Na itukutuku eso mai na Veibulu vei Elder Richard G. Scott

28 ni Sepiteba, 2015, Valecavu e Salt Lake

E cake: Me ivakananumi ni nona a cakacaka o Elder Scott ena Mataivalu e Wai ni Amerika, a soli e dua na kuila ni Amerika vua na luvei Elder Scott o Michael. Era a lavekisi na makubui Elder Scott tagane. Ena gauna ni veibulu era a mokoti Mary Lee, na luvena yalewa qase duadua vata kei Bruce na watina e yasana. iMawi: A tukuna o Peresitedi Thomas S. Monson ni o Elder Scott sa dua na “itokani daulomani ka itokani vakailesilesi ena cakacaka ni Turaga.” Draunipepa veibasai: Era a tucake ena icurucuru ni Valecavu na Kuoramu ni iApositolo Le Tinikarua kei na Mataveiliutaki ni Vitusagavulu ni curutaki yani na kisi.

Michael W. Scott, luvena tagane

“A sucu mai o Ta vua na tama sega ni lewenilotu kei na dua na tina, dina ga ni lewenilotu, a luluqa tu vakalotu ena vuqa na yabaki. … Nona vakaitavi ena lotu dau yaco ena gauna ga e vaqarai koya mai kina e dua ka mai kauti koya. Au kila ni ra a sega tu ni kila na iliuliu oya ni na yaco me dua na iliuliu bibi ni Lotu na cauravou era dau saga tiko oya me ra yacova. Au sega ni kilai ira na tamata oya, ia au vakavinavinaka vei ira. E rairai dua beka na vuna oqo e dau maqosa kina o Ta ena nona tarai na dua—o ira na luluqa vakalotu, na galili, o ira era yalolailai, o ira na beci—baleta ena gauna taumada oya ni nona bula, o koya na dua, na dua a tovolei me yacovi yani ka vueti mai. …

“A bulataka o Ta e dua na bula vakasinaiti ena marau kei na reki. E dauvakatagi ka daudroini. … E dau taleitaka me lako ka vakadidike. Na nona vakacagicagi talei me vakavodoki ira kece na gone kei na iyaya ena dua na Datsun lailai qai wavokita na lomanivanua. …

O Ta e dua na ivakaraitaki vakasakiti ni ivakarau me sotavi kina na dredre. E dua na ivakaraitaki vakaoqori na nona sotava nodrau mate e rua na luvena. Na nona sucumate e dua na luvedrau o Ta kei Na ka oti talega e rua na vula rau sa vakayali Richard yabaki rua mai na leqa ni uto, e matata na ka e cakava o Ta. Ena bogi oya a mokoti Na ka kaya vua, ‘Sega ni yaga me daru lomaleqa baleta o koya sa sucu ena loma ni veiyalayalati. Sa vakadeitaki tu vei kedaru ni na nodaru o koya ena veisiga mai muri. Sa tiko oqo na vuna vei kedatou me tou bula vakavinaka sara. E dua na luvei keirau sa lako ki na matanitu vakasilesitieli baleta ni mate ni se bera ni yacova na yabaki ni vakatulewa vakataki koya.’ E sega na rarawa, sa tu vua na inuinui; e sega na yaluma, ia sa vaqaqacotaka nona yalayala; e sega na vakatitiqa, sa cakacakataka nona vakabauti Karisito. …

“A digia me cecere na veika e cakava, ka yaco vakakina. Na nona vakamautaki Na sai koya beka na ka cecere duadua vei ira kece.”

A kaya o Elder D. Todd Christofferson ena Kuoramu ni iApositolo Le Tinikarua:

“E vakila o [Elder Scott] ni nona ilesilesi mai vua na Turaga me vakayagataka na iwali ni veivakabulai ni nona loloma soliwale na Karisito vei ira era lutu ena kedra maliwa na daubutako—na mavoa, o ira e bibi nodra icolacola, o ira na bikai, o ira na sega nodra inuinui, o ira era ivalavala ca, kei ira e caka vei ira na ivalavala ca. Ena yalo ni kusa sega ni matau vua, a sureta kina na tamata kecega me ra vakasaqara na Turaga ena talairawarawa ki na ivakavuvuli ni kosipeli ka kunea kina na vakacegu, marau, kei na reki. …

“A toka o Elder Scott ena nona vinaka duadua ena nona vakavulica ka vakadinadinataka na tawavakaiyalayala ni Veisorovaki tawavakaiyalayala nei Karisito kei na reki ena kunei ni da vuki vua na Kalou. …

