Mensahe sa Visiting Teaching, Nobyembre 2015
Ang Balaan nga Espiritu bilang Inyo Kaupod
Kon magpangabuhi kita nga takos, sarang naton maangkon ang bugay sang Espiritu sa pag-upod sa aton, indi lamang sa panalagsa kundi sa tanan nga tion.
Mahal kong mga kauturan, nalipay ako nga nakaupod ko kamo sa sining adlaw sang Pagsimba sa pangkabilugan nga komperensya sang Simbahan sang Ginuo. Nabatyagan ko, subong man sa inyo, ang Espiritu, ang Balaan nga Espiritu, nga nagasaksi sa mga pulong sang kamatuoran nga aton nabatian nga ginhambal kag ginkanta.
Ang akon tuyo karon nga adlaw amo ang padakuon ang inyo handum kag inyo determinasyon nga dawaton ang dulot nga ginpromisa sa tagsa sa aton pagkatapos nga kita ginbunyagan. Sa tion sang pagkompirmar sa aton, nabatian naton ining mga pulong: “Batuna ang Balaan nga Espiritu.”1 Humalin sadto nga tion, ang aton kabuhi nagbag-o sing dalayon.
Kon magpangabuhi kita nga takos, sarang naton maangkon ang bugay sang Espiritu sa pag-upod sa aton, indi lamang sa panalagsa, pareho sang manami nga mga eksperiyensya nga may yara kita karon nga adlaw, kundi sa tanan nga tion. Nakahibalo kamo gikan sa mga pulong sang pang-sakramento nga pangamuyo kon paano inang promisa ginatuman: “O Dios, ang Wala’y Katapusan nga Amay, nagapangabay kami sa imo sa ngalan sang imo Anak, nga si Jesucristo, sa pagpakamaayo kag pagpakabalaan sining tinapay sa mga kalag sang tanan sadtong magaambit sini, agud sila makakaon bilang pagpanumdom sang lawas sang imo Anak, kag magsaksi sa imo, O Dios, ang Wala’y Katapusan nga Amay, nga handa sila sa pagdala sa ila kaugalingon sang ngalan sang imo Anak, kag dalayon nga magdumdom sa iya kag magtuman sang iya mga kasuguan nga iya ginhatag sa ila.”
Kag dayon yari ang mahimayaon nga promisa: “Agud ila dalayon nga maangkon ang iya Espiritu sa pag-upod sa ila” (D&C 20:77; pagdagmit gindugang).
Ang dalayon nga maangkon ang Espiritu sa pag-upod sa aton amo ang maangkon ang giya kag direksyon sang Balaan nga Espiritu sa aton adlaw-adlaw nga kabuhi. Sarang kita, halimbawa, nga mapaandaman sang Espiritu sa pagbato sa tentasyon sa paghimo sang malain.
Sa sina lamang nga rason, mahapos makita kon ngaa ang mga alagad sang Ginuo nagtinguha sa pagpadako sang aton handum sa pagsimba sa Dios sa aton mga miting sa sakramento. Kon mag-ambit kita sang sakramento nga may pagtuo, ang Balaan nga Espiritu nian makaamlig sa aton kag sa aton mga mahal sa kabuhi gikan sa mga tentasyon nga nagaabot nga may dalayon nga kakusog kag kasunson.
Ang pagpakig-upod sang Balaan nga Espiritu nagahimo sa kon ano ang maayo nga mas manami kag ang tentasyon nga mas indi tuman kamakagalanyat. Ang ina lang mismo dapat mangin tuman na sa paghimo sa aton nga determinado nga mangin angayan sa dalayon nga pag-upod sang Espiritu sa aton.
Subong nga ang Balaan nga Espiritu nagapabakod sa aton batok sa kalainan, ginahatagan man Niya kita sang gahum sa pagsat-om sang kamatuoran gikan sa kabutigan. Ang kamatuoran nga labing importante ginapamatud-an lamang paagi sa bugna [revelation] gikan sa Dios. Ang aton tawhanon nga rason kag ang gamit sang aton pisikal nga mga igbalatyag indi mangin bastante. Nagakabuhi kita sa panahon nga bisan ang pinakamaalam nga tawo mabudlayan sa pagsat-om sang kamatuoran gikan sa tuso nga paglimbong.
