Mensahe ti Umuna a Panguluen, Septiembre 2015

Dagiti Pamilia ken Kararag

Ni Presidente Henry B. Eyring

Umuna a Mammagbaga iti Umuna a Panguluen

Naminsan, iti panagtugawko iti abay ti katre ni tatangko iti rabii, insaritana maipapan ti panagubingna. Insaritana ti maipapan iti ayat dagiti nagannak kenkuana kadagiti narigat a panawen ken ti ayat ti Nailangitan nga Amana ken ti Mangisalakan. Ammok idin nga agngangabiten isuna iti sakit a kanser, isu a saan a sorpresa kaniak a no dadduma ikaduana dagiti riknana para iti Nailangitan nga Amana iti ayat ken kinasayaat ti naindagaan nga amana. Masansan a kinuna daydi tatangko a no isu idi ket agkararag, pinanunotna a makitana iti panunotna ti isem ti Nailangitan nga Ama.

Insuro dagiti dadakkelna kenkuana ti pagwadan nga agkararag a kasla makisasao iti Dios ket sumungbat kenkuana ti Dios nga addaan iti ayat. Kinasapulanna dayta a pagwadan agingga iti udina. Idi kimmaron ti sakit, nakitami isuna iti bigat a nakaparintumeng iti abay ti katre. Nakapsut unayen isuna tapno agsubli iti katre. Imbagana kadakami a nagkarkararag tapno saludsodenna iti Nailangitan nga Amana no apay nga agsagaba unay iti nakaro idinto a kanayon met nga inkarigatanna ti agbalin a nasayaat. Kinunana nga immay ti naasi a sungbat: “Kasapulan ti Dios dagiti natured nga annak a lallaki.”

Ket ngarud nagibtur agingga iti udina, nga agtaltalek a ti Dios ket mangipatpateg kenkuana, dumngeg kenkuana, ket mangitag-ay kenkuana. Isu ket nabendisionan ta naammuanna a nasapsapa ken dinanto kaano man malipatan nga adda managayat a Dios nga asideg a kas iti kararag.

Dayta ti gapu no apay sinuruan ti Apo dagiti nagannak, “Ket isuroda pay dagiti annakda nga agkararag, ken magna a sililinteg iti sanguanan ti Apo” (DkK 68:28).

Naisublin ti ebanghelio ni Jesucristo—agraman ti Libro ni Mormon ken amin a tulbek ti priesthood a makapagbegkes kadagiti pamilia—gapu ta ni Joseph Smith ket nagkararag a kas maysa nga ubing nga addaan pammati. Nagun-odna dayta a pammati iti maysa a naayat ken napudno a pamilia.

Duapulo a tawenen ti napalabas inted ti Apo daytoy a balakad kadagiti pamilia iti “Ti Kaamaan: Maysa a Waragawag iti Lubong” manipud iti Umuna a Panguluen ken ti Korum dagiti Sangapulo-ket-dua nga Apostol: “Dagiti naballigian a kallaysa ken kaamaan ket maipasdek ken mapagtalinaed kadagiti pagbatayan ti pammati, panagkararag, panagbabawi, panagpakawan, respeto, ayat, panangngaasi, aramid, ken dagiti makaay-ayo nga aktibidad iti panagaliwaksay.”¹

Dakkel ti utangtayo a panagyaman iti pamilia ni Joseph Smith a Propeta para iti pannakapadakkelna. Impagwadan ti pamiliana saan laeng a ti pammati ken panagkararag no di ketdi pay panagbabawi, panagpakawan, respeto, ayat, panangngaasi, aramid, ken dagiti makaay-ayo nga aktibidad iti panagaliwaksay.

Dagiti kaputotan a dumteng kalpasanyo ket mabalin nga awagandakayo a nabendisionan gapu iti pagwadan ti panagkararag iti pamiliayo. Mabalin a dikayo makapatanor iti naindaklan a katulongan ti Dios, ngem mabalinyo babaen ti panagkararagyo ken ti pagwadanyo iti kinapudno ket makatulong ken ni Apo Jesucristo a mangpatanor kadagiti nasayaat ken ipatpateg a disipulo.

Maipapan ti amin dayta mabalin a pilienyo ti agaramid a makatulong iti Apo, ti kararag ti addanto iti tengnga daytoy. Nalawag nga adda dagiti gagangay a tao a, no agkararagda, maparegtada dagiti dadduma a mangimulagat kadagiti matada tapno makitada no asino ti adda sadiay. Makapagbalinkayo a kakasdiay a tao.

Panunotenyo no ania ti mabalin a kaipapanan dayta kadagiti makipagparintumeng kadakayo iti sangapamiliaan a panagkararag. No mariknada a makisasaokayo iti Dios iti pammati, pumigsanto ti pammatida tapno makisaoda met iti Dios. No agkararagkayo tapno agyaman iti Dios kadagiti parabur nga ammoda a dumteng, dumakkelto ti pammatida nga ay-ayaten ida ti Dios ken sungsungbatanna dagiti kararagyo ken sungbatannanto dagiti kararagda. Mabalin a mapasamak laeng dayta iti sangapamiliaan a panagkararag no naaddaankayon iti dayta a padas iti panagkararag nga agmaymaysa, a masansan.

Naparaburannak pay laeng iti maysa nga ama ken maysa nga ina a makisasao iti Dios. Ti pagwadanda iti bileg ti kararag kadagiti pamilia ket parabur pay laeng kadagiti kaputotan a dimteng kalpasanda.

Dagiti annakko ken appokok ket maparparaburanda iti inaldaw babaen ti pagwadan dagiti dadakkelko. Ti pammati nga adda managayat a Dios a dumngeg ken mangsungbat iti kararag ket naiyallatiwen kadakuada. Makaparnuaykayo iti kasta a tawid iti pamiliayo. Ikarkararagko a maaramidyonto.

© 2015 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/15. Pannakaanamongna a maipatarus: 6/15. Pannakaipatarus ti First Presidency Message, September 2015. Ilokano. 12589 864

Rambakan ti maika-20 nga Anibersario ti Waragawag iti Kaamaan

“Ti Kaamaan: Maysa a Waragawag iti Lubong,” ket mangisuro kadagiti pagbatayan nga apagpagisu a kasapulan ita kas idi immuna a naidatag idi Septiembre 23, 1995. Mangawis kadagiti indibidual wenno pamilia a sursuruanyo tapno mangrambak iti maika-20 nga anibersario ti waragawag babaen ti:

Panangilista kadagiti pagbatayan a linaonna nga addaan iti naisangayan a pateg para kadakuada. (Kitaen no kasano nga aramiden nga addaan iti kararag ni Presidente Eyring iti mensahe a nadakamat.)
Iti panangilawlawag no kasano a mangbendision kadakuada ti tunggal pagbatayan ita ken iti masakbayan.
Ti panangituding kadagiti nalawag a panggep a tuin-oyen tapno mausarda dagita a pagbatayan iti biagda ken mangibinglay kadagitoy kadagiti dadduma.