“Erau vakavuvulitaka vei keda o koya kei na nona Jeanene lomani e dua na ivunau tudei ena nodrau ivakaraitaki ena kena ibalebale me lomani ka vakamareqeti na isa ni vakawati ka me solia nona igu kaukauwa duadua e dua vei ira na luvena. Na ivakaraitaki oya ni loloma kei na yalodina sa vakauqeti ira e udolu, kevaka e sega ni milioni, ena veiyabaki e muri mai. …

“E dau vakayaloqaqataka o Elder Scott, na totolo me vakaraitaka na yalodei, tuvakarau me veivakacaucautaki ka vakaraitaka na nona loloma. Oqori na nona ivakarau vei ira na tagane kei na yalewa e veivanua kecega, o ira sara mada ga na gone. Nona idusidusi e muacake ia e rawarawa, ka tudei. E vaka ni sega ni dau oca o Elder Scott ena veivakasalataki, veivakavulici, kei na veivakayaloqaqataki, yadudua se vakailawalawa. Au sega ni rawa ni tukuna vei kemuni sa vakavica se ena vica na vanua era tukuna kina vei au na tamata e dua na ka era vulica mai vei Elder Scott—ena so na gauna ni ra qai yabaki tinivakacaca—oqori sa vakauqeta na nodra bula kei na nodra veiqaravi me tekivu mai na gauna ko ya.”

E cake: Me ivakananumi ni nona a cakacaka o Elder Scott ena Mataivalu e Wai ni Amerika, a soli e dua na kuila ni Amerika vua na luvei Elder Scott o Michael. Era a lavekisi na makubui Elder Scott tagane. Ena gauna ni veibulu era a mokoti Mary Lee, na luvena yalewa qase duadua vata kei Bruce na watina e yasana. iMawi: A tukuna o Peresitedi Thomas S. Monson ni o Elder Scott sa dua na “itokani daulomani ka itokani vakailesilesi ena cakacaka ni Turaga.” Draunipepa veibasai: Era a tucake ena icurucuru ni Valecavu na Kuoramu ni iApositolo Le Tinikarua kei na Mataveiliutaki ni Vitusagavulu ni curutaki yani na kisi.

Peresitedi Russell M. Nelson, Peresitedi ni Kuoramu ni iApositolo Le Tinikarua

“Au nanuma vinaka tu na neirau a lako vata ki Amerika e Loma ena Epereli 1990. Au qoroqoro niu saravi Elder Scott ni vakavulici ira na daukaulotu kei na lewenilotu ena vosa vaka-Sipeni. Sega walega ni madila; e vakasakiti—bulabula ka veivakauqeti ni veivakavulici ena Yalotabu. …

“E sega ni guce ena nona vakavulici ira tiko na tamata ena vanua kecega e lako kina. A solia na nona bula me qaravi ira na tamata kecega, se vanua cava era cavutu mai kina, matatamata cava era lewena, se nodra ivosavosa. E kila o koya na bibi ni tamata yadua e sotava.

“E vakairogorogo nona yalololoma. Au sa sarava nona veivakavulici. Au sa sarava nona veilaveti. Au sa sarava na nona lomani ira na tamata kecega e vuravura.”

Peresitedi Thomas S. Monson

“O [Elder Scott] e rawata vakavinaka sara me qarava na itavi cava ga e soli vua, ka dau vakayacora vakamatailalai ena maqosa levu. …

“A tu maliwai keda kece sara ena veiyabaki sa sivi oqo o Richard G. Scott, e dua na tamata dokai, io na tamata ni Kalou. E vakalougatataki o Richard ena vakasama dau rai vakatitobu, ena kilaka bulabula, kei na yalo dauloloma. …

E lomani ira na tamata. Dau lomani ira nona matavuvale. E lomana na Tamana Vakalomalagi. …

“Na matadredredre nei Richard e dau dolava na yalodra na tani. E dau tautauvata nona logavinaka ni tiko vata kei ira na dravudravua kei ira na vakaleqai tu vakakina o ira na vutuniyau kei na rogo. …

“O Richard e dua ka yalo malua. A vakavulici keda ena loloma … na lesoni ni yaloqaqa, na lesoni ni dauvosota, na lesoni ni vakabauta, kei na lesoni ni yalodina. Na veika kece oqo e vakavulica vei keda o Richard G. Scott ena vosa kei na ivalavala.”