Mensahe sang Unang Panguluhan, Nobyembre 2015
Mangin Ehemplo kag Kapawa
Sa pagsunod naton sa ehemplo sang Manluluwas, maangkon naton ang kahigayunan nga mangin kapawa sa kabuhi sang iban.
Pinalangga kong mga kauturan, daw ano kanami nga makaupod ko kamo liwat. Sa nahibal-an ninyo, humalin nga magkaupod kita sang Abril, tuman naton nga ginkasubo ang pagtaliwan sang tatlo sang aton pinalangga nga mga Apostoles: Sanday Pangulong Boyd K. Packer, Elder L. Tom Perry, kag Elder Richard G. Scott. Nagbalik na sila sa ila langitnon nga puluy-an. Ginakahidlawan naton sila. Daw ano kita kamapinasalamaton para sa ila mga ehemplo sang Cristohanon nga gugma kag para sa makainspirar nga mga pagpanudlo nga ginbilin nila sa aton tanan.
Ginapalab-ot naton ang sinsero nga pag-abi-abi sa aton pinakabag-o nga mga Apostoles, nga sanday Elder Ronald A. Rasband, Elder Gary E. Stevenson, kag Elder Dale G. Renlund. Ini sila mga tawo nga maukod sa buluhaton sang Ginuo. Nagakaangay sila sa pag-okupar sing importante nga mga posisyon nga sa diin sila gintawag.
Sining ulihi lang, sang nagabasa ako kag nagabinagbinag sang balaan nga mga kasulatan, duha ka dinalan ang nagpabilin sa akon. Ining duha pamilyar sa aton. Ang una gikan sa Wali sa Bukid: “Ig-iwag ninyo ang inyo kapawa sa atubangan sang mga tawo, agud nga makita nila ang inyo mga buhat nga maayo, kag himayaon nila ang inyo Amay nga yara sa langit.”1 Ang ika-duha nga balaan nga kasulatan amo ang nag-abot sa akon hunahuna samtang ginabinagbinag ko ang kahulugan sang una. Ini gikan sa Sulat sang Apostoles nga si Pablo kay Timoteo: “Magmanginhuwaran ka sa mga nagatuo, sa pulong, sa paggawi, sa gugma, sa espiritu, sa pagtuo, sa kaputli.”2
Nagapati ako nga ang ika-duha nga balaan nga kasulatan nagapaathag, sa dako nga bahin, kon paano naton matuman ang una. Mangin mga ehemplo kita sang mga tumuluo paagi sa pagkabuhi sang ebanghelyo ni Jesucristo sa pulong, sa paggawi, sa gugma, sa espiritu, sa pagtuo, kag sa kaputli. Sa paghimo naton sini, ang aton mga kapawa magasiga sa bagay nga makita sang iban.
Ang tagsa sa aton nagkari sa duta nga ginhatagan na sang Kapawa ni Cristo. Sa aton pagsunod sang ehemplo sang Manluluwas kag pagkabuhi subong sang Iya pagkabuhi kag sang Iya pagtudlo, inang kapawa magadabdab sa sulod naton kag magapasanag sang alagyan para sa iban.
Ang Apostoles nga si Pablo naglista sang anum ka pamatasan sang isa ka tumuluo, mga pamatasan nga magatugot sang aton mga kapawa nga magsiga. Tan-awon naton ang kada isa.
Ginasambit ko ang una nga duha ka mga pamatasan sing ulupod—ang mangin ehemplo sa pulong kag sa pagpakigsugilanon. Ang mga pulong nga aton ginagamit sarang makabayaw kag makainspirar, ukon ang mga ini makapalain kag makapakanubo. Sa kalibutan karon may yara sang kadagaya sang pagpamuyayaw nga daw napalibutan kita sa halos tanan nga tion. Kabudlay likawan nga mabatian ang mga ngalan sang Dios nga ginagamit sing kaswal kag sing damuhal. Ang bastos nga mga komento daw nangin sentro na sang telebisyon, mga pelikula, mga libro, kag musika. Ang ginapalapta amo ang makaguluba nga mga komento kag akig nga mga hambalanon. Maghambal kita sa iban nga may gugma kag respeto, nga ginatipigan nga matinlo ang aton mga halambalanon kag ginalikawan ang mga pulong ukon mga komento nga makasakit ukon makasaklaw. Kabay nga sundon naton ang ehemplo sang Manluluwas, nga nagpamulong nga may pagpaumod kag kaayo sa bug-os sang iya pag-alagad.
