Mensahe iti Visiting Teaching, Oktubre 2015
Dagiti Nadiosan a Kababalin ni Jesucristo: Napnuan iti Panangngaasi ken Ayat
Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawatyo kadagiti nadiosan a kababalin ti Mangisalakan ket mangpapigsa iti pammatiyo Kenkuana ken mangparabur kadagiti ay-aywananyo babaen ti visiting teaching? Para iti ad-adu pay nga impormasion, mapan iti reliefsociety.lds.org.
Pammati, Pamilia, Tulong
Iladawan ti Pangiwanwan iti Nasantuan a Kasuratan ti panangngaasi a kas “ti kangatuan, kataknengan, kapigsaan a kita ti ayat” (“Panangngaasi”). Daytoy ti natarnaw nga ayat ni Jesucristo. Bayat ti panangsursurotayo ken ni Jesucristo ket ikarigatantayo ti agbalin a kas Kenkuana, mangrugi a mariknatayto ti natarnaw nga ayatna iti panagbiagtayo ket maparegtatayo nga ayaten ken pagserbian dagiti dadduma kas Kenkuana. “Ti panangngaasi ket kaadda ti panaganus iti maysa a tao a nangibaba kadatayo,” kinuna ni Presidente Thomas S. Monson. “Daytoy ket panangkedked iti rikna nga agbalin a nalaka a mapasakitan. Daytoy ket panangawat kadagiti pagkapsutan ken pagkurangantayo. Daytoy ket panangawat kadagiti tao iti pudno a kinasiasinoda. Daytoy ket saan a panangipangruna kadagiti pisikal a langa ngem dagiti kababalin a saanto a mapukaw iti panaglabas ti panawen. Daytoy ket panagkedked iti rikna a mangilasin kadagiti sabali.”1
Iti Libro ni Mormon, masursurotayo ti naindaklan a kinapudno nga “agkararagtayo iti Ama iti amin a kabaelan ti pusotayo tapno maaddaantayo iti daytoy nga ayat nga impaayna iti amin a napudno a pasurot ti Anakna ni Jesucristo tapno agbalintayo nga annak ti Dios tapno inton agparang agbalintayonto a kas kenkuana ta makitatayonto met laeng a kas isu tapno maaddaantayo itoy a namnama tapno mapatarnawtayo a kas iti kinatarnawna” (Moroni 7:48).
Dagiti Mainayon a Nasantuan a Kasuratan
Juan 13:34–35; 1 Taga Corinto 13:1–13; 1 Nephi 11:21–23; Ether 12:33–34
Manipud iti Pakasaritaantayo
“Maysa a kabsat a babai a natay itay nabiit ti asawana ti agyamyaman kadagiti visiting teacherna a nakipagladingit kenkuana ken nangliwliwa kenkuana. Insuratna: ‘Kasapulak unay ti maysa a tao a mabalin nga asitgak iti tulong; maysa a tao a dumngeg kaniak. Ket dimngegda. Liniwliwadak. Nakipagladingitda kaniak. Ken inarakupdak … [ken] tinulongandak a makalung-aw iti napalalo a pannakapaay ken panagladingit kadagiti immuna a sumagmamano a bulan ti panagmaymaysak.’
“Sabali pay a babai ti nangilawlawag maipapan iti riknana idi makaawat isuna iti pudno a panangngaasi manipud iti visiting teacherna: ‘Ammok a maysaak laeng a sinarungkaranna tapno maddaan isuna iti nasayaat a bilang ti isasarungkarna a panangisuro. Ammok nga impategnak isuna.”2
Kas kadagitoy a kakabsat a babbai, maipaneknek ti adu a Santo iti Ud-udina nga Aldaw ti kinapudno daytoy a palawag ni Presidente Boyd K. Packer (1924-2015), Presidente ti Korum dagiti Sangapulo-ket-dua nga Apostol: “makalinglingay a mangammo a sadino man a mabalin a papanan ti [maysa a pamilia], agur-uray kadakuada ti maysa a pamilia ti Simbaan. Manipud iti aldaw ti isasangpetda, maibilangto ti ama iti korum ti priesthood ken maibilangto ti ina iti Relief Society.”
© 2015 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/15. Pannakaanamongna a maipatarus: 6/15. Pannakaipatarus ti Visiting Teaching Message, October 2015. Ilokano. 12590 864
Ibilang Daytoy
Kasano nga agbalin ni Cristo a naan-anay a pagwadantayo iti ayat ken panangngaasi?