Agtutubo

Ikkanyo ti Segden ti Pagsilawanyo: Ti 30 nga Aldaw a Panangpadas

Para kadagiti agtutubo iti Simbaan nga adu ti ar-aramidenda iti biagda, nalaka kadakuada ti agaramid gapu ta nakaugaliandan nga aramiden, nangruna no kadagiti naespirituan a banag. Agbasatayo kadagiti nasantuan a kasuratan, ken agdaydayawtayo iti kasta met la a wagas iti dumani inaldaw ket kalpasanna panagkunatayo a kasla saantayo a dumurdur-as a naespirituan.

Maysa kadagiti kapintasan a wagas a panangpatalinaedyo a nakasindi a siraraniag ti silawyo ket ti panangsigurado nga addaankayo kadagiti napapateg a naespirituan a padpadas. Ngem nalaklaka dayta nga isao ngem iti aramiden, isu a daytoy ti maysa a singasing a makatulong kadakayo nga agtultuloy iti naespirituan a panagduras: Mangpanunotka iti maysa nga aktibidad nga adda pakainaiganna iti ebanghelio a dimo pay pulos naaramid idi (wenno narigatanka a nangaramid) ket agkumitka a mangaramid iti daytoy iti inaldaw iti uneg ti makabulan. Mabalinmo nga irugi iti bassit gapu ta maammuamto a nalaklaka ti agaramid iti babassit a panagbalbalbaliw a dumur-asto iti manayon a panagbalbaliw. Ti panagaramid kadagiti naespirituan a banag a saantayo a nakaugalian nga aramiden ket mabalin nga agkasapulan iti napigpigsa a pammati ken panagkagumaantayo, ngem no aramidentayo dagitoy, aw-awisentayo ti Espiritu Santo a kumadua kadatayo, ken ipakpakitatayo ti dakdakkel a pammati iti Nailangitan nga Ama ken ti maysa a tarigagay nga umas-asideg Kenkuana. Dagitoy ti sumagmamano a kapanunotan a pangrugianyo:

Agaramidkayo iti panggep a tun-oyen a mangisao kadagiti kararagyo iti bigat ken rabii. Padasenyo ti agkararag iti napigsa.
Agriingkayo iti 15 a minuto a nasapsapa ket agbasakayo kadagiti nasantuan a kasuratanyo sakbay a mapan ageskuela.
Agbasakayo kadagiti kallabes a bitla ti sapasap a komperensia.
Mangipaskil iti maysa a nasantuan a kasuratan a naggapu iti Libro ni Mormon iti maysa a social media.
Dumngegkayo kadagiti himno wenno musika iti Simbaan imbes a ti gagangay a dengdenggenyo a musika.