Ang Ginuo nagtudlo sa Iya Apostoles nga si Tomas, nga nangayo sang pisikal nga ebidensya sang Pagkabanhaw sang Manluluwas paagi sa pagtandog sang Iya mga pilas, nga ang bugna mas masaligan nga ebidensya: “Si Jesus nagsiling sa iya, Tomas, bangod nga nakakita ka sa akon, nagtuo ka: bulahan ang wala makakita, kag wala’y sapayan nagatuo” (Juan 20:29).
Ang mga kamatuoran nga nagamarka sang alagyan pauli sa Dios ginapamatud-an sang Balaan nga Espiritu. Indi kita sarang makakadto sa kakahuyan kag makita ang Amay kag ang Anak nga nagahambal sa lamharon nga si Joseph Smith. Wala sing pisikal nga ebidensya ukon bisan ano nga rasonable nga argumento ang makaestablisar nga si Elias nag-abot subong nga ginpromisa agud ihatag ang mga yabi sang priesthood nga sa karon ginakaptan kag ginagamit sang isa ka buhi nga propeta nga si Thomas S. Monson.
Ang kompirmasyon sang kamatuoran nagaabot sa isa ka anak nga lalaki ukon babayi sang Dios nga nakadawat sang kinamatarong sa pagbaton sang Balaan nga Espiritu. Bangod ang mga kabutigan kag di-matuod mahimo nga ipresentar sa aton sa bisan ano nga tion, kinahanglan naton sing dalayon nga impluwensya sang Espiritu sang Kamatuoran sa pagluwas sa aton sa mga tinion sang pagduhaduha.
Samtang isa ka miyembro sang Korum sang Napulo’g Duha ka mga Apostoles, si George Q. Cannon nagpanugyan nga maghimo kita sing dalayon nga pagtinguha para sa Espiritu nga mag-upod sa aton. Nagpromisa Sia, kag ginapromisa ko man ini, nga kon sundon naton ang ina nga direksyon, kita “indi gid makulangan sing ihibalo” sang kamatuoran, “indi gid magpangduhaduha ukon madulman,” kag ang aton “pagtuo mangin mabaskog, [aton] kalipay … bug-os.”2
Kinahanglan naton ang ina nga dalayon nga bulig gikan sa pagpakig-upod sang Balaan nga Espiritu para sa isa pa gid ka rason. Ang kamatayon sang isa ka mahal sa kabuhi mahimo matabo nga wala ginapaabot. Ang saksi gikan sa Balaan nga Espiritu sang realidad sang isa ka mapinalanggaon nga Amay nga Langitnon kag isa ka nabanhaw nga Manluluwas ang nagahatag sa aton sang paglaum kag kasulhay sa pagkadula sang isa ka mahal sa kabuhi. Ang ina nga panaksihon kinahanglan mangin preska kon ang kamatayon matabo.
Gani, sa madamo nga mga rason, kinahanglan naton ang dalayon nga pagpakig-upod sang Balaan nga Espiritu. Ginahandum naton ini, apang nakahibalo kita gikan sa inagihan nga indi ini mahapos mentenaron. Ang tagsa sa aton nagahunahuna, nagahambal, kag nagahimo sang mga butang sa aton adlaw-adlaw nga kabuhi nga sarang magsaklaw sang Espiritu. Ang Ginuo nagtudlo sa aton nga ang Balaan nga Espiritu aton mangin dalayon nga kaupod kon ang aton mga tagipusuon napuno sang gugma kag kon ang katakos nagaadorno sang aton mga hunahuna sing wala’y untat (tan-awa sa D&C 121:45).
Sa sinang mga nagahimud-os para sa mataas nga sulundan nga kinahanglanon agud mangin angayan sa dulot sang pagpakig-upod sang Espiritu, ginatanyag ko ining pagpaisog. May mga nangin tinion kamo nga inyo nabatyagan ang impluwensya sang Balaan nga Espiritu. Ayhan natabo ini sa inyo karon nga adlaw.
Sarang ninyo kabigon yadtong mga tinion sang inspirasyon pareho sa liso sang pagtuo nga ginlaragway ni Alma (tan-awa sa Alma 32:28). Itanom ang kada isa. Sarang ninyo ina himuon paagi sa pag-akto sa pagpaisog nga inyo nabatyagan. Ang pinakabilidhon nga inspirasyon amo nga inyo mahibaloan kon ano ang ipahimo sa inyo sang Dios. Kon ini amo ang pagbayad sang ika-pulo ukon ang pagbisita sa isa ka abyan nga nagapangalisud, dapat ninyo himuon ini. Kon ano man ina, himoa. Kon ipakita ninyo ang inyo kahanda sa pagtuman, ang Espiritu magapadala sa inyo sing dugang pa gid nga mga pagpabatyag sang kon ano ang luyag sang Dios nga himuon ninyo para sa Iya.
