Poraus seni Fefin Chon Amwa, October 2015
Napanap mi Pin an Jises Kraist: Uren Tong Ennet
Anneaochu me ikiotek usun ekkei mettoch me kutta met kopwe aporausa. Ifa usun om weweiti usun manauan me angangen ewe Chon Amanau epwe tongeni anapano om nuku non I me efeiochu ekkewe aramas ka kan tumunu non om angangen an fefin chon amwa? Ren fatafatochun poraus, kopwe nengeni reliefsociety.lds.org.
Nuku, Famini, Aninis
Ewe Emwen ngeni Ekkewe Pukfel an awewei tong ennet pwe ewe sokkun “tong mi tekia, pung, pochokun nein meinisin sokkun tong” (“Charity”). Ina ewe ennetin tongen Jises Kraist. Nupwen sia kaeo usun Jises Kraist me achocho ne winiti usun I, sipwe poputa ne mefi an tong mi ennet non manauach me sipwe mefi ach sipwe pwan tongei me anisi aramas usun I epwe fori. “Tong ennet mi ach sipwe engino ren emon a anetipengaua kich,” anon Preseten Thomas S. Monson. “Ach sipwe u ngeni ach mochen ne songokai. Ach sipwe etiwa ekkewe apwangapwang me nipwakengau. Ach sipwe etiwa aramas non ennetin napanaper. Ach sipwe neno seni nikinikin inisin emon me nengeni napanap resap ngaueno ren fansoun. Ach sipwe u ngeni ach mochen ne apungu pwan emon.”1
Non ewe Puken Mormon, sia kaeo ewe ennet mi nap “iotek ngeni ewe Sam non pochokunen netip, pwe [sipwe] amasoua non netipach ren ei sokkun tong, a watiw won meinisin ir mi netip ennet ne feino mwirin Noun we Jises Kraist; pwe [sipwe] winiti noun Kot, pwe nupwen an epwe feito sipwe usun chok i, pwe sipwe fokkun kuna i won inisin, iwe, epwe wor ach apinukunuk; pwe sipwe fokkun nimenimoch usun chok i” (Moroni 7:48).
Pwan ekkoch Wokisin
John 13:34–35; 1 Corinth 13:1–13; 1 Nifai 11:21–23; Iter 12:33–34
Seni Ach Uruo
“Emon fefin a keran mano punuwan a fokkun kinisou ngeni ekkewe fefin chon amwa ra fiti i ne netipeta me ra echipa i. A makkei: ‘Ua fokkun mochen emon ua tongeni feino ren pwe epwe anisiei; emon epwe ausening ngeni ei. … Me ra ausening. Ra chachariei. Ra fitiei ne kechiw. Me ra pwan faropachei ei … [me] ra anisiei ai upwe tou seni ewe riaffou mi annonnon me netipengau non ekena maram ua akaemon.’
“Pwan emon fefin a awewei usun mefian nupwen a weri tong ennet me ren emon sensen fin amwa: ‘Ua sinei pwe esap ngang emon chok nampa non ekkewe puken uruo pwe epwe churi. Ua sinei pwe a aucheani ei.’”2
Usun chok ekkei fefin, chommong Aramas mi Pin Non Fansoun Soponon non unusan fonufan ra tongeni pwarata usun ei poraus seni Preseten Boyd K. Packer, Presetenin ewe Mwichen ekkewe Engon me Ruemon Aposel: “A fokkun akinamwei netipach pwe ese nifinifin ia a feino no ia [ew famini], ew faminien Mwichefen a witir. Seni ewe ran ar repwe war, ewe mwan epwe fiti ew miwchen ewe pristut, me ewe fefin epwe fiti Fin Anisi.”3
© 2015 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/15. Kapungunon chiakun: 6/15. Chiakun Visiting Teaching Message, October 2015. Chuukese. 12590 901
Ekkieki Usun Ei
Ifa usun Kraist I ach nenien appiru mi unusoch usun tong ennet?