Klumech er a First Presidency, Ongeai el buil 2015
Dechor el uai a om Llomes
Ngarngii a techellek el mla ngara betok el ungil klebesei er a chelsel aikel taem er a oterkeklel a templo. Ng kmal soak el rokui, luldimukl er a imong el dirk bla er ngii er a Phoenix, Arizona, USA, er tial mlo merek el November.
A rengeasek el Uriul-klebesei el Santo el tir oltobed a klokolir er a ikal ungil klebesei a ocholt a klebokel, e diak dobes el klokolir. Tial mlo merek el rak er a beluu er a Phoenix, ruchei er a ungil klebesei, e ak millekoi er tirkal ulsekool el kmo, “Kemiu a rengalk er a llomes.”
Ng kmal soak a rokui el ngeasek er a Ikelesia a bo lodengei el kmo te ngalek er a llomes. A leuaisei, e ngarngii a ngerchelir el mo “llomes el mora beluulechad” (Filipi 2:15). Ngarngii a ngerchelir lomerk er a klemerang er a ebangkelio. Ngarngii okedongir el mo dechor lolangch el bedul a templo, lolchotel a llomes er a ebangkelio er a chelsel a milkolk el beluulechad. Ngerchelir el mo kerekikl me a llomes lobang a di kmard e metitianged a kerdel.
Alsekum eng soad el mo “okesiu er a roumerang” (1 Timothy 4:12), eng kired el mo oumerang. Ng kired el mekdebechii sel klaumerang el uchul e kede mosebechakl er a chedaol tekoi e dirrek lolchotel a llomes el mora rebebil. Ng kired el mekerulii a klaumerang er kid el di merekmo bo lotil a klengar kid.
A ta er a kmal bedochel el teletael eng sebeched el mekdebechii a klauemrang el kid ousbech er ngii er chelechal sils a okiu omesubel chedaol llechukl e mo blechoel e mekedekudem el meluluuch. Kemiu a rengeasek er a Ikelesia, e a kmu el kmo, alsekum eng dirkak mokdebechii, e momuchel er chelechang el rullii me bol kse er kau el mesuub chedaol llechukl e moluluuch er a bek el sils. A lak aikaikid el eru el meklou a belkul omeruul, e a ongetikaik er a cherarou me a ringel er a klengar a sebechel kokeringii malechub eng mekodir a llomes el mobang.
A temel a klengeasek a diak el beot. Ngike el tokubets el rak el Diablong a mo mengetikaik er kemiu e mo ousbech aikel kot el ngarbab el klisichel mengesuseu el mengeroid er kemiu er sel rael el ngii a ngoikemiu el lmuut el mora blimiu er a babeluades. Eng di sel monguiu e moluluuch e mosiou e molngesenges, e ko merael mo ungil medengelii sel “llomes el ngii a dmiich er a chelsel a iilkolk” (D&C 6:21), el ngii a Okesiu el mei er kid e klisiched—el Rubak el Jesus Kristo. Ngii a Llomes el kired lodersii el mo er bab me bol sebechel choridii a iilkolk (mesa 3 Nephi 18:24).
Ngultuil er a mesisiich el klaumerang er a Osobel me a mla moluut el ebangkelio er Ngii, eng diak a torbengii a techelliu el ungil okesiu. Ng iiliuekl er kemiu er a bek el sils, er a chelsel a ngii di el ngera el teletael el mngara chelsel. Sel moltirakl okesiul Osobel, eng morngii a techellem el mo uai a om llomes, el di mla uaisei, er a chelsel a klengar tirkel ngara bitar—kau a le chedal a telungalk er kau, classmate, tal ureor, di kaodengei, malechub e te ngodech el chad.
Sel sekum eng uai a om llomes er a beluulechad, e a rechad el ngara bitar kau a mo melchesuar ra tokubets el reng el rulterir el mo sorir el lobengkem e mo oltirakl okesium.
A kulengit er a roungalk me a roungerachel er a rengeasek me bom ngosuterir el mo dechor el mesisiich el kirel a klemerang me a llemalt. Mngesuterir el mok osengir el kirel a techall er a omesuub, klemedengei, me a omesiou er a chelsel a rengedel a Dios. Moleketek er tir er a klisiich lodngakl ongetikaik er a beluuelchad. Besterir a blakelreng el mo merael loba kldung me a klauemrang, e bol ngara nglunguuch, e bol blechoel lomes el bedul a babeluades el uai a lotil a klengar tir.
Mora rengeasek el ngeleked, e a kmu er kemiu el kmo, a Demad er a Babeluades a betik a rengul er kemiu. Bo molchesuar a beltikelreng er a remengeteklel a Ikelesia el kiriru. Bol ngarngii sel diak el mekimd el blakelreng er kemiu el mesiou er a Demmiu er a Babeluades me a Ngelekel. E bo blechoel merael er a klemerang e mdechor el uai a om llomes el mora rengelekel a Dios.
Osischeklel Tia el Klumech
Molatk a mosaod lobengterir tirkal molisechakl er tir a belkul sel de “[ngalek] er a llomes.” Ngera el ngerachel obengkel tiang? Ng sebechem el mesaod aikel taem el llomes el mobang a kmal mle medidiich e ngara sel rirelli meng dmiich. Molatk e olengit er tir me lomdasu el kirel a imo el chad, sebechel el ngeasek, chad el dak e loureor, malechub a chedal a telungalk er tir, el ngii a locha ousbech a llomes. Seikid eng sebechiu el dmak e meluluuch el kirel a teletael el uchul e tial llomes a mo er ngika el chad.
© 2015 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/15. Kengei er a oidel: 6/15. Oidel a First Presidency Message, August 2015. Palauan. 12588 881