Sa inyo pagtuman, ang mga pagpabatyag gikan sa Espiritu magaabot sing mas masunson, nga nagahilapit pa gid sa dalayon nga pagpakig-upod. Ang inyo gahum sa pagpili sang husto magadugang.
Sarang ninyo mahibaloan kon ang ining mga pagpabatyag nga maggiho para sa Iya nagagikan sa Espiritu kag indi sa inyo kaugalingon nga mga kagustuhan. Kon ang mga pagpabatyag nagasanto sa kon ano ang ginsiling sang Manluluwas kag sang Iya buhi nga mga propeta kag mga apostoles, sarang kamo magpili sa pagtuman nga may pagsalig. Dayon ang Ginuo magapadala sang Iya Espiritu sa pag-upod sa inyo.
Halimbawa, kon makabaton kamo sang espirituhanon nga pagpabatyag sa pagtahod sang adlaw nga Inugpahuway, ilabi na kon daw mabudlay, ang Dios magapadala sang Iya Espiritu agud magbulig.
Ang ina nga bulig nag-abot sa akon amay pila na ka tuig ang nagligad sang ang iya trabaho nagdala sa iya sa Australia. Nagaisahanon sia sang isa ka Domingo, kag luyag niya mag-ambit sang sakramento. Wala sia may makita nga impormasyon parte sa mga miting sang mga Santos sa Ulihing mga Adlaw. Gani nagsugod sia sa paglakat. Nagpangamuyo sia sa tagsa ka kanto agud mahibaloan kon diin nga dalan magliko. Pagkatapos nga maglakat kag magliko sa sulod sang isa ka oras, nagpundo sia agud magpangamuyo liwat. Nakabaton sia sang isa ka pagpabatyag nga maglakat sa isa ka partikular nga kalye. Sa ulihi nakabati sia sang pagkinanta nga nagahalin sa idalom nga panalgan sang isa ka bilding sang apartment nga malapit lang. Naglili sia sa bentana kag nakita ang pila ka mga tawo nga nagapungko malapit sa isa ka lamesa nga natabunan sang puti nga tela kag mga trey sang sakramento.
Karon, daw sa kagamay man lang ina para sa inyo, pero isa yadto ka manami nga butang sa iya. Nakahibalo sia nga ang promisa sang pang-sakramento nga pangamuyo natuman: “Dalayon nga magdumdom sa iya kag magtuman sang iya mga kasuguan nga iya ginhatag sa ila; agud ila dalayon nga maangkon ang iya Espiritu sa pag-upod sa ila” (D&C 20:77).
Yadto isa lamang ka halimbawa sang isa ka tion nga nagpangamuyo sia kag dayon ginhimo ang ginhambal sang Espiritu sa iya nga gusto sang Dios nga himuon niya. Ginpadayon niya ini sa mga tinuig, subong nga kamo kag ako magapadayon man. Wala gid sia nagahambal parte sa iya espirituwalidad. Padayon lamang sia nga nagahimo sang magagmay nga mga butang para sa Ginuo nga ginpabatyag nga iya himuon.
Kon may mga grupo sang mga Santos sa Ulihing mga Adlaw ang magpangabay sa iya nga maghambal sa ila, ginhimo niya ini. Indi na importante pa kon 10 ka tawo ukon 50 ukon ano sia kakapoy. Ginpahayag niya ang iya panaksihon parte sa Amay, sa Anak, kag sa Balaan nga Espiritu kag sa mga propeta kon paisogon sia sang Espiritu nga himuon ini.
Ang iya pinakamataas nga mga calling sa Simbahan amo ang sa mataas nga konseho sang Bonneville Utah Stake, sa diin nagpanghilamon sia sa uma sang stake, kag nagtudlo sia sa klase sa Sunday School. Sa madamo nga tinuig, kon ginkinahanglan niya, ang Balaan nga Espiritu yara bilang iya kaupod.
Nagtindog ako sa tupad sang akon amay sa isa ka hulot sa ospital. Ang akon iloy, nga iya asawa sing 41 katuig, nagahigda sa kama. Ginbantayan sia namon sing pila ka oras. Amat-amat namon nga nakita nga nagatahaw ang mga linya sang kasakit sa iya nawong. Ang mga tudlo sang iya mga kamot, nga nagakuom, nagkalma. Ang iya mga butkon nag-untay sa iya mga kilid.
