Mensahe iti Visiting Teaching, Septiembre 2015
Dagiti Nadiosan a Kababalin ni Jesucristo: Nabileg ken Napnuan iti Dayag
Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawatyo kadagiti nadiosan a kababalin ti Mangisalakan ket mangpapigsa iti pammatiyo Kenkuana ken mangparabur kadagiti ay-aywananyo babaen ti visiting teaching? Para iti ad-adu pay nga impormasion, mapan iti reliefsociety.lds.org.
Pammati, Pamilia,Tulong
Isuro dagiti nasantuan a kasuratan kadatayo a ni Jesucristo “inawatna ti amin a bileg, iti langit ken iti daga, ken adda kenkuana ti dayag ti Ama” (DkK 93:17). Kinuna ni Elder M. Russell Ballard ti Korum dagiti Sangapulo-ket-dua nga Apostol a babaen daytoy a bileg pinarsua ti Mangisalakan dagiti langit ken daga, nagaramid kadagiti milagro, ken nagibtur iti saem iti Getsemani ken Kalbario.1 No maawatantayo daytoy, dumakkel ti pammatitayo ken ni Cristo, ket agbalintayo a napigpigsa.
Bayat ti panagaramid ken panagtungpaltayo kadagiti katulagan iti templo, bendisionannatayo ti Apo iti bilegna. Kinuna ni Linda K. Burton, Relief Society general president: “Ti panagtungpal kadagiti katulagan ket mangpapigsa, mangpabileg, ken mangsaluad. Naam-ammok itay nabiit ti ipatpateg a kabarbaro a gayyem. Impaneknekna a kalpasan ti panangawatna iti endowment iti templo, nariknana a napapigsa iti bileg a mangliklik kadagiti sulisog.”2
Mangiburay ni Nephi iti pammaneknek maipapan iti bileg ti katulagan: “Siak, ni Nephi, nakitak ti bileg ti Cordero ti Dios, a bimmaba … kadagiti natulagan a tattao ti Apo, ken naarmasanda iti kinalinteg ken bileg ti Dios iti naindaklan a dayag” (1 Nephi 14:14).
Dagiti Mainayon a Nasantuan a Kasuratan
Manipud kadagiti Nasantuan a Kasuratan
Iti pannakapnona iti nalaus a panangngaasi kada Marta ken Maria, pinagungar ni Jesucristo ti kabsatda a ni Lazaro manipud iti patay babaen ti bileg ti Dios nga adda Kenkuana.
Simmangpet ni Jesus iti balay da Marta ken Maria uppat nga aldaw kalpasan ti kaadda ni Lazaro iti tanemna. Napanda iti tanem ni Lazaro, ket imbilin ni Jesus a maikkat ti bato a nangkalub iti pagserkan. Kinuna ni Jesus ken ni Marta, “Diak aya kinuna kenka, a no mamatika, makitam ti dayag ti Dios?” Kalpasanna nagkararag iti Dios Ama ket “pimmukkaw iti napigsa a timek, Lazaro, rummuarka.
“Ket daydi natay rimmuar a sipapatapat, dagiti im-ima ken saksakana kadagiti bedbed.” (Kitaen iti Juan 11:1–45.) Usaren ti Mangisalakan ti bilegna a mangsubbot ken magpabileg kadatayo. Dumakkelto ti pammatitayo Kenkuana no laglagipentayo nga Isu ket napnuan iti bileg ken dayag.
© 2015 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/15. Pannakaanamongna a maipatarus: 6/15. Pannakaipatarus ti Visiting Teaching Message, September 2015. Ilokano. 12589 864
Ibilang Daytoy
Kasano a maarmasannatayo ti bileg ti Dios iti bileg ken dayag?