Ang masunod nga pamatasan nga ginsambit ni Pablo amo ang gugma, nga ginlaragway bilang “ang putli nga gugma ni Cristo.”3 Nagasalig ako nga may yara sa masakopan sang aton impluwensia nga mga nagaisahanon, mga nagabalatian, kag mga nagabatyag sing kapaslawan. Aton ang kahigayunan nga buligan sila kag bayawon ang ila mga espiritu. Ang Manluluwas nagdala sang paglaum sa mga wala’y paglaum kag kusog sa mga mahuyang. Iya gin-ayo ang mga masakiton; Iya ginpahanabo nga ang piang nga makalakat, ang bulag nga makakita, ang bungol nga makabati. Iya pa gani ginbanhaw ang patay. Sa bug-os sang iya pag-alagad nagdab-ot Sia nga may gugma sa bisan sin-o nga nagkinahanglan. Sa pagsunod naton sang Iya ehemplo, pakamaayuhon naton ang mga kabuhi sang iban, lakip na ang aton.
Madason, dapat kita mangin ehemplo sa espiritu. Para sa akon ang kahulugan sina amo nga magtinguha kita nga maangkon sa aton mga kabuhi ang kaayo, kapasalamatan, kapatawaran kag maayong kabubut-on. Ining mga pamatasan magahatag sa aton sang espiritu nga magatandog sang kabuhi sinang yara sa palibot naton. Nangin kahigayunan ko sa pila na ka tuig nga makaupod ang di-maisip nga mga indibidwal nga nagaangkon sang subong nga espiritu. Maeksperiyensyahan naton ang isa ka espesyal nga balatyagon kon makaupod naton sila, isa ka balatyagon nga nagapahandum sa aton sa pag-upod sa ila kag pagsunod sang ila ehemplo. Ginapasilak nila ang Kapawa ni Cristo kag ginabuligan kita nga mabatyagan ang Iya gugma para sa aton.
Agud pamatud-an nga ang kapawa nga nagahalin sa putli kag mapinalanggaon nga espiritu makilala sang iban, ipaambit ko sa inyo ang isa ka eksperiyensya pila na katuig ang nagligad.
Sadto nga panahon, ang mga lider sang Simbahan nakigkita sa mga opisyales sa Jerusalem agud planohon ang isa ka kasugtanan sa pagrenta sa duta sa diin pagatukuron ang Jerusalem Center sang Simbahan. Agud maagom ang mga permiso nga kinahanglanon, ang Simbahan kinahanglan magpasugot nga wala sang pagpanghaylo nga pagahimuon ang aton mga miyembro nga magaokupar sang sentro. Pagkatapos nga matigayon ang amo nga kasugtanan, isa sang opisyal nga Israeli, nga nakasunar gid sa Simbahan kag sa mga miyembro sini, naghambal nga nakahibalo sia nga ang Simbahan magatuman sang kasugtanan nga wala sang pagpanghaylo. “Pero,” siling niya, nga nagatumod sa mga estudyante nga magatambong didto, “ano ang aton himuon sa kasanag nga yara sa ila mga mata?”4 Kabay nga inang espesyal nga kapawa magsilak sa sulod naton, nga ini mahimo nga makilala kag maapresyar sang iban.
