Mensahe ti Umuna a Panguluen, Oktubre 2015
Leppasenyo iti Nakasindi pay Laeng a Pagsilawanyo
Ni Presidente Dieter F. Uchtdorf
Maikadua a Mammagbaga iti Umuna a Panguluen
Iti nagkauna a Grecia, makisalisal dagiti mannaray iti lumba ti nagkauna a Grecia iti tinnaray a maawagan iti lampadedromia.1 Iti salisal iti tinnaray, nakaiggem dagiti mannaray iti nasindian a pagsilawan [torch] ket ipasada daytoy iti sumaruno a mannaray agingga a makadanon ti maudi a miembro ti team iti finish line.
Saan a naited ti gunggona iti team a makataray iti kapardasan—naited ti gunggona iti umuna a team a nakadanon iti finish line a nakasindi pay laeng ti ti silawna [torch].
Adda maysa a naipangpangruna a leksion ditoy, maysa ti insuro dagiti nagkauna ken moderno a propeta, idinto ta napateg ti mangirugi iti lumba, napatpateg pay a maileppastayo daytoy a nakasindi pay laeng ti pagsilawantayo [torch].
Nangrugi a Napigsa ni Solomon
Ti naindaklan nga Ari Solomon ti pagwadan ti maysa a tao a nagrugi a napigsa. Idi ubing pay isuna, isu ket “inayatna ti Apo, a nagnagna kadagiti al-alagaden ni David nga amana” (1 Ar-ari 3:3). Naragsakan ti Apo kenkuana ket kinunana, “Kiddawem ti itedkonto kenka” (1 Ar-ari 3:5).
Imbes nga agkiddaw iti kinabaknang wenno napaut a biag, kiniddaw ni Solomon ti “maysa a mannakaawat a puso nga agukom iti ilim, tapno mabalinko nga ilasin ti naimbag ken ti dakes” (1 Ar-ari 3:9).
Daytoy ti nangparagsak unay iti Apo ta binendisionanna ni Solomon saan laeng nga iti sirib ngem kinabaknang pay a kasta unay ken napaut a biag.
Nupay pudno a masirib unay ni Solomon ken adu dagiti naindaklan a banag nga inaramidna, saan a nakaileppas a napigsa ni Solomon. Nakaladladingit, ta iti kamaudianan iti biagna, “inaramidna ti dakes iti imatang ti Apo, ket saan a simmurot a naan-anay ken ni Jehova” (1 Ar-ari 11:6).
Panangileppas iti Bukodtayo a Lumba
Namin-anon a gundaway a nangirugitayo iti maysa a banag ket ditayo naileppas? Panagdieta? Dagiti programa iti panagwatwat? Panagkumit nga agbasa kadagiti nasantuan a kasuratan iti inaldaw? Dagiti pangngeddeng nga agbalin a nasaysayaat a disipulo ni Jesucristo?
Kasano ti kasansan nga agaramidtayo kadagiti resolusion iti Enero ken ipatungpaltayo dagitoy nga addaan iti nasged a determinasion iti sumagmamano nga aldaw, sumagmamano a lawas, wenno uray pay sumagmamano a bulan tapno laeng maammuan nga iti Oktubre, saanen a nasged ti panagkumittayo a mangipatungpal iti determinasiontayo?
Maysa nga aldaw nakitak ti nakakatkatawa a ladawan ti maysa nga aso a nakaidda iti piraso ti papel a pinigispigisna. Nakasurat ditoy ti “Sertipiko ti Panagsanay iti Panagtungpal ti Aso.”
Maipadatayo iti dayta no dadduma.
Addaantayo kadagiti nasayaat a panggep; mangrugitayo a napigsa; kayattayo ti agbalin a kasayaatan mismo. Ngem iti udina bay-antayo a napigis, naibelleng, ken nalipatan dagiti resulosiontayo.
Nakaugalian ti tao ti maitublak, maupay, ken no dadduma dina kayaten nga ileppas ti lumba. Ngem kas disipulo ni Jesucristo, nagkumittayo saan laeng a tapno mangirugi iti lumba no di mangileppas pay iti daytoy—ken leppasentayo daytoy a nakasindi pay laeng ti silawtayo a siraraniag. Inkari ti Mangisalakan kadagiti disipulona, “Ti agtalinaed iti panungpalan, maisalakanto” (Mateo 24:13).
