Visiting Tijing Mesej, Disemba 2015
Ol Tabu Fasin blong Jisas Kraes: I Gat Lav mo Sore, mo Hem I Stap Kaen
Stadi long toktok ia wetem prea mo luklukgud blong save wanem blong serem. ?Olsem wanem nao taem yu andastanem fasin blong Sevya i leftemap fet blong yu long Hem, mo blesem olgeta we yu stap lukaotem olgeta tru long visiting tijing? Blong kasem moa infomesen, go long reliefsociety.lds.org.
Fet, Famle, Help
“Insaed long ol skripja, lav mo sore i minim stret se ‘blong harem nogud wetem.’ Hem i minim tu se blong soem harem nogud blong yu, gat filing blong sore, mo stap kaen mo fogivim narafala.”1
“Jisas Kraes i givim yumi plante eksampol blong yumi soem lav mo sore,” Presiden Tomas S. Monson i talem. “Man we i wokbaot nogud i stap long pul blong Betesda; woman we oli kasem hem i stap slip wetem nara man; woman we i stap long wel blong Jekob; pikinini gel blong Jairas, brata blong Meri mo Mata—wanwan long olgeta i stap soem wan man we i kasem plante kil long bodi blong hem long rod i go long Jeriko. Wanwan long olgeta i nidim help.
“Nao Jisas i talem long hem se, Ale, yu stanap, yu tekem mat blong yu, yu wokbaot, yu go.’ Long woman ia we i mekem plante sin, ‘Yu gohom, mo yu no moa mekem sin bakegen.’ Blong helpem woman ia we i kam blong karem wota, Hem i givim wan ‘springwota we i save ron oltaem insaed long hem we i no save finis.’ Long pikinini gel blong Jairas toktok ia i kam se, ‘Talita Kum, yu stanap.’ Long Lasaras we i stap insaed long tomb, ‘Yu kam aot.’
“Sevya i bin oltaem soem lav mo sore blong Hem we i no gat mak long limit blong hem. … Letem yumi openem doa blong hat blong yumi, blong mekem se Hem—man ia we laef blong Hem i soem eksampol blong tru lav mo sore—blong Hem i kam insaed.”2
Sam Moa Skripja
Sam 145:8; Sakaraea 7:9; Fas Pita 3:8; Mosaea 15:1, 9; 3 Nifae 17:5–7
I Kam long Ol Skripja
“Hasban blong mi mo mi i bin nildaon long saed blong 17 yia gel blong mitufala mo prea strong from laef blong hem,” Linda S. Riv , seken kaonsel insaed long Rilif Sosaeti jeneral presidensi i talem. “Ansa hem i bin no, be . … mifala i kam blong save … se … [Sevya] i filim lav mo sore ia long yumi long ol harem nogud blong yumi.”3
“Wan long ol stori we mi laekem tumas abaot laef blong Sevya insaed long stori blong Lasaras. Ol skrija oli talem long yumi se ‘Jisas i laekem Mata, … sista blong hem [Meri], mo [brata blong olgeta] Lasaras.’”4Taem Lasaras i bin sik, toktok i kasem Jisas, be taem Hem i kasem, Lasaras i bin ded finis. Meri i ron i go long Jisas, i foldaon long leg blong Hem, mo krae. Taem Jisas i luk we woman ia i stap krae, “hem i harem nogud tumas we i stap pulum win blong hem from, mo … krae” (Jon 11:33, 35).
“Hemia nao wanem yumi sud mekem. Yumi mas filim mo luk blong yumiwan, mo afta, helpem evri pikinini blong Papa long Heven blong filim, mo luk, mo save se Sevya blong yumi i bin tekem long Hemwan, i no ol sin blong yumi nomo, be tu, ol soabodi blong yumi, mo ol safaring blong yumi, mo ol hadtaem blong yumi blong mekem se Hem i save wanem yumi filim mo olsem wanem blong mekem yumi filim gud.”5
© 2015 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/15 Oli letem translesen: 6/15 Translesen blong Visiting Teaching Message, December 2015. Bislama 12592 852
Tingting long Hemia
?Huia bae i save kasem blesing tru long lav mo sore blong yu.?