Ang mangin isa ka ehemplo sang pagtuo nagakahulugan nga nagasalig kita sa Ginuo kag sa Iya pulong. Nagakahulugan ini nga ginaangkon naton kag ginapasanyog ang mga pagpati nga magagiya sa aton mga hunahuna kag mga buhat. Ang aton pagtuo sa Ginuong Jesucristo kag sa aton Amay nga Langitnon magaimpluwensya sang tanan nga aton ginahimo. Sa tunga sang katublagan sa aton panahon, mga konplekto sang konsensya, kag ang kagamo sang adlaw-adlaw nga kabuhi, ang isa ka tampad nga pagtuo ang mangin angkla sa aton mga kabuhi. Dumduma nga ang pagtuo kag ang pagpangduhaduha indi sarang magluntad sa isa ka panghunahuna sing dungan, kay ang isa magatabog sa isa. Ihambal ko liwat ang sulit-sulit nga ginahambal sa aton—nga agud maagom kag matipigan ang pagtuo nga kinahanglan naton, importante nga nagabasa kita kag nagatuon kag nagabinagbinag sang balaan nga mga kasulatan. Ang komunikasyon sa aton Amay nga Langitnon paagi sa pangamuyo importante. Indi kita sarang nga magpabaya sa sining mga butang, bangod ang kaaway kag iya mga guban wala’y untat nga nagapangita sang litik sa aton hinganib, isa ka kapaltahan sa aton pagtuo. Siling sang Ginuo, “Magpangita sing maukod, magpangamuyo pirme, kag mangin matinuohon, kag ang tanan nga butang magsanto para sa imo kaayuhan.”5
Sa katapusan, kinahanglan kita mangin putli, nga nagakahulugan nga matinlo kita sa lawas, hunahuna, kag espiritu. Nakahibalo kita nga ang aton lawas isa ka templo, nga dapat tratuhon nga may pagtahod kag respeto. Ang aton mga isip dapat mapuno sang makapabayaw kag makapasanyog nga mga hunahuna kag mahilway gikan sinang mga butang nga makapahigko. Agud mangin dalayon naton nga kaupod ang Balaan nga Espiritu, kinahanglan mangin takos kita. Mga kauturan, ang kaputli magadala sa aton sang katawhay sa hunahuna kag magahimo sa aton nga nagakaangay sa pagbaton sang mga promisa sang Manluluwas. Siling Niya, “Bulahan ang tanan nga putli sing tagipusuon kay makakita sila sang Dios.”6
Sa aton pagpamat-od nga mangin mga ehemplo sa pulong, sa paggawi, sa gugma, sa espiritu, sa pagtuo, kag sa kaputli, mangin bagay kita nga mangin mga kapawa sa kalibutan.
Luyag ko maghambal sa inyo tanan, kag ilabi na sa inyo nga mga lamharon, nga samtang ang kalibutan padayon nga nagapalayo gikan sa mga prinsipyo kag mga giya nga ginhatag sa aton sang isa ka mapinalanggaon nga Amay nga Langitnon, mangin talalupangdon kita sa kadam-an bangod nga pinasahi kita. Mangin talalupangdon kita bangod maugdang kita magbiste. Mangin pinasahi kita bangod wala kita nagapamuyayaw kag bangod wala kita nagagamit sang mga bagay nga makapalain sa aton lawas. Mangin pinasahi kita bangod nagalikaw kita sa bastos nga mga lahog-lahog kag makapakanubo nga mga komento. Mangin pinasahi kita sa aton pagpamat-od nga indi pagsudlan ang aton mga hunahuna sang mga media nga imoral kag nagapakanubo kag nga magakakas sang Espiritu gikan sa aton mga puluy-an kag aton mga kabuhi. Pat-od nga kita mangin talalupangdon sa aton paghimo sang mga pagpili parte sa moralidad—mga pagpili nga nagaangot sa mga prinsipyo kag mga sulundan sang ebanghelyo. Inang mga butang nga nagahimo sa aton nga pinasahi sangsa kadam-an sa kalibutan nagahatag man sa aton sinang kapawa kag sinang espiritu nga magapasanag sa padayon nga nagadulom nga kalibutan.