Ang kasakit sang tinuig nga kanser nagahingapos na. Nakita ko sa iya nawong ang dagway sang kalinong. Nagpunga-punga sia, dayon nagsido, kag dayon wala na naggiho pa. Nagatindog kami nga nagahulat agud tan-awon kon magginhawa pa sia liwat.
Sa katapusan, si Tatay naghambal sing mahinay, “Isa ka diutay nga bata ang nagpauli na.”
Wala sia naghibi. Ina bangod ang Balaan nga Espiritu dugay na nga naghatag sa iya sang maathag nga larawan sang kon sin-o ang akon iloy, kon diin sia naghalin, kon nangin ano sia, kag kon diin sia makadto. Ang Espiritu nagsaksi sa iya sing madamo nga beses parte sa isa ka mapinalanggaon nga Amay nga Langitnon, sa isa ka Manluluwas nga nagbugto sang gahum sang kamatayon, kag sang realidad sang paghugpong sa templo nga iya ginpaambit sa iya asawa kag pamilya.
Ang Espiritu malawig na nga nagpasalig sa iya nga ang iya kaayo kag pagtuo naghimo sa iya nga takos sa pagbalik sa isa ka langitnon nga puluy-an nga sa diin sia pagadumdumon bilang isa ka manami nga anak sang promisa kag pagaabi-abihon sa iya pagpauli nga may pagpasidungog.
Para sa akon tatay, yadto labi pa sangsa isa ka paglaum. Ang Balaan nga Espiritu naghimo sadto nga isa ka realidad para sa iya.
Karon, may pila nga mahimo magsiling nga ang iya mga pulong kag ang mga larawan sa iya hunahuna parte sa isa ka langitnon nga puluy-an isa lamang ka manami nga sentimyento, ang nakulapan nga panan-awon sang isa ka bana sa tion nga sia namatyan. Apang nahibal-an niya ang wala’y katapusan nga kamatuoran sa paagi gid lamang nga sarang ninyo mahibaloan ini.
Isa sia ka siyentipiko nga nagpangita sang kamatuoran parte sa pisikal nga kalibutan sa bug-os sang iya hamtong nga kabuhi. Iya gingamit ang mga kasangkapan sang siyensya sing may kabatid agud mapasidunggan sang iya mga kaupod sa bug-os nga kalibutan. Kalabanan sang iya ginhimo sa chemistry naghalin sa mga imahe sa iya hunahuna sang mga molecules nga nagagiho kag dayon sa pagkakompirmar sang iya panan-awon paagi sa mga eksperimento sa isa ka laboratoryo.
Apang ginsunod niya ang lain nga paagi agud masalapuan ang mga kamatuoran nga importante kaayo sa iya kag sa tagsa sa aton. Paagi lamang sa Balaan nga Espiritu sarang naton makita ang mga tawo kag mga hitabo subong nga makita ang mga ini sang Dios.
Ang ina nga dulot nagpadayon sa ospital pagkatapos nagtaliwan ang iya asawa. Gintipon namon ang mga pagkabutang sang akon iloy agud dalhon pauli. Si Tatay nagpundo agud magpasalamat sa tagsa ka nars kag doktor nga amon nasugata sang nagapagwa kami pakadto sa salakyan. Nadumduman ko nga nabatyagan ko, nga may diutay nga pag-ugtas, nga dapat kami maglakat agud mag-isahanon sa amon kalisud.
Narealisar ko karon nga nakita niya ang mga bagay nga ang Balaan nga Espiritu lamang ang nakapakita sa iya. Nakita niya yadtong mga tawo bilang mga anghel nga ginpadala sang Dios agud bantayan ang iya pinalangga. Ayhan nakita nila ang ila mga kaugalingon bilang mga propesyunal nga manugtatap sa ikaayong-lawas, pero si Tatay nagapasalamat sa ila para sa ila serbisyo tal-os sa Manluluwas.
Ang impluwensya sang Balaan nga Espiritu nagpadayon upod sa iya sa amon pag-abot sa balay sang akon mga ginikanan. Nagsugilanon kami sing pila ka minutos sa salas. Si Tatay nagdispensa agud magkadto sa iya kwarto nga malapit lang.
Pagkaligad sang pila ka minutos, nagbalik sia sa salas. Kanami sang iya yuhum. Nagpalapit sia sa amon kag naghambal sing mahinay, “Nagkabalaka ako nga si Mildred mag-abot sa kalibutan sang mga espiritu nga isahanon. Ginahunahuna ko nga basi magbatyag sia sang pagkaalang-alang sa kadam-an.”