Bay-andak a mangadaw iti inkari ti Mangisalakan iti panawentayo: No tungpalentayo dagiti bilinna ket leppasentayo a nakasindi pay laeng ti silawtayo, maaddaantayonto iti agnanayon a biag, a daytoy ti kaindaklanan iti amin a sagut ti Dios (kitaen iti DkK 14:7; kitaen met iti 2 Nephi 31:20).
Ti Silaw a Saanto Pulos Mapuyupoy
No dadduma kalpasan ti pannakaitublak, pannakapaay, wenno uray pay isusuko, mapukaw ti namnamatayo ket mamatitayo nga awanen ti silawtayo wenno napukawen ti pannakilumbatayo. Ngem paneknekak a saanto pulos maiddep ti Silaw ni Cristo. Adda idiay para kadatayo uray no kadagiti karigatan a panawentayo ken ti silawna ti mangtulong kadatayo a manggun-od manen iti determinasion ken panagkumittayo no iruknoytayo dagiti pusotayo Kenkuana (kitaen iti 1 Ar-ari 8:58).
Kasano man ti kasansan wenno kasano man ti kaadayo ti pannakaitublaktayo, agtalinaed a nakasindi ti Silaw ni Cristo a siraraniag. Ken, uray kadagiti kadagsenan a rigattayto, no ikarigatantayo ti sumurot Kenkuana, marimbawantayo ti rigattayo ket maikkantayo ti kararuatayo iti pigsa nga agtultuloy a mangsurot Kenkuana.
Maipada ti panagbiag a kas disipulo ni Cristo iti panagtaray iti maysa a lumba nga agkasapulan iti agtultuloy a panagkagumaan iti napaut a panawen. Ken maiduma bassit no kasano ti kapardas ti panagdur-astayo (iti kinadisipulotayo). Kinapudnona, ti laeng wagas a pakaatiwantayo iti lumba ket panagsuko wenno panagbabawi.
No la ketdi agtultuloytayo a bumangon no maitublaktayo ket umasidegtayo iti Mangisalakan, mangabaktayo iti lumba a nakasindi a siraraniag dagiti silawtayo.
Gapu ta ti silaw [torch] ket saan a maipanggep kadatayo wenno maipanggep iti ar-aramidentayo.
Daytoy ket maipanggep iti Mangisalakan ti lubong.
Ken daytoy ti Silaw a saan a pulos mapuyupoy iti kaano man. Daytoy ti Silaw a mangrimbaw iti kasipngetan, mangpaimbag kadagiti sugattayo, ken pumigsa uray iti kangitingitan ti nalaus unay a panagladingit ken nakaro a rigat.
Daytoy ti Silaw a mangrimbaw iti pannakaawattayo.
Maileppas koma ti tunggal maysa kadatayo ti dalan nga inrugitayo a pagnaan. Ken babaen iti tulong ti Mangisalakan ken Mannubbottayo, ni Jesucristo, maileppastayonto a sirarag-o ken addaan pay laeng iti nakasindi a silaw.
© 2015 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/15. Pannakaanamongna a maipatarus: 6/15. Pannakaipatarus ti First Presidency Message, October 2015. Ilokano. 12590 864
Panangisuro manipud iti Daytoy a Mensahe
Allukoyenyo dagiti sursuruanyo a panunotenda ti maipapan iti no ania ti sasaadenda kadagiti “lumba” ti biagda. Sumsumged kadi a siraraniag dagiti pagsilawanda? Mabalinyo a basaen ti binatog nga agkuna a ti Silaw ni Cristo ket “maysa a Silaw a mangrimbaw iti kasipngetan, mangpaimbag kadagiti sugattayo, ken mangpapigsa uray iti kangitingitan ti nalaus unay a ladingit ken nakaro a rigatttayo. Kalpasanna paglilinnawaganyo kadagiti sursuruanyo no kasano nga inaringan ti Silaw ni Cristo dagiti biagda iti napalabas ken no kasano nga inaringan daytoy dagiti biagda ita.