken a maaddaantayo iti pammati a kasapulan tapno agbiagtayo a naespirituan ken agbalintayo a silaw kadagiti dadduma. Nasken a taraonantayo ti pammaneknektayo agingga nga agbalin daytoy a natibker nga angkla iti panagbiagtayo
Maibilang kadagiti kasamayan a wagas a pakagun-odan ken pakapagtalinaedan iti pammati a kasapulantayo ita ket ti panagbasa ken panagadaltayo kadagiti nasantuan a kasuratan ken ti masansan ken kanayon a panagkararag. Kadagiti agtutubo iti Simbaan, ibagak, a no diyo pay inaramid daytoy, ugalienyo itan ti inaldaw a panagadal kadagiti nasantuan a kasuratan ken panagkararag. No awan dagitoy dua a kasapulan a panagsanay, dagiti impluensia iti ruar ken dagiti naulpit a kinapudno iti biag ket mabalin a manglidem wenno mangpuyupoy iti silawyo.
Saan a nalaka dagiti tawen ti kinaagtutubo. Dagitoy dagiti kangrunaan a tawen a pangsulisogan kadakayo ni Satanas ken aramidenna ti amin a kabaelanna a mangallilaw kadakayo manipud iti dalan a mangiturong kadakayo nga agsubli iti nailangitan a pagtaenganyo. Ngem no agbasa ken agkararagkayo ken no agserbi ken agtungpalkayo, maammuanyonto a nasaysayaat “ti silaw a mangraniag iti kasipngetan” (DkK 6:21), ti Pagwadantayo ken pigsatayo—a kas ken ni Apo Jesucristo. Isu ti Silaw a pagkaptantayo tapno mapapanaw ti panagummong ti kinasipnget (kitaen iti 3 Nephi 18:24).
Babaen ti kinaadda iti napigsa a pammaneknek maipapan ti Mangisalakan ken ti naisubli nga ebangheliona, addaankayo iti adu a gundaway nga agraniag. Palawlawandakayo iti inaldaw, iti ania man a kasasaad a pakasarakanyo iti bagbagiyo. Iti panangsurotyo iti pagwadan ti Mangisalakan, addaankayo iti gundaway nga agbalin a silaw, kas iti dati, iti biag dagiti adda iti aglawlawyo—kamengda man ti bukodyo a pamilia, kaklase, katrabaho, am-ammo man, wenno napeklan a ganggannaet.
No dakayo ti silaw ti lubong, marikna dagiti tao iti aglawlawyo ti naisangsangayan nga espiritu a mangguyugoy kadakuada a makipulapol kadakayo ken mangsurot iti pagwadanyo.
Ipakpakaasik kadagiti nagannak ken lider dagiti agtutubotayo a tulonganyo ida nga agtakder a sititibker para iti kinapudno ken kinalinteg. Tulonganyo ida a mangilukat a naan-anay kadagiti ruangan ti panagsursuro, ti pannakaawat, ken ti panagserbi iti pagarian ti Dios. Padur-asenyo kadakuada ti pigsa a mangliklik kadagiti pannulisog ti lubong. Ikkanyo ida iti pagayatan a magna iti saguday ken pammati, agbalin a managkararag, ken kumita iti langit kas agtultuloy a tibkerda.
Kadagiti agtutubotayo, ibagak, nga ay-ayatennakayo ti Nailangitan nga Amatayo. Mariknayo koma met ti ayat nga adda para kadakayo dagiti lideryo iti Simbaan. Maaddaankayo koma iti tarigagay nga agserbi iti Nailangitan nga Amayo ken iti Anakna. Ken kanayon koma a mangnakayo iti kinapudno ken tumakderkayo kas silaw kadagiti annak ti Dios.
Panangisuro manipud iti Daytoy a Mensahe
Paglilinnawaganyo kadagiti sursuruanyo no ania ti kayat a sawen ti agbalin nga “[anak] ti lawag.” Ania dagiti pagrebbengan a kasapulan daytoy? Mabalin a paglilinnawaganyo dagiti panawen a naraniag dagiti silawda ken no ania ti nangparaniag iti daytoy. Idawat kadakuada a mangpanunot iti maysa a tao, kas koma iti maysa nga agtutubo, katrabaho, wenno miembro ti pamiliada, a mabalin nga agkasapulan iti silaw. Kalpasanna, mabalinyo a sangkamaysa nga ikararagan maipapan iti maysa a wagas a pakaibinglayanyo iti silaw iti dayta a tao.
© 2015 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/15. Pannakaanamongna a maipatarus: 6/15. Pannakaipatarus ti First Presidency Message, August 2015. Ilokano. 12588 864