Masami mabudlay nga mangin pinasahi kag magtindog nga isahanon sa kadam-an. Natural nga magkahadlok sa kon ano ang mahimo nga hunahunaon ukon hambalon sang iban. Makapasulhay ang mga pulong sang salmo: “Ang Ginuo akon kapawa kag akon kaluwasan; sin-o bala ang kahadlokan ko? ang Ginuo amo ang kalig-onan sang akon kabuhi; sin-o bala ang kahangaw-an ko?”7 Sa paghimo naton kay Cristo nga sentro sang aton kabuhi, ang aton mga kahadlok pagabuslan sang kaisog sang aton mga pagpati.
Wala sa aton ang may perpekto nga kabuhi, kag kon kaisa ang mga hangkat kag mga kabudlayan nga ginaatubang naton mahimo nga mangin makahalawhaw, nga nagatuga sa aton kapawa nga magdulom. Apang, upod ang bulig gikan sa aton Amay nga Langitnon, updan pa gid sang suporta gikan sa iban, sarang naton maagom liwat inang kapawa nga magapasanag sang aton kaugalingon nga alagyan sa liwat kag maghatag sang kasanag nga mahimo nga kinahanglan sang iban.
Agud pamatud-an ini, ipaambit ko sa inyo ang makatalandog nga mga pulong sang isa ka paborito nga binalaybay nga una ko nabasa pila na katuig ang nagligad:
Nakilala ko ang estranghero sa kagab-ihon
Ang iya suga wala nagasiga.
Nagpundo ako kag gintugutan s’ya
Nga magsindi sang iya suga gikan sa akon.
Isa ka unos ang nagtuhaw
Kag gintay-og ang duta.
Kag sang ang hangin magpuas
Napatay ang akon suga!
Apang nagbalik ang estranghero—
Masanag ang iya suga!
Ginkaptan niya ang bilidhon nga kalayo
Kag ginsindihan niya ang akon suga!8
Mga kauturan ko, ang aton mga oportunidad nga magsilak nagapalibot sa aton sa tagsa ka adlaw, sa bisan ano nga sirkumstansya nga masalapuan naton ang aton mga kaugalingon. Sa pagsunod naton sa ehemplo sang Manluluwas, maangkon naton ang kahigayunan nga mangin kapawa sa kabuhi sang iban, bisan pa sila aton kaugalingon nga mga miyembro sang pamilya kag mga abyan, aton mga kaupod sa ulubrahan, mga kakilala, ukon lubos nga mga estranghero.
Sa tagsa sa inyo, ginasiling ko nga kamo anak nga lalaki ukon babayi sang aton Amay nga Langitnon. Naghalin kamo sa Iya presensya agud magkabuhi sa sining duta sa isa ka tion, agud magbinagbinag sa gugma kag mga pagpanudlo sang Manluluwas, kag agud maisog nga pasanagon ang inyo kapawa sa bagay nga makita sang tanan. Kon ang ina nga tion sa duta matapos na, kon nahimo na ninyo ang inyo bahin, maangkon ninyo ang mahimayaon nga bugay sang pagbalik sa pagpuyo upod sa Iya sa wala’y katapusan.
Daw ano kamakapasulhay ang mga pulong sang Manluluwas: “Ako ang kapawa sang kalibutan: siya nga nagasunod sa akon indi magalakat sa kadulom, kundi magalakat sa kapawa sang kabuhi.”9 Nagapamatuod ako sa Iya. Sia ang aton Manluluwas kag Manunubos, ang aton Mananabang sa Amay. Sia ang aton Ehemplo kag ang aton kusog. Sia “ang kapawa nga nagasiga sa dulom.”10 Nga ang tagsa sa aton nga makabati sa akon kabay nga magpangako nga sundon Sia, gani mangin isa ka masanag nga kapawa sa kalibutan, amo ang akon pangamuyo sa Iya balaan nga ngalan, nga si Jesucristo nga Ginuo, amen.
© 2015 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/15. Petsa sang pagtugot sa paglubad: 6/15. Paglubad sang First Presidency Message, November 2015. Hiligaynon. 12591 861