Poraus seni ewe Aewin Presetensi, October 2015
Awesano ren Om Saram mi chok Tin
Seni Preseten Dieter F. Uchtdorf
Aruemonun Chon Aninis non ewe Aewin Presetensi
Non Greece non fansoun noom, chon saa ra fiti ew kitir itan lampadedromia. 1 Non ewe kitir, ekkewe chon saa ra kamoch efoch saramen ton mi ku me ra ngeni ewe pwan emon chon saa tori ewe saingonan a feino ren muchunon.
Ewe win ese no ngeni ewe team a kon mwitir—nge a no ngeni ewe aewin team ra tori muchun ewe kitir nge mi chok tin ar ewe saramen ton.
A wor ew poraus mi aucheanap sipwe kaeo ikkei ia, ew mi katou me ren soufosun nom me soufosun ikenai: ewer a auchea ach sipwe poputani ewe kitir, nge a kon nap auchean ach sipwe awesano ren ach saramen ton mi chok tin.
Solomon a Poputa non Pochokun
Ewe King Solomon i emon awewen usun emon a poputa non pochokun. Nupwen a kukkun, a “tongei ewe Samon, o a pwan apwonueta anon seman we David” (1 Kings 3:3). Kot a pwapwa ren me a apasa, “Met ka mochen upwe ngonuk” (1 Kings 3:5).
Ese pwan tingor pisekisek are manauetam, Solomon a tingor “mirit pwe upwe tongeni emweni noum kewe aramas, non wenechar o upwe sinei met mi och me met mi ngaw” (1 Kings 3:9).
Kot a kon pwapwa ren ei iwe a efeiochu Solomon esap chok ren mirit nge pwan pisekisek ese kouk me manauatam.
Nge ina mo pwe Solomon a fokkun mirit me a fori chommong mettoch mi napanap, ese awesano non pochokun. Netipengauan, mwirin och fansoun, “Solomon a tipis ngeni ewe Samon, o ese chiwen anneasosich ngeni ewe Samon” (1 Kings 11:6).
Awesano Pwisin Ach Kitir
Fan fite sia poputani och mettoch me sise awesano? Kekis? Kokkotun taiso? Kokkotun annea pukefel iteitan ran? Ekiekin anapano ach tapweno mwirin Jises Kraist?
Fan fite sia kan fori ach kokkoten ier mi fo non January me sia tiniken ne fiti ewe kokkot ukukkun ekkoch ran, are ekkoch wiik, are fen ekkoch maram me sia chok tori October, me ewe pwichikaren ach tiniken a chok patapateno?
Fan ew ua katon echo sasingin emon konak a chok kokkon ren echo taropwe a kamwei. A mak, “Setifikentin ei Konak mi Anneasosich.”
A ina usun kich fan ekkoch.
Ach mochen mi pung; sia poputa non pochokun; sia mochen aochueno pwisin kich. Nge non wesinon sia nikitano ach kewe kokkotun siwin ra kamw, poutuno, me sia menukireno.
A ina usun aramas repwe turuno, kuf, me fan ekkoch repwe mochen fangeta. Nge ren kich chon tapweno mwirin Jises Kraist, sise chok pwon pwe sipwe poputani ewe kitir nge sia pwan pwon pwe sipwe awesano—o poputani fengen me ach ewe saramen ton mi chiwen saramaram tinan. Ewe Chon Amanau a pwon ngeni noun kewe chon kuno, “I ewe epwe nikitu tori nesoponon, iwe epwe manau” (Matthew 24:13).
Mut ngeni ei ai upwe awewei usun an ewe Chon Amanau pwon fan itan ranich kewe: Ika pwe sipwe anneasosichi An kewe annnuk me awesano ren ach saramen ton mi chok tin, sipwe angei manau ese much, minne mi ewe nifang seni Kot mi nap seni meinisin (nengeni D&C 14:7; nengeni pwan 2 Nifai 31:20).
Ewe Saram Ese Tongeni Kununo
Fan ekkoch mwirin a turuno, kuf, are fangeta, sia netipengau me sia ekieki pwe ach saram a kun me sia kuf non ach kitir. Nge ua pwarata pwe ewe Saramen Kraist ese tongeni epwe kununo. Mi chok tin non ewe pwinin mi fokkun kiroch me epwe asaramasefanni netipach ika pwe sipwe sapei neitpach ngeni I (nengeni 1 Kings 8:58).
Ina mo ika fan fite are fen ifa ukukkun towawen ach turuno, ewe Saramen Kraist mi chok fokkun sarameno. Ina mo ika non ewe pwinin mi fokkun rochopwak, ika sipwe fetan ngeni I epwe asarameno ewe kiroch me attina sefanni ngunuch.
Ei kitir esap ew kitir mi moch sipwe chok akkamuch non; a ew kitir mi tam. Ese nifinifin usun ach mwitir. Ennetin, sipwe chok kuf non ewe kitir ika pwe sipwe fangeta.
Ika pwe sipwe chok feita me feino ren ewe Chon Amanau, sia wineni ewe kitir ren ach kewe saramen ton mi chok tin.
Ewe saram esap usun kich are usun met sia fori.
A usun ewe Chon Amanauen ewe fonufan.
Me a ew saram ese tongeni kisino. A ew saram mi asarameno ewe kiroch, echikara ach kinas, me mi chok tin non ewe anonnonun netipengau me kiroch mi nap.
A ew saram a nu seni ach tufichin wewe.
Amo emon me emon kich sipwe awesano ewe ann sia fen poputani. Me ren aninnisin ewe Chon Amanau me Chon Angaseno, Jises Kraist, sipwe awesano ren pwapwa me ach saram mi chok tin.
© 2015 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/15. Kapungunon chiakun: 6/15. Chiakun First Presidency Message, October 2015. Chuukese. 12590 901
Afanafan seni Ei Poraus
Ekieki usun om kopwe anisi ekkewe aramas ka aitir pwe repwe ekieki usun ia ra nom ia non ewe “kitir” an manau. Ar saramen ton mi chok saramaram? Ka tongeni anneani ewe kapas mi mak pwe ewe Saramen Kraist a “ew saram mi asaramano ewe kiroch, echikara ach kinas, me mi chok tin non ewe anonnonun netipengau me kiroch mi nap.” Mwirin kopwe ekieki ika pwe kopwe poraus ngeni ekkewe aramas ka osukuna won ifa usun ewe Saramen Kraist a amokutu manauer me noom me ifa usun a amokutu manauer iei.