Dayon naghambal sia sing malipayon, “Nagpangamuyo ako bag-o lang gid. Nakahibalo ako nga yara sa maayo si Mildred. Ang akon iloy yara didto agud sugataon sia.”
Nadumduman ko nga nagayuhum ako samtang ginahambal niya ina, nga ginapaminsar ang akon lola, ang iya malip-ot nga mga paa nga nagadagon-dagon, nagapanagil-ot sa kadam-an agud sigurohon nga yara sia sa pagsugat kag paghakos sang iya umagad sa iya pag-abot.
Karon, isa sang mga rason nga ang akon amay nagpangayo kag nagbaton sinang pagpasulhay kay tungod pirme sia nagapangamuyo sadto pa humalin sa iya pagkabata. Naanad sia nga makabaton sang mga sabat nga nagaabot sa iya tagipusuon agud maghatag sang kasulhay kag direksyon. Dugang pa sa pag-angkon sang pamatasan sang pagpangamuyo, kabisado niya ang balaan nga mga kasulatan kag ang mga pulong sang buhi nga mga propeta. Gani nakilala niya ang pamilyar nga mga paghutik sang Espiritu, nga ayhan inyo nabatyagan karon nga adlaw.
Ang pagpakig-upod sang Espritiu wala lang nagpasulhay kag naggiya sa iya. Ini nagbag-o sa iya paagi sa Pagpasag-uli ni Jesucristo. Kon batunon naton inang promisa sa pag-angkon sang Espiritu sa pag-upod sa aton sing dalayon, ang Manluluwas sarang makahatag sa aton sang pagtinlo nga kinahanglan para sa kabuhi nga wala’y katapusan, ang pinakahalangdon sa tanan nga mga dulot sang Dios (tan-awa sa D&C 14:7).
Dumduma ninyo ang mga pulong sang Manluluwas: “Karon ini ang kasuguan: Maghinulsol, tanan kamong yara sa mga ukbong sang duta, kag magkari sa akon kag magpabunyag sa akon ngalan, agud kamo mapakabalaan paagi sa pagbaton sang Balaan nga Espiritu, agud makatindog kamo nga wala’y musing sa akon atubang sa katapusan nga adlaw” (3 Nefi 27:20).
Yadtong mga kasuguan may dala sining promisa gikan sa Ginuo:
“Kag karon, sa pagkamatuod, ginasiling ko sa inyo, ibutang ang inyo salig sa sinang Espiritu nga nagapanguna sa paghimo sing maayo—huo, sa paghimo sing matarong, sa paglakat sing mapainubuson, sa paghukom sing matarong; kag ini ang akon Espiritu.
“Sa pagkamatuod, ginasiling ko sa inyo, ipahayag ko sa inyo ang akon Espiritu, nga magapasanag sang inyo hunahuna, nga magapuno sang inyo kalag sang kalipay” (D&C 11:12–13).
Ginapahayag ko sa inyo ang akon panaksihon nga ang Dios nga Amay buhi, nga ang nabanhaw nga si Jesucristo ang nagapanguna sang Iya Simbahan, nga si Pangulong Thomas S. Monson nagakapot sang tanan nga yabi sang priesthood, kag nga ang bugna paagi sa Balaan nga Espiritu nagagiya kag nagasakdag sang Ang Simbahan ni Jesucristo sang mga Santos sa Ulihing mga Adlaw kag sang mapainubuson nga mga miyembro sini.
Dugang ko nga ginasaksi sa inyo nga ining manami nga mga tawo nga sa karon nga adlaw nagahambal sa aton bilang mga saksi sang Ginuong Jesucristo, bilang mga miyembro sang Korum sang Napulo’g Duha ka mga Apostoles, gintawag sang Dios. Nakahibalo ako nga ang Espiritu naggiya kay Pangulong Monson sa pagtawag sa ila. Kag sa inyo pagpamati sa ila kag sa ila mga panaksihon, ang Balaan nga Espiritu nagkompirmar sa inyo sang akon karon ginasiling sa inyo. Sila gintawag sang Dios. Ginasakdag ko sila kag ginapalangga ko sila kag nakahibalo nga ang Ginuo nagapalangga sa ila kag magasakdag sa ila sa ila pag-alagad. Kag ini ginahimo ko sa ngalan sang Ginuong Jesucristo, amen.
© 2015 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/15. Pagtugot sa paglubad: 6/15. Paglubad sang Visiting Teaching Message, November 2015. Hiligaynon. 12591 861